Şəhid polkovnik-leytenant Mehman Mirəziz oğlu Şirvanov. İndi bu ad bütün lənkəranlılar üçün çox əzizdir. Xalqımızın əbədiyyətə qovuşan igid, cəsur, qorxmaz oğlu cismən aramızdan getsə də, həmişə ehtiramla, məhəbbətlə yad edilir. Lənkəran şəhər Heydər Əliyev Mərkəzində "Tariximiz qürurumuzdur" layihəsi çərçivəsində keçirilən tədbir də Vətən sevdalısının əziz xatirəsinə həsr olunmuşdu.
Lənkəran şəhər İcra Hakimiyyətinin dəstəyi ilə baş tutan tədbirdə rayon rəsmiləri, şəhidin oxuduğu Ürgə kənd tam orta məktəbinin müəllim və şagird kollektivi, ziyalılar, şəhid ailələri, müharibə əlilləri və rayon ictimaiyyətinin nümayəndələri iştirak edib.
Tədbirdə əvvəlcə şəhidin şəxsi əşyaları və fotolardan ibarət sərgiyə baxılıb.
Rəsmi hissəsi Azərbaycan Respublikasının Dövlət Himnin sədaları altında başlanan tədbirdə ulu öndər Heydər Əliyevin və bütün şəhidlərin xatirəsi bir dəqiqəlik sükutla anılıb.
Heydər Əliyev Mərkəzinin direktoru Reyhanə Sadıxova tədbirin giriş sözündə vurğulayıb ki, Vətənimizin ərazi bütövlüyü uğrunda canlarını fəda edən hər bir şəhidin əziz xatirəsi daim hörmət və ehtiramla anılacaq, onların qəhrəmanlıq yolu gələcək nəsillərə nümunə olacaqdır.
Mərkəzin rəsm studiyasının şagirdi tərəfindən çəkilmiş polkovnik-leytenantın portretini şəhidin atasına təqdim olunub və onun mənalı ömür yolundan bəhs edən film göstərilib.
Lənkəran şəhər İcra Hakimiyyəti başçısının müavini Ülviyyə Əliyeva, Lənkəran rayonu üzrə təhsil sektorunun aparıcı məsləhətçisi Cəmil Axundzadə, Abşeron rayon İcra Hakimiyyəti yanında İctimai Şuranın sədri Xatirə İsmayılova, "Ölməz Qəhrəman" kitabının müəllifi Pərvanə Mehman qızı, şairə Xatirə Xatın və şəhidin əmisi Maşallah Şirvanov çıxış edərək Azərbaycanın ərazi bütövlüyü uğrunda gedən mübarizədə şəhidlərin misilsiz qəhrəmanlıq göstərdiyini deyib, Azərbaycan Respublikasının Prezidenti İlham Əliyevin və rəşadətli ordumuzun qətiyyəti sayəsində Vətən torpaqlarının düşmən işğalından azad edilməsinin ölkəmizin həyatında yeni mərhələnin və inkişaf dövrünün əsasını qoyduğunu bildiriblər.
Yazıçı Pərvanə şəhid Mehman Şirvanovun şərəfli ömür yoluna “Ölməz Qəhrəman” adlı kitab həsr edib. Kitabın təqdimatı da yerinə düşüb. Müəllif kitabın yazılma səbəbindən danışaraq vurğulayıb ki, şəhidin keçdiyi şərəfli yolunu oxuculara çatdırmaq olduqca vacibdir. Çünki Mehmanın həyatı başdan-başa qəhrəmanlıq məktəbidir.
Həmçinin tədbirdə tanınmış ifaçılar mahnılar, məktəblilər isə vətənpərvərlik mövzusunda şerlər oxuyublar.
Sonda şəhidin atası Mirəziz kişi şəhid ailələrinə və müharibə iştirakçılarına göstərilən qayğıya görə ölkə başçısı İlham Əliyevə, Birinci vitse-prezident Mehriban xanım Əliyevaya minnətdarlığını bildirib və tədbirin təşkilində əməyi keçən hər kəsə təşəkkür edib.
Zəfər ORUCOĞLU Azərbaycan Jurnalistlər Birliyinin üzvü
