Elçin Bayramlı: “Su ötürücü borular, kəmərlər bərbad vəziyyətdədir, çirklənmiş, çürümüş haldadır”
Paytaxt sakinlərini narahat edən məsələlərdən biri də mənzillərə paylanan suyun keyfiyyətidir. Əhali suyun keyfiyyəti ilə bağlı mütəmadi olaraq narazılıq edir. sosial şəbəkə istifadəçiləri məlum məsələ ilə bağlı zamanla giley edir.
İddia olunur ki, mənzillərə paylanan su içməli deyil, texniki suyun keyfiyyətinə bərabərdir. Hətta su o qədər çirkli olur ki, bunu gözlə görmək mümkündür.
“Bakı və Abşeron zonasında əhaliyə verilən suyun keyfiyyəti qənaətbəxş deyil, bərbad vəziyyətdədir”
Sağlam Cəmiyyət Hərəkatının Rəhbəri Elçin Bayramlı “Bakı-Xəbər”ə açıqlamasında qeyd etdi ki, Bakı və Abşeron zonasında əhaliyə verilən suyun keyfiyyəti qənaətbəxş deyil: “Suyun tərkibində həll olunmuş duzların miqdarı yüksəkdir, çoxluğu artıqdır, PH səviyyəsi aşağıdır. Əslində bu su içməli su deyil, texniki su sayılır. Sırf bu səbəbdən insanların çoxu evlərində filtr aparatı qoşub, ya da mağazalardan təmizlənmiş su alır. Birbaşa kran suyunun içilməsi məsləhət deyil, sağlamlığa zərərlidir. Suyun qaynadılaraq içilməsinə gəlincə, deyim ki, bu su da məsləhət deyil, ölü su sayılır. Su qaynadılanda onun tərkibində olan metal və xlor məhv olmur, yalnız müəyyən bakteriyalar yox olur. Bu səbəbdən də çıxış yolu filtr aparatının alınıb evlərə quraşdırılmasıdır. Məlumdur ki, xlor çox təhlükəli maddə sayılır. Onun suya qatılması düzgün deyil. Guya suya xloru hansısa bakteriyanı öldürmək üçün qatırlar, həm də suyun durulması üçün bu maddədən istifadə edirlər. Ancaq xlorun suya qatılması xeyrindən çox ziyanlıdır. Hər bir halda bu sahədə vəziyyət olduqca acınacaqlıdır. Bu sahəyə böyük vəsaitlər qoyulmasına baxmayaraq, problemlər azalmaq əvəzinə daha da artır”.
Həmsöhbətimiz onu da əlavə etdi ki, ölkənin su təchizatında əsas mənbələr düzgün formalaşdırılmayıb: “Kür çayından gələn mənbələr çayda suyun kəskin azalması dövründə pis vəziyyətə düşmüşdü. Ondan sonra Oğuz-Qəbələ saniyədə 5 kubmetr hesablanmışdı, ancaq indi heç 3 kubmetr su belə ala bilmirlər. Bu layihəyə qoyulan 1 milyard lazımi effekt vermir. Ümumiyyətlə, suyun keyfiyyətinə baxan yoxdur. Onu da deyim ki, su ötürücü borular, kəmərlər bərbad vəziyyətdədir, çirklənmiş, çürümüş haldadır. Su evə gəlib çıxana qədər olduğundan da bərbad hala düşür. Bu səbəbdən də əhalinin iradları haqlıdır”.
Ekspert hesab edir ki, suyun keyfiyyəti ilə bağlı hesabat istənilmir: “Bu sahənin niyə bərbad vəziyyətdə olduğu tələb edilməlidir. Onu da deyim ki, beynəlxalq təşkilatların hesabatlarında da Azərbaycanda suyun keyfiyyət və kəmiyyət etibarı ilə aşağı səviyyədə olduğunu görürük. Yenidən vəziyyət qiymətləndirilməli, problemin həlli üçün düzgün sistem qurulmalıdır. Ümumiyyətlə, kompleks şəkildə işlər görülməlidir”.
Günel CƏLİLOVA
