İlqar Hüseynli: “Şəffaflığın təmin olunması üçün, daha yaxşı olardı ki, açıq tender elan edilsin”
İcbari Tibbi Sığorta Üzrə Dövlət Agentliyi müxtəlif rayonlarda qeyri-yaşayış sahələri icarəyə götürüb. Agentlik tender müsabiqəsi keçirmədən, bir mənbədən satınalma metodu əsasında obyekt sahibləri ilə müqavilələr imzalayıb. Fiziki şəxslərdən ümumilikdə 10 obyekt icarəyə götürülüb və onlarla bu ilin sonuna kimi icarə müqaviləsi imzalayıb.
İmzalanan icarə müqavilələrində diqqət çəkən məqamlardan biri odur ki, fərqli rayonlarda fərqli sahələri olan obyektlər üçün eyni icarə haqqı ödəniləcək. Məsələn, Cəlilabad şəhərindəki 87,9 kv. metr sahəsi olan obyekt üçün də, Şəki şəhərindəki 140 kv. metr sahəsi olan obyekt üçün də eyni məbləğ – 20 min 930 manat 28 qəpik ödəniləcək.
Göründüyü kimi, fərqli rayonlar, fərqli obyektlər, eyni icarə haqqı. Maraqlıdır, bu nə dərəcədə doğrudur?
“Bakıdan uzaq bir rayonda 87,9 kv. metr sahəsi olan obyektin bu qiymətə icarəyə verilməsi real görünmür”
Sözügedən məsələyə aydınlıq gətirən ekspert İlqar Hüseynli “Bakı-Xəbər”ə açıqlamasında bununla bağlı bir sıra məqamlara toxundu: “Təbii ki, rəqəmlərin standart olması ilk baxışdan uyğun görünmür. Çünki bəzi rayonlarda icarə haqqında qiymətlər dəyişir. Ola bilsin, Cəlilabadda bir qiymətə, Şəkidə isə başqa bir qiymətə ümumi olaraq icarə haqları müəyyənləşdirilə bilər. Ancaq görünən ondan ibarətdir ki, İcbari Tibbi Sığorta Üzrə Dövlət Agentliyinə, ümumiyyətlə, 10 rayonda öz işlərini təkmilləşdirmək məqsədilə ofis və digər xərclər üçün ümumi bir məbləğ ayrılıb. Ümumi razılaşma bundan ibarət ola bilər ki, standart olaraq bərabər şəkildə 10 rayonda sahibkarlar arasında bərabər rəqəmlərə bölünmüş olsun. Hansı ki, onlar fiziki şəxslərlə müqavilə bağlayacaqlar. Bəzi mübahisəli məqamları aradan qaldırmaq və həmin sahibkarlarla ortaq məxrəcə gəlmək üçün razılaşma yolu seçə bilərlər. İndi bu rəqəmin rayonlara nə dərəcədə uyğunluğunu demək çətindir. Çünki icarədarlar həm də kontrakt məbləğindən vergi ödəyirlər. Ola bilsin, şərtlərin daxilində kommunal xidmətlər var. Yəni bütövlükdə incələmək lazımdır ki, bir rayon üçün 20 min 930 manat 28 qəpik nə qədər məqbuldur. Burda aşağı-yuxarı aylıq 1700-1800 manatdan söhbət gedir. Təbii ki, Bakıdan uzaq bir rayonda 87,9 kv. metr sahəsi olan obyektin bu qiymətə icarəyə verilməsi real görünmür. Burada fərqli yanaşmalar var. İstənilən halda baxmaq lazımdır ki, sahibkarlarla nə cür razılaşmalar olub. Bağlanan müqavilənin içərisində hansı məbləğlər nəzərdə tutulur. Bununla yanaşı, şəffaflığın təmin olunması üçün daha yaxşı olardı ki, açıq tender elan edilsin. Sahibkarlar bu tenderə qatılsın və rəqabət əsasında seçilmiş sahibkarlarla kontrakt imzalanması daha məqsədəuyğun hesab olunardı. Nəticədə daha şəffaf idarəetmə kimi qəbul olunardı”.
Vidadi ORDAHALLI
