Lənkəranın qabaqcıl təhsil ocaqlarından söz düşəndə Yuxarı Nüvədi kənd M.H.Mirzəcanov adına tam orta ümumtəhsil məktəbin adı bir qayda olaraq birincilər sırasında çəkilir. Bu da ondan irəli gəlir ki, burada sənətini sevən, Vətəninin, xalqının gələcək taleyini düşünən, işinə məsuliyyətlə yanaşan bir müəllim heyəti çalışır.
Məktəbdə gələcəyimiz üçün sağlam, vətənpərvər, ləyaqətli gənclər yetişdirməyi hər bir müəllim özünün müqəddəs vəzifəsi bilir. Şagirdlər yaxşı oxumaqla bərabər, müxtəlif tədbirlərin təşkilində yaxından iştirak edirlər. Bu günlər Lənkəran Şəhər-Rayon Polis Şöbəsinin əməkdaşları tərəfindən IX-XI sinif şagirdləri ilə təşkil olunan maarifləndirici görüş də öz maraq dairəsinə görə yerinə düşdü.
Polis mayoru Fazil Bağırovun, polis leytenantı Elçin Məmmədovun, Lənkəran rayonu üzrə Təhsil Sektorunun aparıcı məsləhətçisi Cəmil Axundzadənin, məktəbin direktoru Ramiz Ramazanovun, şagird və müəllim heyətinin qatıldığı tədbirdə şagirdlərə erkən nikahın yaratdığı fəsadları, narkomaniya və narkotik vasitələrin qanunsuz dövriyyəsi, alkoqolizm, eləcə onun sağlamlığa təsiri, bu və ya digər zərərli vərdişlərin insan həyatına vurduğu sağalmaz yaralar barədə geniş şəkildə məlumat verildi. O da bildirildi ki, indiki dövrdə polis əməkdaşları maarifləndirmə tədbirlərinə böyük önəm verir, ən əsası yeniyetmə və gənclərin gələcəkdə ağ ölümün pəncəsinə düşməməsi üçün səylərini davam etdirir. Gələcəyin qurucuları olan məktəbli və tələbələr bu məsələdə daha həssas olmalı, zərərli vərdişlərdən uzaq durmalıdır.
Zərərli vərdişlərin cəmiyyətimiz üçün yaratdığı problemlərdən, onlardan qorunma yollarından danışan polis mayoru Fazil Bağırov insan sağlamlığına ziyan verən hər hansı maddənin geniş yayılmasının qarşısının alınması istiqamətində hüquq mühafizə orqanları tərəfindən bütün zəruri tədbirlərin görüldüyünü və bu cinayət əməli ilə məşğul olan şəxslərin saxlanılaraq məsuliyyətə cəlb olunduqlarını da dedi.
Maarifləndirici tədbirdə, həmçinin daxili işlər orqanlarında gələcəkdə xidmət etmək həvəsində olan məktəbliləri Polis Akademiyasına kursant qəbulu qaydaları ilə tanış etdilər , təhsil müəssisəsinin yaranma tarixi və inkişafı, ölkəmizdə hüquq elminin inkişafına olan töhfələrdən genış söz açdılar .
Tədbirin sonunda isə şagirdləri mövzuya dair maraqlandıran suallara ətraflı cavab verildi.
Zəfər ORUCOĞLU Azərbaycan Jurnalistlər Birliyinin üzvü
