Abşeron qaz idarəsi təzə qiymət tarifləri müəyyən edib? - “Yarımçıq qəbzlər” narazılıq doğurur...
Akif Nəsirli: “Qəbzdə qazdan istifadənin aşağı limiti, qazdan istifadənin yuxarı limiti və qazdan istifadənin limitdən əlavə hissəsi göstərilməlidir”
Bildiyimiz kimi, Tarif (qiymət) Şurası təbii qaz üzrə yeni tariflər müəyyənləşdirib və bu ilin yanvar ayının 2-dən qərar qüvvəyə minib. Dəyişikliklərə əsasən, əhali üzrə illik istehlak həcmi üç tarif üzrə müəyyən edilib.
Vətəndaşların xeyli bir qismi yeni tariflər haqda tam məlumatlı deyil. Məsələn, Abşeron rayonunda yaşayan vətəndaşlardan biri redaksiyamıza müraciət edərək bildirir ki, borcla bağlı qəbz gəlir, amma orda tariflər qeyd olunmur. Yəni qəbzdə göstərilmir ki, abonent hansı həcmdə qaz istehlak etsə nə qədər vəsait ödəməlidir. Vətəndaş deyir ki, qəbzdə əks olunan limitli və iki əlavə limitlərin nə demək olduğunu, bu neçə kub qaz istifadəsini əhatə etdiyini müəyyən etmək olmur. Sadəcə qəbzdə limitli-12,5, limitdən əlavə-22, limitdən əlavə -30 qəpik göstərilir.
Sonuncu dəfə qazın qiyməti dəyişəndə tariflər necə müəyyənləşib?
Qeyd olunduğu kimi, 3 tarif mövcuddur. Vətəndaş deyir ki, limitin 1200 kub olduğunu və onun qiymətinin 12, 5 qəpikdən hesablandığını bilir, amma neçə kub qaz işlətsə əlavə limit üzrə 22, digər əlavə limit üçün isə 30 qəpik ödəyəcəyini bilmir. Vətəndaşın sözlərinə görə, istifadəçilərin çoxu hansı həddən sonra qaz istifadəsinin 1 kubunun 22 və hansı həddən sonra 30 qəpik olduğunu bilmir.
Şikayətçi deyir ki, qəbzdə əlavə limitlərin neçə kub qaz istifadəsinin açıq göstərilməməsi sullar yaradır. Vətəndaş qeyd edir ki, işığın qiymət tarifi aydındır, 200 kilovata qədər qiyməti 8, 4 qəpikdir, 200-dən 300-ə qədər olanda 10 qəpik, bundan sonra isə 15 qəpik ödənilir. “Bəs qazın tarifi necə hesablanır? Limitdən əlavə dedikdə hansı hədlər nəzərdə tutulur? İkinci limitdən sonra hansı hədd nəzərdə tutulur? Bu, qəbzdə qeyd olunmur. Əslində necə olmalıdır? Bu niyə qəbzdə göstərilmir? Limitdən əlavə neçə kub metr qaz işlətmək lazımdır ki, 22 qəpik ödəyək, ikinci limitdən əlavədə nə qədər qazın işlədilməsi nəzərdə tutulur ki, buna görə 30 qəpik ödənilsin? Yəni qazın neçə kubu 30 qəpikdən hesablanır?”-deyə bildirən vətəndaş deyir ki, bütün bunlar qəbzdə göstərilərsə məsələ aydın olar. Qəbzdə konkret limit qeyd olunmayıb, xüsusən də iki əlavə limitlər barədə heç bir məlumat qeyd olunmur deyən vətəndaşın müraciətinə əsasən Abşeron Rayon Qaz İstismar Sahəsi ilə əlaqə saxlamağa çalışdıq, qurumun internetdə mövcud olan (+994 12) 342-11-27), (+994 12) 342-13-69) telefon nömrələrini yığdıq, operator cavab verdi ki, hazırda bu nömrələr işləmir, sonra zəng vurarsınız
Məsələ ilə bağlı ekspertin rəyini öyrəndik.
“Bu halın aradan qaldırılması üçün addımların atılacağına və qəbzdə limitlərin, qiymətlərin göstəriləcəyinə ümid edirik”
Liberal İqtisadçılar Mərkəzinin sədri Akif Nəsirli “Bakı-Xəbər”ə şərhində bildirdi ki, təbii qazdan istifadənin aşağı limiti 1200 kubdur, qiyməti 12,5 qəpikdir, təbii qazdan istifadənin yuxarı limiti 2500 kibdur, qiyməti 22 qəbikdir, limitdən əlavə - 2500 kub aşılandan sonra istifadə edilən qazın qiyməti 30 qəpikdir. “Son qaz tariflərinin dəyişdirildiyi dövrdə aşağı qaz limiti 1200 kubdur. Həmin 1200 kubun hər kubuna görə vətəndaş 12, 5 qəpik ödəməlidir. Qaz istifadəsinin aşağı limiti olan 1200 kub keçilən kimi qiymətlər 22 qəpiyə qalxır. Yuxarı qaz limiti isə 2500 kubdur. 1200 kubdan 2500 kuba qədər olan hissə 1300 kub edir, 1300 kubun qiyməti 22 qəpikdən hesablanır. Əvvəl 20 qəpik idi. 2500 kubda artıq limit məhdudlaşır, limit bitir. Limitdən əlavə olan hissə isə 30 qəpikdən hesablanır. Yəni limit 2500 kuba qədərdir, 2500 kub istifadə edildikdən sonra limit aşılır, vətəndaş qazın hər kubuna görə 30 qəpik ödəyir. Vətəndaşa təqdim edilən qəbzdə qazın aşağı istifadə limiti 1200 kub limit kimi, digərləri isə əlavə limit kimi göstərilib. Əslində isə limitdən əlavə hissə 2500 kubdan sonra istifadə olunan hissədir. Qəbzdə qazdan istifadənin aşağı limiti, qazdan istifadənin yuxarı limiti və qazdan istifadənin limitdən əlavə hissəsi göstərilməlidir.
Əslində, adlandırma belə olmalıdır. Amma görünür, nəyisə qısaltmaq üçün qəbzdə bu cür yazıblar”.
A.Nəsirli hesab edir ki, “Azəriqaz” vətəndaşların bu kimi müraciətlərinə həssas yanaşacaq və qəbzdə limit cədvəli, tariflər əks olunacaq, insanlar da çaş-baş qalmayacaqlar. “Bu halın aradan qaldırılması üçün addımların atılacağına və qəbzdə limitlərin, qiymətlərin göstəriləcəyinə ümid edirik. Vətəndaşları da anlamaq mümkündür və limitlərin həcminin qəbzdə əsk olunmaması çaşqınlıq yaradıb. Bu məsələnin həll ediləcəyinə inanırıq. Qəbzlərdə hər şey açıq yazılmalıdır ki, vətəndaş bilsin”-deyə A.Nəsirli qeyd etdi.
İradə SARIYEVA
