11 ayın sultanı olan Ramazan ayı start götürüb. Oruc tutan paytaxt sakinləri günün sonunda iftarlarını bəzən rahat şəraitdə açmağı üstün tuturlar. Restoranlarımız isə buna görə müxtəlif iftar menyuları təklif edir. Ancaq restoranlarda təklif edilən qiymət hər kəsin büdcəsi üçün deyil.
Restoranların bir nəfər üçün təklif etdiyi iftar menyularının qiymətini araşdırdıq.
"Günaydın" restoranının hər iki filialında bir nəfər üçün iftar menyusunun qiyməti 90 manatdır. Menyuya şorbalar, isti və soyuq qəlyanaltılar, əsas yeməklər, ara yeməklər, salatlar, desertlər və içkilər daxildir.
“Fairmont Baku"nun "Le Bistro" restoranında təkbaşına oruc açmaq istəyənlər isə 88 manat ödəməlidirlər.
“Şəhrazad” restoranı - 1 nəfərlik menyu 50 manatdır. 10% xidmət haqqı da hesablanır. Menyuya iftar qəlyanaltıları, əsas yeməklər, şirniyyatlar, ara yeməklər və soyuq içkilər daxildir.
“Yelkən restoran Baku” – 1 nəfərlik menyu 50 manatdır. 10% xidmət haqqı da hesablanır. Menyuya iftar qəlyanaltıları, əsas yeməklər, şirniyyatlar, şorbalar, ara yeməklər və soyuq içkilər daxildir.
Qeyd etdiyimiz kimi, bu ayda bir çox restoranlar müştərilərinə iftar üçün xüsusi menyular təklif edir. Lakin təklif olunan menyuların qiyməti normal menyu qiymətlərindən daha bahadır. Restoranlar bunu hətta çeşid çoxluğu ilə də əlaqələndirir.
Tural İrfan: “Qiymətləri bu ayda bahalaşdırmaq imansızlıqdır və o şəxslər cəhənnəmlikdir”
İlahiyyatçı Tural İrfan “Bakı-Xəbər”ə şərhində bildirdi ki, Ramazan ayı rəhmət ayıdır. Bu ayda gərək səxavət göstərəsən, kömək edəsən, yardımlaşasan, mümkün qədər təmənnasız əl tutasan: “Amma bəziləri bu ayı maddi maraqları üçün fürsətə çevirib günaha batırlar. Qiymətləri bu ayda bahalaşdırmaq imansızlıqdır və o şəxslər cəhənnəmlikdir. Çünki çoxsaylı dəlillər, hədislər var ki, müsəlmanları aldadan, bazarda fürsətcillik edənlər, süni qiymət artıranlar günahkardırlar. Əksinə, bir çox ölkələrində kafe, restoran işlədənlər qiymətləri aşağı salırlar ki, savab qazansınlar”.
Həmsöhbətimiz hesab edir ki, iftar süfrəsində hər hansı yemək ola bilər. İftar üçün xüsusi xörək nəzərdə tutulmayıb. Kimə hansı yemək xoşdur, imkanı çatırsa onu da yeyə bilər. İftarı, iftar süfrələrini alver, biznes alətinə çevirmək küfrdür, müşrik və münafiqlikdir: “Ən sonuncu yoldur ki, insan bütün çirkin işləri icra edib, təkcə dini alverə çevirməyi qalıb, onu da Ramazan ayında edir. Mümkün qədər imanlı adamlar iftar süfrələri açmalıdır. Pullu və ödənişli iftar süfrəsi olmaz. Bu, qurban ətini pulla satmağa bənzəyir. Pul qazanmaq üçün camaatı aldadıb xüsusu xörəkləri iftar menyusu adı ilə təqdim edirlər. Oruc tutan adam mümkün qədər yüngül yeməklər yeməlidir. Ramazan bordaq ayı deyil. Əksinə, pəhriz ayıdır. Bəziləri əlinə keçəni qarnına doldurur, bu doğru deyil”.
Eyyub Hüseynov: “Təqdim olunan iftar menyularının qiymətləri yüksək olduğundan əhali bu vəziyyətə istehza ilə yanaşır”
Azad İstehlakçılar Birliyinin sədri Eyyub Hüseynov hesab edir ki, menyu qiymətləri insanları qane etmir və narazılığa səbəb olur: “Təqdim olunan iftar menyularının qiymətləri yüksək olduğundan əhali bu vəziyyətə istehza ilə yanaşır. Biznes qurumları hazırkı vəziyyətdən istifadə edir və istehlakçı hüquqlarını bu cür qiymət siyasəti ilə pozurlar. Bu problem həll olunmalıdır. Nazirlər Kabineti sözügedən məsələ ilə bağlı müəyyən qərar qəbul etməlidir ki, biznes qurumları tərəfindən istehlakçı ilə belə rəftar olunmasın. İnsanlar, adətən, belə iftar süfrələri təşkil etməklə, bir növ savab qazanmaq istəyir və oruc tutan şəxslərə qonaqlıq hədiyyə edirlər. Bu çox yaxşı addımdır və geniş yayılmalıdır”.
Günel CƏLİLOVA
