Qadının missiyası təkcə ana olmaq,ailəni qorumaq,od-ocağa sahib çıxmaq deyil,həm də ictimai həyata nəfəs vermək,idarəçilik sahəsində öz sözünü deməkdir."Qadın böyük qüvvədir" deyənlər yanılmır,çünki həyatın və cəmiyyətin aparıcı qüvvəsi məhz qadınlardır.Necə deyərlər, beşik yırğalayan əllər dünyanı idarə edir.Qadınlar elmdə,təhsildə, ictimai həyatda ,idarəçilikdə hər zaman böyük uğurlara imza atıblar.8 Mart Beynəlxalq Qadınlar Günü ərəfəsində elm və təhsil sahəsində, idarəçilikdə rolu olan qadınlarımızdan yazmağı özümüzə borc bildik.
O qadınlardan ki savadı,biliyi,dünyagörüşü , davranışı,fəaliyyəti ilə gənc qızlarımıza gerçək nümunədirlər.Nailə Aqil qızı Muradova məhz belə xanımlardan biridir.Nəsimi rayonu 14 nömrəli tam orta məktəbin direktor müavini vəzifəsində işləyən Nailə Muradova müəllimlərin,şagirdlərin və valideynlərin dili ilə desək ,Nailə müəllimə kollektiv tərəfindən sevilən dəyərləndirilən bir təhsil işçisidir.Nailə xanımı şəxsən tanıdığım ,ünsiyyətdə olduğum,maraqlı söhbətlərini dinlədiyim,şagirdlərə verdiyi gözəl tövsiyələrə yaxından bələd olduğum üçün deyə bilərəm ki, o şagirdlərə bir ana qayğısı ilə yanaşır,gənc müəllimləri öz sevgisi,xoş münasibəti ilə daha yaxşı işləməyə sovq edir.Qadın hansı vəzifədə olmasından ,hansı status daşınmasından asılı olmayaraq, o bir anadır və fəaliyyəti zamanı da analıq şəfqətini heç zaman əsirgəmir.Bu ifadə Nailə müəllimənin boyuna,ruhuna biçilib.Təsadüfi deyil ki,gənc müəllimlər onu şəriştəli təhsil xadimi görməklə yanaşı,ona mənəvi ana kimi yanaşır,dəyərli məsləhət və tövsiyələr alırlar.
Muradova Nailə Aqil qızı 1967-ci il martın 14-də Ağcabədi rayonunda ziyalı ailəsində dünyaya göz açıb.1973-cü ildə həmin rayonun 1nömrəli orta məktəbində 1-ci sinfə gedib.1984-cü ildə məktəbi bitirib və həmin il BDU-nun mexanika-riyaziyyat fakültəsinə daxil olub.1989-cü ildə BDU-dan məzun olan N.Muradova 1989-2002-ci illərdə Şuşa Mədəni Maarif Texnikumunda (hazırda kollecdir),2003-2017 -ci illərdə Laçın rayon 17 nömrəli orta məktəbdə riyaziyyat müəllimi işləyib.2017-ci ildən indiyə qədər davamlı olaraq Bakı şəhəri Nəsimi rayonu 14 nömrəli məktəbdə direktor müavini vəzifəsində çalışır.Nailə müəllimə təkcə səriştəli təhsil işçisi ,əvəzsiz pedaqoq yox ,həm də üç övlad anasıdır.Cəmiyyətə ağıllı,tərbiyəli övladlar bəxş edib.Dövlətə,dövlətçiliyə,ali dəyərlərimizə qəlbən ,mənən,bağlı olan və onu fəaliyyətində rəhbər tutan Nailə müəllimənin həyat yoldaşı Məhərrəmov Elxan Qulu oğlu təqaüdçüdür.Övladları Məhərrəmov Ayxan həkim,Məhərrəmov Nihat dövlət qulluqçusu, Məhərrəmov Turxan isə kompüter mütəxəssisdir.Nailə müəllimənin yetişdirdiyi şagirdləri də ona övladları kimi əziz və dəyərlidir.Öz,analıq şəfqətini şagirdlərdən də, gənc nüəllimlərdən də əsirgəmir.Müəllim bir günəşdir,şagirdlərdir zərrəsi " deyimini məhz,Nailə müəlliməyə həsr etmək tam yerinə düşür.
8 Mart Beynəlxalq Qadınlar Günü münasibətilə məktəbin müəllimləri və şagirdləri adından Nailə müəlliməni təbrik edirik.
Bayramınız mübarək, əziz Nailə müəllimə!
İradə SARIYEVA
