İnsan dünyaya bir dəfə gəlir. Təkrar geriyə dönüş yoxdur. Ulu Tanrı insanları canlı varlıqların əşrəfi seçmişdir. Onlara nəfs, tamah, ağıl və şüur verib. Elə insanlar var ki, ağıl və şüuru nəfsindən, tamahından üstün olur. Belə insanlar Allahın ən sevimli bəndəsi məqamına çatırlar.
Belə şəxsiyyətlərdən biri də Ağcabədi rayon xəstəxanasının illərlə baş həkimi olmuş Əliyev Şahlar Zülfüqar oğludur. Şahlar Həkim 1945 - ci ildə Ağcabədi rayonunda doğulub. Ağcabədilidir. İstedadlı həkim- kardioloq, həm də İnsanlığı uca məqamlara çatmış nəcib insandır. Deyirlər, İnsanlığın müsbət və mənfi cəhətdən 2 atributu var. Azərbaycan klassik ədəbiyyatının görkəmli numayəndəsi Xəqani Şirvani yazır:
İstəsən güzgü tək saf olsun ürək,
Sinədən on şeyi atasan gərək.
Haram, qeybət, kin, paxıllıq, tamah,
Kibr, riya, həsəd, ədavət, kələk.
Bu mənfi xüsusiyyətlər Şahlar həkimin təbiətinə tamamilə yaddır. Peyğəmbərimizin kürəkəni İmam Əli deyərdi: “Kasıba verdiyin salamla varlıya verdiyin salamın fərqi varsa, cəhənnəmdə özünə yer seç”. Heç kim Şahlar həkimin salamında fərq görməyib. Şahlar həkimin dili şirin olub. Heç kimin qəlbini qırmayıb. Söz sərrafıdır. Vətənini, millətini sevən, özünü və yerini bilən, sözü məqamında deməyi bacaran şəxsdir.
Şəms Təbrizi yazırdı:
Kimi quyu qazar, hər susayan içsin deyə,
Kimi quyu qazar, gəlib gedən düşsün deyə.
Şahlar həkim quyunu susuzlar, dodağı teşnə olanar su içsin - deyə qazıb. Heç kimi tələyə salmaq meyli belə olmayıb. Poeziyanın sultanı Şeyx Nizami yazır:
“Əqili bir işdi yumşaq danşmaq.
Kobudluq axmağa yaraşır ancaq”
Şahlar həkim uzun müddət Ağcabədi şəhər poliklinikasının müdiri və 13 il Ağcabədi RMX-nin baş həkimi işləyib. Xadimədən tutmuş həkimlərə qədər bütün tibbi personal Şahlar həkimin əlindən və dilindən nə pislik eşidib, nə də görüb. Şahlar həkim heç vaxt kiçiklərə nəvaziş göstərməyi unutmayıb. Bu da böyüklüyün ən böyük əlamətidir. Şahlar həkim ağır 1-ci Qarabağ müharibəsi dövründə özünü təmənnasız və misilsiz vətənpərvər kimi bir daha təsdiqlədi. O illəri xatırlayanlar, Şahlar həkimin fəaliyyətini yada salanlar bir daha deyirlər ki, "Şahlar həkim bizim Şahlardır, o elə bu cür də olmalı idi...." 90-cı illərin başlarında Xəstəxana artiq hərbi qospital statusu almışdır. Müharibənin davam etdiyi 1990-1993-cü illərdə 2394 yaralıya xidmət etmək, vətənə borcunu şərəflə yerinə yetirmək Şahlar həkimin ümdə vəzifəsi olmuşdur. Şahlar həkimi tanıyanlar həmişə onun haqqında fəxrlə danışır. Şahlar həkimin xəstəxanasına bir gündə ermənilərlə döyüşdə yaralanmış 65 nəfər yaralının gətirildiyini, Şahlar həkimin həmin gün ANŞ kameralarına verdiyi kövrək müsahibə bu gün də ANS-in arxivində saxlanılır.
2025-ci il martın 5-də Şahlar həkimin 80 yaşı tamam olur. Sevimli həkimimizə, vətənpərvər və qürur duyduğumuz həmyerlimiz Şahlar həkimə möhkəm can salığı arzulayırıq. Ürəkdən təbrik edirik.
Əqliniz, məntiqiniz, yaddaşınız bu günkü kimi ömrün sonuna qədər yerində qalsın, Sizi tərk etməsin, həkim!
Amin.!
Sonsuz ehtiram və sayqılarla :
Haqverdiyev Kamil, həkim. Mustafayeva Dilbər, həkim. İbadov Əli, həkim Gülməmmədov İsrafil, mühasib.
