Əliməmməd Nuriyev: “Zamanla bəzi hakimlər haqqında neqativ fikirlər səslənir, öz fəaliyyətində xoşagəlməz hal yaşayanlar da olub”
Son illər bütün sahələrdə həyata keçirilən mütərəqqi işlər məhkəmə-hüquq sahəsindən də yan keçməyib. Qeyd edək ki, insan hüquqlarının müdafiəsini təmin edən ən qabaqcıl standartların milli sistemlərə gətirilməsi yeni çağırışlara uyğun çevik məhkəmə siyasətinin formalaşdırmasını tələb edir. Bu kimi amillər məhkəmə-hüquq islahatlarının əsasını təşkil edir.
Bəzən məhkəmə hakimləri barəsində xoşagəlməz rəylərə rast gəlinir. Maraqlıdır, Azərbaycanda məhkəmə hakimlərinin peşəkarlığı və nüfuzu lazımı səviyyədə özünü göstərirmi? Hakimlərin nüfuzuna kölgə salan ən çox hansı neqativlərə rast gəlinir? Hakimlərin peşəkarlığı ilə bağlı neqativ rəylər daha çox nədən əmələ gəlir - təhsildən, ya peşəkar təcrübənin zəifliyindən?
“Hakimlər, hüquq sferası media və vətəndaş cəmiyyətinə açıq olsa, onlar haqqında səslənən fikirlərin əsassız olduğu ortaya çıxar”
“Konstitusiya” Araşdırmalar Fondunun rəhbəri Əliməmməd Nuriyev “Bakı-Xəbər”ə şərhində bildirdi ki, son illərdə hakimlərin peşəkarlığı artıb. Hakimlər çoxsaylı təlimlərdən keçir: “Məlumdur ki, hakimlər necə gəldi təyin olunmur. Hakim olmaq üçün bir neçə mərhələdən keçilir. Bu mərhələ olduqca keyfiyyətli və müasir standartlara uyğun həyata keçirilir. Ilk olaraq müsabiqə, sonra müsahibə mərhələsi olur. Daha sonra hakimliyə namizədlər müxtəlif təlimlərdə iştirak edir. Bu baxımdan hakimlərin peşəkarlığı artan dinamika üzrə gedir. Həmçinin onu da deyim ki, bu mərhələlərdə yüksək bal toplayan şəxslər hakimliyə iddialı ola bilir. Zamanla bəzi hakimlər haqqında neqativ fikirlər səslənir. Öz fəaliyyətində xoşagəlməz hal yaşayanlar da olub. Hətta həmin hakimlərin fəaliyyətinə belə xitam verilib. Problem tək məhkəmə, hüquq sahəsində deyil, bütün sektorlarda var. Bu gün hakimlərə neqativ münasibətin olmasının səbəbi media və kommunikasiya ilə ünsiyyətə meylli deyil. Onların işi çətindir, hər proses haqqında məlumat verə bilməzlər. Hesab edirəm ki, hakimlər, hüquq sferası media və vətəndaş cəmiyyətinə açıq olsa, onlar haqqında səslənən fikirlərin əsassız olduğu ortaya çıxar.
Onu da deyim ki, ötən illərə nisbətən bu gün məhkəmələrdən məlumat əldə etmək daha asandır. Çünki elektron məhkəmə sistemi inkişaf edir”.
Leyla QARAXANLI
