Pərvanə Mustafayeva: "Regionlarla mərkəz arasında struktur inkişafı səviyyəsində ciddi fərqlər mövcuddur"
Azərbaycanın bölgələrində həkim çatışmazlığı ilə bağlı vahid strategiya hazırlanır. Bunu səhiyyə naziri Teymur Musayev media nümayəndələrinə açıqlamasında deyib. Onun sözlərinə görə, hazırda Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB bu məsələ ilə bağlı birgə iş aparır.
Maraqlıdır, bölgələrdə daha çox hansı sahə üzrə həkimlər çatışmır? Ümumiyyətlə, həkim çatışmazlığının əsas səbəbləri nədir və necə həll edilə bilər?
"Bütün tibbi sahələrdə, xüsusən də innovativ istiqamətlərdə və cərrahiyyə sahələrində kadr çatışmazlığı var"
Tibbi ekspert Pərvanə Mustafayeva "Bakı-Xəbər"ə şərhində qeyd etdi ki, regionlarla mərkəz arasında struktur inkişafı səviyyəsində ciddi fərqlər mövcuddur: "Bu gün İcbari Tibbi Sığorta çərçivəsində tibbi xidmətlərdən istifadə edilməsinə baxmayaraq, regionlarda işləmək üçün xüsusi imkanlar, şərtlər yoxdur. Artıq sosialist təsərrüfatı bitib. Həkimlərin bölgələrdə işləməməsinin birinci səbəbi yetərli şəraitin olmamasıdır. Sadəcə olaraq, həkimlərin marağı yaranmalıdır. Yəni ən azı regionlarda işləyən şəxslər üçün müxtəlif sosial proqramlar olmalıdır. Məsələn, maaşlarında ciddi fərqlər, müəyyən iş stajından sonra pensiya təminatında fərqlər kimi amillər ola bilər. Yəni insan bunları ölçüb-biçib gedib rayonda işləməlidir. İndiki reallıq ancaq bu cür ola bilər. Bunlar olmadığına görə heç kimi rayona məcburən göndərmək olmaz".
Ekspert onu da əlavə etdi ki, həkim çatışmazlığının əsas səbəblərindən biri rezidentlərin hazırlanması ilə bağlı mövcud problemlərdir: “Bu problem illərdir davam edir. Əsas səbəb odur ki, Tibb Universitetində rezident hazırlığı həyata keçirilmir. Universitetin hər iki korpusu ancaq xəstə qəbulu ilə məşğuldur, rezidentlərin hazırlanması məsələsi arxa plana keçib. Rezidentlər də xəstələrin müalicəsində iştirak etməlidirlər, praktikaya yiyələnməlidirlər. Amma burada İcbari Tibbi Sığorta əsasında xəstə qəbulu aparılmır. Nəticədə həkimlərin peşəkarlaşması yönündə çatışmazlıqlar yaranır. Onu da deyim ki, bütün tibbi sahələrdə, xüsusən də innovativ istiqamətlərdə və cərrahiyyə sahələrində kadr çatışmazlığı var. Xüsusilə ortopediya və kardiocərrahiyyə kimi sahələrdə regionlarda həkimlərin sayının artırılması vacibdir”.
Günel CƏLİLOVA
