Lerik kəndlisi ağır güzəranından hələ də şikayətçidir...

img

İndi Lerikin dağ kəndlərində  yaşamaq çox çətindir. Bəri başdan deyim ki, bu da burada dövlət işində çalışan, insanların  taleyinə məsul olan  rəhbər işçilərin  var-dövlət toplamaq məqsədi ilə yaratdığı xaosla, ögey münasibətlə  bağlıdır. Rayonda kəndlini illər üzünü narahat edən sosial məsələləri   düşünüb, onun rahatlığı üçün bir iş görmək çoxdadır heç kimin yadına düşmür.  Buna görə də  iyirmi birinci əsr olsa da, Lerikin əksər kəndlərində normal həyat sürmək üçün adi şərait yoxdur.   Belə sosial vəziyyəti acınacaqlı olan kəndlərdən biri də Hamaratdır. Sovet vaxtı öz yüksək inkişafı hesabına tanınan bu yaşayış məntəqəsi   problemlər məngənəsində can verir.  Məmurların iflic etdiyi  doğma kəndi məcburiyyət üzündən qoyub qaçanların sayı artıq bilinmir.

Kənd əsl xarabalığı xatırlayır. İndi hamaratlıları ən çox əziyyətə salan, həlli müşkülə dönən, üst-üstə qalaqlanmış    sosial  məsələlər bir deyil, iki deyil. Daha vacibləri haqqında bir-neçə  söz demək istəyirəm. Kəndin həftələrlə  işıqsız qalması burada adi haldır. Keçən əsrin altmışıncı illərin “yadigarı” olan ağac dirəkləri çoxdan ömrünü başa vurubdur.  Əyilmiş dirəklər, sallanmış elektrik naqilləri hətta insan həyatı üçün təhlükə  yaradır. Bir balaca yağış yağanda  kəndin içində palçıq əlindən tərpənmək olmur. Sovet dağılanı Hamarata işləyən avtobus da yoxa çıxmışdır.  Nəticədə camaat bir yerə çıxmaqdan ötrü çətinliklə üzləşir.  Bankomatım  yoxluğu yaşlı  adamları  aylarla  dövlətdən aldıqları pensiya pullardan məhrum  edir. Sosial-məişət qayğılardan  danışmağa belə dəyməz. Ən əsası isə “mavi” qazı sağa-sola getdiyi respublikada  son vaxtlar hamaratlılar bir otaqlı evini isitməyə yanacaq tapa bilmir. Belə ki, meşələr  bağlanıb, 10 ildən çoxdur kəndə qazın verilməsi  söz olaraq qalır. Soyuq evlərdə can verə-verə günləri sayan insanları görəndə inanmağın gəlmir ki, dünyada Hamarat kimi bir sahibsiz yer olsun. Ümumiyyətlə, burada 30 ildə əhalın rahatlığı üçün daşda daş üstə qoyulmayıb.  Elə bil hamaratlılar Azərbaycan vətəndaşı deyil...

Zəfər ORUCOĞLU

Azərbaycan Jurnalistlər Birliyinin üzvü

Peşə etikası

Son xəbərlər