Məlum olduğu kimi, Tarif Şurasının növbəti iclası keçirilib və dərman qiymətlərilə bağlı qərar verilib. Yeni dövlət qeydiyyatına alınan 337 dərman vasitəsinin qiyməti təsdiq edilib və həmin preparatların satış qiyməti artıb.
Qeyd edək ki, son illər dərmanların qiymətləri bir neçə dəfə bahalaşıb. Hətta elə vətəndaşlar var ki, maddi vəziyyəti ilə əlaqədar həkimin məsləhət gördüyü dərmanları almaqda çətinlik çəkir. Bəzi insanlar dərmanların bahalığı ilə əlaqədar tam müalicə kursunu belə ala bilmir.
Ekspertlər bildirir ki, vətəndaşlar onsuz da dərmanların baha olmasından şikayətçidir. Yenidən dərmanların qiyməti artırılarsa, bu, alıcılıq qabiliyyətinin daha da aşağı düşməsinə səbəb olacaq.
Xalid Kərimli: “Dərman mövzusu həssas məsələ olduğu üçün Tarif Şurası da məsuliyyəti ona görə öz üzərinə götürür ki, idxalçılar vəziyyətdən istifadə edib qiyməti süni şəkildə qaldırmasınlar”
Iqtisadçı Xalid Kərimli bildirdi ki, ölkə daxilində dərman istehsalı yox səviyyəsindədir: “Ölkənin idxalının 4,5 faizi tibbi məlumatların alınmasına yönəlib. Dərman təminatı əsasən idxal hesabına mümkün olur. Rusiya, Almaniya, İsrail,Türkiyə, Hindistan və digər ölkələrdən ölkəmizə dərman gətirilir. Onu da əlavə edim ki, dərman istehsalında lazım olan məhsulların qiyməti də günü-gündən qalxır. Bu səbəbdən də istehsalçılar öz məhsullarının qiymətini artırmağa məcbur olur. İdxalçılar isə həmin məhsulu baha qiymətə alıb daha da artıq qiymətə satmağa məcbur olur. Dərman mövzusu həssas məsələ olduğu üçün Tarif Şurası da məsuliyyəti ona görə öz üzərinə götürür ki, idxalçılar vəziyyətdən istifadə edib qiyməti süni şəkildə qaldırmasınlar”.
Rasif Bağırov: “Tarif Şurası ölkəyə dərman gətirir ki, hələ qiymətini də müəyyən edir?!”
Tibb eksperti Rasif Bağırov bildirdi ki, dərmanların qiymətinin artırılması və ya aşağı salınması ilə bağlı dövlət qurumu tərəfindən olunan müdaxilələr başadüşülən deyil: “Əgər dövlət öz büdcəsindən vəsait ayıraraq ölkəyə dərman gətirsə və həmin dərmanın satışını reallaşdırsa, bu halda qiymətlərin qalxmasına və ya düşməsinə müəyyən qədər təsir etməsi məqsədəuyğun olar. Hansısa vətəndaş dərmanı öz vəsaiti hesabına xaricdən gətirir, gömrüyün ödənişini edir və lisenziyanın alınmasını təmin etdikdən sonra məhsulu depolara verir. Depolar isə dərmanın qiymətinin üstünə 20 faizlik pul qoyur və nəticədə dərmanın qiyməti bahalaşır. Halbuki, ölkəyə dərman gətirən firmaların şəxsi depolarının olması arzuolunandır. Bu həmin firmalarla dərman alan depolar arasında rəqabət mühiti formalaşdıra bilər. Dövlət isə yaranan azad rəqabətə nəzarət edərsə, hansısa şirkətlərin dərman monopoliyasının qarşısı alınar və dərmanlar münasib qiymətə ola bilər. Bu gün vətəndaş öz hesabına 5 manata dərman gətirirsə, dövlət həmin dərmana 15 manat qiymət qoyur. Eyni zamanda, aptekdə 7 manata satılan dərmana da dövlət daha yüksək məbləğ təyin edir. Dövlət bunu necə edə bilər, başadüşülən deyil. Belə çıxır ki, dərman alan depolar da dövlətin nəzarətindədir. Ümumiyyətlə, vətəndaşın öz hesabına gətirdiyi dərmana dövlət qiymət qoymamalıdır. Tarif Şurası ölkəyə dərman gətirir ki, hələ qiymətini də müəyyən edir?! Ona görə də Tarif Şurasının müdaxiləsi anormal haldır. Bu, düzgün olmayan bir prosesdir və təəssüf doğurur”.
Günel CƏLİLOVA
