Dekabr ayında ortaya çıxan yeni koronavirus xəstəliyi dünyanı həyəcanda saxlamağa davam edir. Ötən aylarla müqayisədə virusa yoluxanların sayı azalıb. Lakin buna baxmayaraq, koronavirus insanlara müəyyən psixoloji təsir edib.
Açıqlanan statistik məlumata əsasən, Azərbaycanda ruhi xəstələrin sayı artıb. Bu ilin əvvəlinə olan məlumata görə, il ərzində Azərbaycanda 1 milyon 936 min 715 nəfər xəstə qeydə alınıb və onlardan 11 min 718 nəfər psixi pozuntular və davranış pozuntuları xəstəliklərindən əziyyət çəkir.
Açıqlanan sonuncu statistik göstəricilərdə bildirilir ki, son 4 il ərzində psixi pozuntular və davranış pozuntuları xəstəliklərindən əziyyət çəkənlərin sayı 51% və ya 3 min 954 nəfər artıb.
Son bir il ərzində isə psixi pozuntular və davranış pozuntuları xəstəlikləri olan şəxslərin sayı 1 928 nəfər artıb.
“...indiki ajiotaj yaşadığımız bu zamandan sonra problemlərin artması da olacaq”
Psixoloq Fərqanə Mehmanqızı bildirdi ki, koronavirus öz coğrafiyasını durmadan genişləndirməkdədir. Bu virus insanların sağlamlığına ciddi təhdid yaratmaqla yanaşı, dünya iqtisadiyyatını da böyük bir təhlükəyə sürükləməkdədir: “Bütün dünyada həyəcana səbəb olan koronavirusla bağlı hazırda Azərbaycanda vəziyyət nəzarət altındadır. Dövlət səviyyəsində koronavirusun Azərbaycanda yayılmaması, əhalinin sağlamlığının mühafizəsi ilə bağlı bütün lazımi addımlar atılır, ən yüksək səviyyədə qabaqlayıcı tədbirlər görülür. Bu gün əsas məsələ panikaya qapılmamaq, boş və heç bir əsası olmayan dezinformasiyalara inanmamaqdır. Bu mövzuda əhali arasında maarifləndirmə işləri daha da gücləndirilməlidir. Məlumdur ki, bütün dünyada koronavirus pandemiyası bir çox problemə səbəb olub. O da məlum oldu ki, dünya hər şeydən əvvəl bu kimi problemlərə psixoloji cəhətdən hazır deyil”.
Həmsöhbətimizin sözlərinə görə, bu virus insanların psixologiyası ilə çox yaxşı oynaya bilir. Kimlər ki, xəstəliyə yoluxmayıblar, xəstəlik risqində deyillər, onların belə, psixologiyası darmadağın olub. Pandemiyanın evdə oturmaq, hər an özünə nəzarət qanunları insanlarda aqressiyaya, depressiyaya gətirib çıxarıb. Müxtəlif psixoloji problemləri olan insanlar olduğu üçün, indiki ajiotaj yaşadığımız bu zamandan sonra problemlərin artması da olacaq. Gələcəkdə bir çox insanda müxtəlif psixoloji problemlər əmələ gələcək”.
Günel CƏLİLOVA
