Ümumdünya Səhiyyə Təşkilatı peyvəndlə bağlı şad xəbərlər verir. Lakin vaksinin nə dərəcədə uğurlu olacağı bilinmir. Ölkəmizdə isə yoluxma statistikası ötən aylarla müqayisədə ürəkaçandır. Dalğavari şəkildə hərəkət edən bu statistika payız mövsümü ilə bağlı narahatlıqları da özündə ifadə edir.
Özündə hər hansı narahatlıq hiss edən şəxs koronavirus testindən keçir. Bəzi insanlar testin cavabına inanmayıb koronavirusa yoluxub-yoluxmadığını öyrənmək üçün kompyuter tomoqrafiyasına üstünlük verir. Lakin son vaxtlar həkimlər insanların kütləvi şəkildə kompyuter tomoqrafiya (KT) vasitəsilə müayinədən keçməsinə qarşı çıxırlar.
Maraqlıdır, həkimlərin kompyuter tomoqrafiyasına qarşı çıxmasının səbəbi nədir və KT müayinəsi nə zaman aparılmalıdır?
“…əlamətləri olmayan şəxslərdə kompyuter tomoqrafiyası aparılmasına ehtiyac yoxdur”
Professor, tibbi ekspert Adil Qeybulla qeyd etdi ki, kompyuter tomoqrafiyasının kütləvi aparılması ilə bağlı iradlar tamamilə haqlıdır: “Tomoqrafiyanın aparılmasında göstərişlər olmalıdır. Bu, o xəstələrdə aparılmalıdır ki, onlarda təngnəfəslik, boğulma, öskürək, qızdırma və sair əlamətlər müşahidə olunaraq xəstəlik kəskinləşir. Bu zaman ağciyərlərdə hansısa dəyişikliyin olmasını müəyyən etmək üçün KT-yə ehtiyac yaranır. Əks halda, COVID-19 testi müsbət çıxıb, amma əlamətləri olmayan şəxslərdə KT aparılmasına ehtiyac yoxdur. Çox vaxt bu müayinələrdə heç bir dəyişiklik olmur. O baxımdan, mütəxəssislər etirazlarında haqlıdırlar”.
Həmsöhbtimiz onu da əlavə etdi ki, kompyuter tomoqrafiya rentgen müayinəsidir, hər halda, insan sağlamlığına COVID-19-dan ziyanlı deyil. Bir dəfə kompyuter tomoqrafiyadan keçən şəxs 2-3 həftə sonra yenidən ondan istifadə edə bilər: “Koronavirusa yoluxan xəstələrin ağciyərləri ömürlük zədələnir. Virus keçsə də, ağciyərdəki zədələnmə bərpa olunmur. Aktiv pnevmoniya başlayan şəxslərdə ağciyərin rentgen mənzərəsində “buzlu şüşə” sindromu görünür. Koronavirusa yoluxan xəstənin ağciyəri zədələnibsə, sağaldıqdan sonra orada fibroz inkişaf edir. Fibroz ağciyər çatışmazlığına gətirib çıxarır. Fibroz nə qədər çoxdursa, ağciyər çatışmazlığı da o qədər artır. Bəzən elə hallar olur ki, xəstəyə prosesdən sonra ağciyər köçürülməsinə ehtiyac yaranır. Ağciyər xəstələri koronavirusa yoluxmaqdan və hipoksiyadan ölürlər".
Günel CƏLİLOVA
