İctimai yerlərdə 10 nəfərədək toplaşmağa icazə verilir. Bu, Nazirlər Kabinetinin “Bakı, Sumqayıt şəhərlərinin və Abşeron rayonunun ərazisində xüsusi karantin rejiminin sərtləşdirilməsi ilə bağlı əlavə tədbirlər barədə” qərarına edilən dəyişiklikdə əksini tapıb.
Qərara əsasən ictimai yerlərdə, o cümlədən, küçələrdə, bulvarlarda, parklarda və digər yerlərdə şəxslərin (yaxın qohumlar, yəni ata-ana, nənə-baba, uşaqlar və bacı-qardaşlar istisna olmaqla) 10 nəfərdən artıq qruplarda cəmləşməsi qadağan edilib.
Bundan əvvəl insanların 5 nəfərdən artıq qruplarda cəmləşməsi qadağan edilirdi.
İctimai yerlərdə 10 nəfərədək toplaşmağa icazə barədə qərar 8 sentyabr 2020-ci ildən qüvvəyə minir.
İctimai yerlərdə insanların bir yerə toplanması 5 nəfərdən 10 nəfərə qaldırıldı. Bilirik ki, bir yerə toplanan insanların sayı artdıqca, yoluxma risqi də artır. Virusdan qorunmaq üçün cəmiyyətdən nə tələb olunur?
“Bunu insanlar həm sosial məsuliyyətlərindən irəli gələrək etməli, həm də...”
“İnkişafa Doğru Qadın Təşəbbüsü” İctimai Birliyinin rəhbəri Ziba Nəbiyeva baki-xeber.com-a bildirdi ki, bu məsələdə cəmiyyətimizdən, insanlarımızdan tələb olunan karantin qaydalarına, qorunma üsullarına əməl edilməsidir. “Maska taxmaq vacib şərtlərdən biridir. Burada söhbət üçqat tibbi maskadan gedir və həmin maskalar da maddi baxımdan insanlarımız üçün əlçatandır. Çünki tibbi maska 85 faiz viruslardan qoruya bilir. Bu maskaları düzgün taxmaq lazımdır. Bununla bağlı ictimaiyyət arasında təşviqat da təkcə “maska taxın” deməklə yox, “maskanı düzgün taxın” şəklində aparılmalı, əhaliyə maskalardan effektiv istifadə etmək təşviq olunmalıdır. Effektivlik baxımından keyfiyyətli maska taxmağın vacib olduğuna dair cəmiyyətə mesaj ötürmək lazımdır. Digər tərəfdən, bu maskalardan qapalı məkanlarda daha çox istifadə edilməsinə ehtiyac var. Çünki insanlar əsasən qapalı məkanda toplaşıb ünsiyyət qururlar və yoluxma risqi də qapalı yerlərdə daha çox ehtimal edilir. Ona görə də bunu insanlar həm sosial məsuliyyətlərindən irəli gələrək etməli, həm də iaşə obyektlərində, ictimai nəqliyyatda sosial məsafə saxlamalı, maska taxmalıdırlar. Bilirik ki, indi bir çox ictimai iaşə obyekti açılıb. Bu məsələdə sahibkarlar da məsuliyyətli olmalıdırlar. Həm ictimai iaşə obyektlərində, həm də ictimai nəqliyyatda maska taxılmalıdır. Hesab edirəm ki, ictimai nəqliyyatda könüllülər maska taxmağı idarə etməlidirlər. İctimai nəqliyyatda insanlar maskanı düzgün taxmayıb oturublarsa, onu daxildən idarə etmək lazımdır. Bu həm insanların sosial məsuliyyəti baxımından, həm də sahibkar subyektlərinin məsuliyyəti də bura daxil olaraq, idarə edilməlidir”.
Z.Nəbiyeva qeyd etdi ki, 10 nəfərin ictimai yerlərdə bir araya gəlməsi o demək deyil ki, onlar maska taxmamalı, sosial məsafə saxlamamalıdırlar. Onun sözlərinə görə, toplanan on nəfər də mütləq şəkildə maska taxmalı, bir-birilə sosial məsafə saxlamalıdır. “On nəfər bir araya toplanacaqsa, onlar maska taxmalı, sosial məsafəni qorumalıdır, əsas tələb budur. Çünki COVID-19 daşıyıcılıq faktoru var. Yəni bu virusu heç bir simptom olmadığı halda insan daşıya bilər. Ona görə də effektivlik yalnız o zaman əldə edilir ki, ünsiyyətdə olan tərəflər hamısı maska taxsın. Bir tərəf taxanda, o biri taxmayanda yoluxma ehtimalı yenə də çoxalır. Bu səbəbdən də məsləhət olunub ki, insanların hamısı qapalı məkanda düzgün şəkildə maskadan istifadə etsinlər.
Yeri gəlmişkən, bir məqamı qeyd etmək istəyirəm. Bizdə insanlar bəzən 2-4 saatlıq istifadə müddəti olan maskalardan günlərlə istifadə edirlər, ya qollarına taxırlar, ya da ciblərinə qoyurlar, sonra da çıxarıb istifadə edirlər”.
Z.Nəbiyevanın qeyd etdiyinə görə, mütəmadi şəkildə maskadan düzgün istifadə edilməsi təşviq edilməlidir. Müsahibimizin bildirdiyinə görə, əllər təmiz yuyulduqdan sonra maskaya toxunmaq olar və ilkin olaraq qulaqcıq hissələrindən tutub bir qulağa, sonra isə digər qulağa taxmaq lazımdır. “Çox insanın olduğu qapalı məkanda olduqda iki saatdan sonra həmin maska yenilənməlidir. Maskanı çıxararkən də qaydalara düzgün riayət etməliyik. Yəni təkcə maska taxmaq yox, həm də ondan düzgün istifadə etmək, onun düzgün qaydada utilizasiyasını təmin etmək lazımdır. Maskanın istifadə zənciri düzgün təmin olunsa, bu, virusa və yoluxmaya qarşı mübarizədə çox böyük rol oynamış olar” - deyə Z.Nəbiyeva qeyd etdi.
İradə SARIYEVA
