Son həftələr ölkəmizdə karantin qaydalarının yumşaldılması prosesinə başlanıb. Bildiyimiz kimi, Nazirlər Kabinetinin müvafiq qərarı ilə 2020-ci il 18 avqust tarixindən etibarən ictimai iaşə obyektlərində müştərilərə açıq hava şəraitində xidmət göstərilməsinə icazə verilirdisə, qərargahın son qərarına əsasən, sentyabrın 8-dən ictimai iaşə obyektlərinin daxilində xidmət göstərilməsinə icazə veriləcək.
Son yumşalmalara əsasən, həm də rayonlara gediş (sərnişindaşıma istisna olmaqla) bərpa olunacaq.
Bu yumşalmalar hansı risqləri yaradır, hansı təhlükəli tərəflərə malikdir, buna görə cəmiyyətdən, insanlardan nə tələb olunur?
“Pandemiya dövründə ictimai iaşə obyektləri nəzərdə tutulan şəkildə fəaliyyət göstərəcəklərsə...”
“Türk Dünyası İnfo” İB-nin sədri Dəyanət Osmanlı baki-xeber.com-a bildirdi ki, ictimaiyyət tərəfindən qaydalara riayət edilməsə, karantinin tələblərinə cavab verən addımlar davam etdirilməsə, yumşaldılma prosesinin virusun artmasına gətirib çıxaracağı təhlükəsi ola bilər. “Karantin qaydalarının yumşaldılması nəticəsində sentyabrın 8-dən ictimai iaşə obyektlərinin daxilində xidmət göstərilməsinə icazə verilməsi və rayonlara gediş-gəlişin bərpası ilə bağlı qərar müsbət olsa da, virusa yoluxma risqlərini də artırır. Pandemiya dövründə ictimai iaşə obyektləri nəzərdə tutulan şəkildə fəaliyyət göstərəcəklərsə, təbii, bu məkanlara gələn vətəndaşlarımız, mütləq mənada, karantin qaydalarına uyğun davranmalı, oturarkən sosial məsafə saxlamalıdırlar. Qapalı məkanda yoluxma risqi daha çox olduğu üçün, vətəndaşlar ehtiyatlı davranmalı, sanitar-gigiyena qaydalarına əməl etməlidirlər ki, bununla özlərini təhlükə risqindən kənarlaşdıra bilsinlər. Qapalı məkanlarda maskadan istifadə çox vacibdir. Eləcə də rayonlarla bağlı açılımlar olandan sonra əhali mütləq şəkildə qorunma qaydalarına riayət etməlidir. Rayonlardan paytaxta, paytaxtdan rayonlara gediş-gəlişlər artacaq, daha da intensivləşəcək, bu da əhali üçün əlavə virusa yoluxma risqi yaradır. Ehtiyatlı olmaq, virusa ciddi yanaşmaq lazımdır. Bilirsiniz, elə bölgələrimiz var ki, orada virus yoxdur, bəzilərində virus var, bu səbəbdən də insanlar həm kafe və restoranlara gedərkən, həm də rayonlara, rayonlardan Bakıya gələrkən, birmənalı şəkildə, sanitar-gigiyena qaydalarına əməl etməlidirlər ki, virusa yoluxmasınlar”.
D.Osmanlının dediyinə görə, mütəxəssislərin proqnozlaşdırdığı kimi, payızda virusun yeni dalğası gözlənir və əhali bütün qorunma tələblərinə əməl etməlidir ki, gözlənilən dalğadan əziyyət çəkməsin. D.Osmanlı, həmçinin, hesab edir ki, kafe və restoran sahibləri də işlərini müvafiq qaydalara uyğun qurmalıdırlar.
İradə SARIYEVA
