Məlum olduğu kimi, ABŞ Prezidenti Donald Trampa qarşı impiçment kampaniyası başlayıb. Trampın ukraynalı həmkarı Vladimir Zelenski ilə telefon danışığı zamanı ona hansısa məxfi informasiyaları verdiyinə dair xəbər yayılıb. Bundan sonra Ağ Ev həmin danışığın stenoqramını açıqladı və qalmaqal daha da böyüdü.
Qeyd edək ki, sentyabrın 19-da “The Washington Post” qəzeti ABŞ hərbi kəşfiyyatının bir əməkdaşının rəhbərliyə şikayət edərək, Prezident Donald Trampın xarici dövlət başçılarından biri ilə ehtiyatsız şəkildə danışaraq ona hansısa söz verdiyini bildirib. ABŞ mediası həmin əcnəbi rəhbərin Ukrayna Prezidenti Vladimir Zelenski olduğunu üzə çıxarıb. Sentyabrın 22-də isə Co Bayden bununla bağlı təhqiqat başlanmasını tələb edib.
Mətbuatın iddialarına görə, iyulun 25-də Tramp Zelenskiyə zəng edərək onunla danışıb. İddialara görə, bu telefon danışığı zamanı Tramp Zelenskidən Bayden ailəsinin Ukraynadakı əlaqələrinin araşdırılmasını istəyib. Bu zaman Ukrayna Prezidentini təhdid edərək, ABŞ-ın Ukraynaya ayıracağı 250 milyonu hərbi yardım olmaqla, ümumilikdə, 400 milyon dollar dəyərində yardımı kəsə biləcəyini deyib.
Bununla belə, Trampın Zelenski ilə söhbətinin mətninin Ukraynanı necə bir çətin vəziyyətə saldığı da ortadadır. Məsələn, telefon danışığı zamanı Zelenski ABŞ Prezidentinə köhnə səfiri dəyişdiyi üçün təşəkkür edib: “O, məni yeni prezident kimi tam qəbul etmirdi”.
Daha sonra telefon danışığında Tramp Almaniyanın Ukrayna üçün heç nə eləmədiyini söyləyəndə Zelenski onun sözünə qüvvət verərək, Fransanı da bura əlavə edir. Halbuki, reallıqda Zelenski Merkel və Makronla daha çox təmasda olur və onlardan heç də az dəstək görmür. Trampla danışanda isə məlum olur ki, Ukraynanın bircə dostu varsa, o da ABŞ-dır. Həmçinin, telefon danışığında Zelenski Trampın onların ağsaqqalı olduğunu deyib.
Bütün bu deyilənlərlə yanaşı, Trampın impiçment məsələsi Ukraynanın daxilindəki siyasi proseslərə necə təsir edəcək? Zelenskinin sonrakı siyasi karyerası üçün nə vəd edir?
Fikrət Sadıqov: “Onun o qədər də ciddi səhvi müşahidə edilmir”
Məsələyə münasibət bildirən keçmiş diplomat, politoloq Fikrət Sadıqovun sözlərinə görə, Ukrayna Prezidenti Zelenski üçün bundan sonra bir qədər çətin olacaq: “Düzdür, ümumən hər iki prezidentin siyasi karyerasına sözügedən telefon danışıqları təsir edə bilər. Artıq ABŞ-da Trampla bağlı impiçment prosesi başlayıb. Konqresdə demokratlar qəti şəkildə bildirdilər ki, impiçment üçün komissiya yaranmalıdır və Tramp məsuliyyətə cəlb olunmalıdır. Çünki o, digər dövlətə seçkilərlə bağlı təzyiq göstərir. Hesab edirəm ki, gedən proseslərlə əlaqədar Zelenski də mürəkkəb vəziyyətlə üzləşə bilər. Çünki Ukrayna Ali Radasının bir sıra deputatları ona irad tutur ki, belə bir danışıqlar aparırsansa və bunun əvəzinə ABŞ Prezidentinə nəsə təklif edirsənsə, deməli, Ukrayna maraqlarına zərbə vurursan. Bütün bunlara baxmayaraq, düşünmürəm ki, Zelenskinin vəziyyəti daha mürəkkəb olsun. Ona görə ki, o, yeni seçilmiş dövlət başçısıdır. Onun o qədər də ciddi səhvi müşahidə edilmir. O, sadəcə olaraq, telefon danışığında Trampın suallarına cavab verir. Bununla belə, Trampın bəzi iradlarına müəyyən şərh verib. Zelenski qəti şəkildə telefon danışığında demədi mən filan şeyi edərəm və məsələ siz deyən kimi olacaq. Düzdür, Ukraynada Zelenskinin rəqibləri daha da fəallaşacaq, amma bunun ölkədə daxili vəziyyətin kəskinləşməsinə gətirib çıxaracağı real görünmür. Bu, Zelenskinin impiçmentinə gətirib çıxarmayacaq”.
Vidadi ORDAHALLI
