Məlum olduğu kimi, Londonda Azərbaycan Beynəlxalq Bankının keçmiş rəhbəri Cahangir Hacıyevin həyat yoldaşı Zamirə Hacıyevanın Azərbaycana ekstradisiyası ilə bağlı məhkəmə prosesi keçirilib. İclasda Vestminster şəhər məhkəməsi qərarını açıqlayıb. İngiltərə KİV-i xəbər verir ki, məhkəmə Z.Hacıyevanın Azərbaycana ekstradisiya olunmaması barədə qərar çıxarıb. Azərbaycan hökumətini təmsil edən vəkil məhkəmənin qərarından apelyasiya şikayəti verəcəklərini bildirib. Hacıyevanın vəkili isə qərarı şərh etməkdən imtina edib.
Bizim söhbət etdiyimiz hüquqşünaslar bildiriblər ki, bunun Zamirə Hacıyevanın ittiham olunduğu cinayət əməlinə heç bir aidiyyəti yoxdur. Sadəcə, ekstradisiya olunmamaqla bağlı qərarın çıxarılması Zamirə Hacıyevanın guya Azərbaycan hakimiyyəti tərəfindən təqib olunması ilə bağlı verdiyi izahatla əlaqəli ola bilər.
Bu arada, Zamirə Hacıyeva ilə bağlı başqa bir maraqlı məlumat yayılıb. “Space” TV-nin “Sadə Həqiqətlər” verilişinin qonağı olan millət vəkili, YAP İcra katibinin müavini Siyavuş Novruzov xaricdən ölkəmizə qarşı söyüş kampaniyası aparanlar və ölkə daxilindən onlara məlumat və maliyyə ötürənlər haqda sualı cavablandırarkən ABB-nin keçmiş rəhbəri Cahangir Hacıyevin xanımı Zamirə Hacıyevanı nəzərdə tutaraq deyib ki, bu şəxslər törətdikləri əməli yaddan çıxarmaqdan ötrü həmin insanlara (xaricdən Azərbaycana qarşı kampaniya aparanlara – red.) dəstək göstərirlər: “Məsələn, Böyük Britaniyada bir qadın var - mən heç kəsin ailə məsələsinə qarışmıram və toxunmuram, ancaq bu fərqli məsələdir, ordan diqqəti yayındırmaqdan ötrü bir neçə televiziya yaratdılar və Beynəlxalq Bankdan oğurlanan pullardan həmin şəxslərə verirlər. Bu cür hallar var”.
Hər halda bu faktın özü kifayət edir ki, Azərbaycan hakimiyyəti Zamirə Hacıyeva ilə bağlı Böyük Britaniya hakimiyyəti qarşısında məsələ qaldırsın. Zamirə Hacıyeva ilə bağlı ortaya çıxan daha bir ciddi faktla bağlı Azərbaycan rəsmi qaydada Böyük Britaniyaya müraciət etməlidirmi?
Beynəlxalq məsələlər üzrə ekspert Yeganə Hacıyeva baki-xeber.com-a açıqlamasında bildirdi ki, bununla bağlı mütləq müraciət edilməlidir: “Çünki ortada hələ ki, KİV-də səslənən iddia var. Bunun hüquqi perspektivinin olması üçün rəsmi müraciət lazımdır. Hər halda, buna dair faktlar olmasa, belə fikri hakim partiya funksioneri səsləndirməz. Bəllidir ki, xaricdən Azərbaycana qarşı istifadə olunan həmin media resurslarında Azərbaycanın dövlət müstəqilliyinə həqarət var. Hətta terrora, hakimiyyətə qarşı itəatszliyə dair açıq çağırılar var. Bunlar da ağır cinayət sayılır. Bu cür əməllərin maliyyələşdirilməsi də hüquqi məsuliyyət yaradır. Zamirə Hacıyeva ilə bağlı ortaya elə faktlar çıxıb ki, Böyük Britaniya kimi ölkə tarixdə ilk dəfə belə mövzu ilə üz-üzədir. Söhbət külli miqdarda çirkli pulun yuyulmasından gedir. Hər halda Britaniya məhkəməsi həm də həmin pulların hansı vasitələrlə leqallaşdırılması, necə xərcləndiyini də araşdırır. Düşünürəm ki, Azərbaycan hakimiyyəti bu yeni faktı da təqdim etməklə, Hacıyeva ilə bağlı yeni istiqamətdə araşdırmanın başlanmasına nail ola bilər. Olduqca ciddi mövzudur, mütləq müraciət olunmalıdır. Görək bu faktların qarşısında Britaniya məhkəməsi hansı qərarı verəcək?”
Məhəmmədəli QƏRİBLİ
