20/11/2019 20:32
728 x 90

London məhkəməsi Zamirə Hacıyevanın ekstradisiyasında çox ciddi əsasları nəzərə almadı...

img

Londonda Beynəlxalq Bankın keçmiş rəhbəri Cahangir Hacıyevin həyat yoldaşı Zamirə Hacıyevanın Azərbaycana ekstradisiyası ilə bağlı məhkəmə prosesi keçirilib. İclasda Vestminster şəhər məhkəməsi qərarı açıqlayıb. İngiltərə KİV-i xəbər verir ki, məhkəmə Z.Hacıyevanın Azərbaycana ekstradisiya olunmaması barədə qərar çıxarıb. Azərbaycan hökumətini təmsil edən vəkil məhkəmənin qərarından apelyasiya şikayəti verəcəklərini bildirib. Hacıyevanın vəkili isə qərarı şərh etməkdən imtina edib.

Qeyd edək ki, krallıq məhkəməsində 8 noyabr 2018-ci il tarixli məhkəmə iclasından sonra Z.Hacıyeva müəyyən şərtlərlə girov müqabilində sərbəst buraxılmışdı. Bu şərtlərdən birinə görə Z.Hacıyevanın şəxsiyyət vəsiqəsi polisdə saxlanır. Həm də qolunda elektron nəzarət qolbağı gəzdirmək, axşam və gecə saatlarında evdən çıxmamaq, hər gün polis bölməsində qeydiyyatdan keçmək məcburiyyətindədir.

Z.Hacıyeva İngiltərədə “çirkli pullar”ın yuyulmasına qarşı mübarizə haqqında yeni tətbiq olunan qanuna əsasən araşdırmaya cəlb edilən ilk əcnəbidir. O, Böyük Britaniyanın Milli Cinayət Agentliyi (NCA) tərəfindən qanunsuz yolla əldə edilmiş pulların leqallaşdırılmasına qarşı qanun çərçivəsində həbs edilib. Z.Hacıyeva pulların mənimsənilməsində günahlandırılıb, daha sonra o, istintaq təcridxanasında saxlanıb. Lakin 500 min funt-sterlinq girov müqabilində sərbəst buraxılıb. Hazırda Z.Hacıyeva Londondakı evində yaşayır, şəhərdən çıxması qadağandır və hər gün polisdə qeydiyyatdan keçir.

London Ali Məhkəməsi Böyük Britaniyanın Milli Cinayət Agentliyinin (NCA) tələbi ilə Z.Hacıyevanın 15 milyon funt-sterlinqlik “Knightsbridge” malikanəsini, 11 milyon funt-sterlinq dəyərində qolf klubunu, təxminən 50 milyon dollara və zinət əşyalarına başa gələn “Gulfstream” təyyarəsini müsadirə edib.

Bu ilin iyun ayında Vestminster Magistrat Məhkəməsində Böyük Britaniya Milli Cinayət Agentliyi tərəfindən qanunsuz yolla əldə edilmiş pulların leqallaşdırılmasına dair Z.Hacıyevaya qarşı açılan cinayət işinin məhkəməsi başlayıb.

İttiham aktında bildirilir ki, Z.Hacıyeva 2009-cu ildən 2015-ci ilə qədər Azərbaycan Beynəlxalq Bankından 97 milyon ABŞ dolları (76 milyon funt-sterlinq) oğurlamaqla məşğul olan 37 nəfərdən ibarət mütəşəkkil cinayətkar qrupun üzvü olub.

Əslində, həm ittiham aktından, həm də Z.Hacıyevadan müsadirə olunan mülklərin və əşyaların məbləğindən aydın görünür ki, burada “çirkli pulların yuyulması” əməliyyatı var və həmin vəsaitlərin mənbəyi şübhəlidir. Çünki Z.Hacıyeva indiyə kimi böyük bizneslə məşğul olmayıbsa, onda bu qədər pul onda hardandır?

  • Fərhad Mehdiyev: “Onun əmlakı ilə bağlı müsadirə qərarı çıxarılacaqsa, onda Azərbaycan mütləq həmin mülklərin satılıb ölkəmizə verilməsini tələb edəcək”

Beynəlxalq hüquq üzrə professor Fərhad Mehdiyev “Bakı-Xəbər”ə açıqlamasında bildirdi ki, burada vəziyyət bir qədər fərqlidir: “Z.Hacıyeva ilə bağlı ekstradisiya qərarının çıxarılmaması o demək deyil ki, onun cinayətləri tamamilə bağışlandı. Bildiyim qədərilə, Z.Hacıyeva ilə bağlı oranın məhkəməsində iki işə baxılır. Biri ekstradisiya ilə, digəri isə əmlakının müsadirə edilməsilə əlaqəlidir. Məhkəmənin çıxardığı qərar onun ekstradisiya olunmaması ilə bağlıdır. Onun ekstradisiya edilməməsi ilə bağlı irəli sürülən səbəblərdən biri o idi ki, ona irəli sürülən ittihamda guya siyasi motiv əlamətləri var. Bu xüsusda onun həyat yoldaşının yüksək postda çalışması və hazırda ağır cəzaya məhkum edilməsi əsas götürülüb. Yəni Avropada belə tələblərə ciddi yanaşırlar. Z.Hacıyevanın müdafiəçiləri bu amili qabartmaqla, onun ekstradisiyasını saxlamağa nail olublar. Çünki burada bir insanın cinayət törədib-törətməməsi rol oyanamır. Əsas kimi Z.Hacıyevanın təqibə məruz qala biləcəyi götürülür. Z.Hacıyeva ilə bağlı əsas ittiham isə hələ qalır. Ona baxılmayıb. Həmin işdə söhbət “çirkli pulların yuyulması”ndan gedir.  Belə bir iş İngiltərənin praktikasında ilk cinayət işidir. Bu səbəbdən də İngiltərə mediası prosesi xüsusi nəzarətdə saxlayır. Maraqlı olan məsələ həmin işin necə həll edilməsidir. Çünki söhbət külli miqdarda vəsaitdən gedir. Təbii ki, hər bir ölkə istəyər ki, həmin pul özündə qalsın. Ancaq ortada konkret faktlar və dəlillər var. Yəni Z.Hacıyeva heç vaxt o qədər pulu qazana bilməzdi. Onun əmlakı ilə bağlı müsadirə qərarı çıxarılacaqsa, onda Azərbaycan mütləq həmin mülklərin satılıb ölkəmizə verilməsini tələb edəcək. Bunun üçün əlimizdə kifayət qədər hüquqi əsas da var”.

Məhəmmədəli QƏRİBLİ

Son xəbərlər