Ali Məhkəmədə "Azadlıq" qəzeti, "Azadlıq" radiosu, "Azərbaycan saatı" proqramı, “Turan TV” və “Meydan TV”nin saytlarına blok qoyulmasını nəzərdə tutan qərarla bağlı verilən kassasiya şikayətinə baxılıb. Bildirilir ki, hakim Ələsgər Əliyevin sədrliyi ilə keçirilən prosesdə qəbul edilmiş qərara əsasən, saytlara blok qoyulması ilə bağlı qərar ləğv edilərək yenidən baxılması üçün Bakı Apelyasiya Məhkəməsinə göndərilib.
Qeyd edək ki, Səbail Rayon Məhkəməsi Nəqliyyat, Rabitə və Yüksək Texnologiyalar Nazirliyinin iddiası əsasında 2017-ci ilin mayında "Azadlıq" qəzeti, "Azadlıq" radiosu, "Azərbaycan saatı" proqramı, “Turan TV” və “Meydan TV”nin saytının bloklanması barədə qərar çıxarıb. Bakı Apelyasiya Məhkəməsi həmin qərardan verilən şikayəti təmin etməyib. Bakı Apelyasiya Məhkəməsinin qərarından isə Ali Məhkəməyə kassasiya şikayəti verilmişdi.
“Meydan TV”nin vəkili Elçin Sadıqlı da qərarla bağlı öz “Facebook” səhifəsində açıqlama yayıb. Vəkil deyir ki, müdafiə etdiyi resurs digər qurumlardan ayrılaraq təkbaşına şikayət edib:
“Ali Məhkəmə 10 sentyabr 2019-cu il tarixli (sədrlik edən hakim Ələsgər Əliyev) qərarıyla “Meydan TV”nin bloklanması işi ilə bağlı verdiyi kassasiya şikayətini təmin edib. Bakı Apelyasiya Məhkəməsinin iş üzrə qəbul etdiyi qətnamə tamamilə ləğv edilərək, iş yenidən baxılması üçün Bakı Apelyasiya Məhkəməsinə qaytarılıb. Ali Məhkəmənin qərarının mətni hələ bizə verilmədiyindən, BAM-ın qətnaməsinin ləğv edilmə səbəbləri barədə məlumat verə bilmirik”.
Qeyd edək ki, Apelyasiya Məhkəməsinin saytında “Meydan TV” ilə yanaşı, “Azadlıq” radiosu “Turan TV”, “Azərbaycan saatı” və sair bloklanmış media resursları ilə bağlı Apelyasiya Məhkəməsinin qərarının ləğv olunduğu qeyd olunub. Digər saytlarla bağlı qərarın ötən il iyulun 4-də verildiyini xatırladan media hüququ üzrə ekspert Xalid Ağəliyev Ali Məhkəmənin qərarını belə şərh edib: “Meydan TV”nin bloku götürülməyib. Ali Məhkəmə resursun kassasiya şikayətini təmin edib – Bakı Apelyasiya Məhkəməsinin qərarını (həmin qərarda “Meydan TV”nin bloklanması barədə rayon məhkəməsinin qərarı qanuni və əsaslı sayılırdı) ləğv edib və Bakı Apelyasiya Məhkəməsinə deyib ki, işə yenidən bax. Ali Məhkəmənin qərarı hələ tərəflərə təqdim edilməyib, hələ bəlli deyil ki, Ali Məhkəmənin qərarı hansı əsaslara söykənir. Amma istənilən halda xoş qərardır. “Meydan TV”nin bloku o zaman götürülmüş ola bilər ki, Bakı Apelyasiya Məhkəməsi gələcəkdə Səbail Rayon Məhkəməsinin qərarını ləğv etsin. Texniki olaraq, o da mümkündür ki, Nəqliyyat, Rabitə və Yüksək Texnologiyalar Nazirliyi texniki süzgəci öz təşəbbüsü ilə qaldırsın”.
“Azadlıq” qəzetinin əməkdaşları isə bizmlə söhbətlərində bildirdilər ki, Ali Məhkəmənin qərarının onlara aidiyyəti yoxdu: “Bu qərarın “Azadlıq” qəzetinə heç bir aidiyyəti yoxdur. “Azadlıq” qəzetinin kassasiya şikayətinə 1 il əvvəl, 2018-ci ilin iyununda baxılıb. Ali Məhkəmə həmin resursun bloklanmasının qanuni olmasına qərar verib. Ali Məhkəmənin bir il əvvəlki həmin qərarı ilə bizim ölkədaxili müdafiə vasitələri tükənib. Buna görə də Avropa Məhkəməsinə şikayət edilib. Bildiyimiz qədər, həmin şikayət icraata qəbul olunub”.
Bloklanan saytlarla bağlı Ali Məhkəmənin qəbul etdiyi qərarın nə kimi perspektivi ola bilər?
Media eksperti Azər Həsrət “Bakı-Xəbər”ə açıqlamasında bildirdi ki, Azərbaycanda medianın fəaliyyəti üçün mümkün qədər liberal şərait var: “Azərbaycan hakimiyyəti bütün dövrlərdə çalışıb ki, mətbuat heç kimin, xüsusən də dövlətin müdaxiləsi olmadan sərbəst fəaliyyət göstərə bilsin. Təəssüflər olsun ki, bir sıra həmkarlarımız mətbuatdan başqa məqsədlər üçün sui-istifadə ediblər. Ölkədə çaxnaşmaya xidmət edən materialları paylaşıblar. Təbii ki, dövlət də belə bir durum qarşısında müxtəlif tədbirlər görməyə məcbur olub. Onlayn medianın geniş yayıldığı bir dönəmdə xüsusilə də xaricdən idarə olunan və Azərbaycanda daxili sabitliyi pozmaq istiqamətində fəaliyət göstərən KİV-in fəaliyyətinin qarşısının alınması zərurəti yarandı. Dövlət əlində olan bütün qanuni vasitələrdən istifadə edərək bu addımları atırdı. Amma yenə də dövlət öz böyüklüyünü göstərir. Qanunların işlədiyini bir daha sübut etmiş olur. Adını çəkdiyiniz KİV-in sərbəst fəaliyyəti üçün bir şans tanınır. Düşünürəm ki, belə bir şansı onlar dəyərləndirməlidirlər. Hansına şamil olunacaqsa, qanunvericilik çərçivəsində fəaliyyətə üstünlük verməlidirlər. Azərbaycan jurnalistlərinin peşə davranışı qaydalarına əməl etməlidirlər. Digər tərəfdən isə daxili çaxnaşmaya səbəb olacaq saxta məlumatları yaymaqdan boyun qaçırmalıdırlar. Məhkəmənin yanaşması təqdirəlayiqdir. Bu həm də bloklanması ləğv ediləcək saytların əlavə məsuliyyəti deməkdir. Onlar çalışmalıdırlar ki, bundan sonrakı fəaliyyətlərində əvvəlki səhvlərini təkrarlamasınlar”.
Məhəmmədəli QƏRİBLİ
