Ermənistanda general-polkovnik Ayk Arutyunyan özünü öldürüb. Erməni KİV-nin məlumatına görə, Kotayk vilayətinin Bcni kəndində yaşayan generalın sentyabrın 23-ü axşam evində başına tapançadan atəş açdığı bildirilir.
Ayk Arutyunyan 1999-2003-cü illərdə daxili işlər naziri, 2003-2008-ci illərdə Ermənistan Polisinin rəisi olub, 2010-2014-cü illərdə Ədliyyə Nazirliyinin Cinayət-İslah İdarəsinə başçılıq edib. Ayk Arutyunyan 2008-ci ilin mart qırğını işində əsas şahidlərdən biri idi. Qeyd edək ki, bu, Köçəryanın cinayət işi üzrə əsas şahidlərdən sayılan şəxsin ilk ölümü deyil. Arutunyan bu qəbildən olan 4-cü məmur sayılır. Uzun illər əvvəl Köçəryanın dönəmində yüksək post tutmuş Qriqoriy Sarkisov infarktdan öldü. Mart hadisələri zamanı proseslərə rəhbərlik etmiş digər iki şəxs - Qorik Akopyan və Armen Eriçyan da bir müddət əvvəl müəmmalı şəkildə dünyasını dəyişib. Bu iş üzrə əsas şahidlərdən sayılan Mikayıl Arutunyan isə Rusiya ərazisində gizlənir. Bir müddət əvvəl isə Ermənistanın təhlükəsizlik naziri bildirmişdi ki, 1 mart hadisələri ilə bağlı mühüm sənədlər nazirlikdən yoxa çıxıb. Görünən budur ki, hansısa qüvvə 1 mart hadisələrinin bütün izlərini silir və canlı şahidlərini aradan götürür. Bunda kim maraqlı ola bilər?
Elşən Mustafayev: “Paşinyana xatırladılır ki, mövqeyində israrlı olarsa, müxtəlif “sürprizlərlə” üzləşə bilər”
Ekspert Elşən Mustafayev qəzetimizə bildirdi ki, Ermənistan siyasi həyatında belə qaranlıq hadisələr çox olub: “Bu bir daha sübut edir ki, Ermənistanda hakimiyyətdə daha çox hərbi-kriminal qruplaşmalar olub. Onların izləri itirməsi, davranışları bunu deməyə əsas verir. Ermənistan parlamenti 1999-cu ildə gülləbaran edildi. Həmin hadisəni törədənlər də bir-bir aradan götürüldü. Belə məlumat yayıldı ki, guya adamlar özlərini türmədə asıblar. İndi də bu hadisə. 1 martda İrəvanda qan tökülüb. Hakimiyyət bilirdi ki, nə vaxtsa buna görə cavab verilməlidir. Buna görə də bütün izləri təmizləməyə çalışıb. Adları çəkilən şəxslərin çoxu köhnə hakimiyyətin dönəmində öldürülüb. Yəni mahiyyət etibarilə Sarkisyan hakimiyyəti də elə Köçəryanla eyni idi. Yəni onların bir-birinin sifarişini icra etməsi mümkündür. Dövlət qurumlarından həmin hadisələrə aid sənədlərin oğurlanması da köhnə hakimiyyətin zamanında baş tuta bilərdi. İş üzrə əsas fiqurantlardan olan Arutunyanın özünü öldürməsində də maraqlı məqam var. Bildirilir ki, o, ucqar kənddə özünü güllələyib. Böyük ehtimalla onu da aradan götürüblər. Bu qətl, təbii ki, Paşinyana lazım deyil. Əksinə, Paşinyanın işini çətinə salmış olur. Bütün bunlardan o nəticəni çıxara bilərik ki, həmişə olduğu kimi, hazırda da Ermənistanda dövlət, qanunlar formal xarakter daşıyır. Əsasən mafiya qanunlarının hakim olduğu yerlərdə belə hadisələr baş verə bilər. Bu həm də Paşinyana verilən bir mesajdır. Demək istəyirlər ki, Köçəryanı həbsdən buraxmaq lazımdır. Paşinyan belə mesajı siyasi cəhətdən də alıb. Putinin türmədə olan sabiq prezidenti iki dəfə təbrik etməsi də bu qəbildən olan ismarıc sayıla bilər. Paşinyana xatırladılır ki, mövqeyində israrlı olarsa, müxtəlif “sürprizlərlə” üzləşə bilər”.
Məhəmmədəli QƏRİBLİ
