Nyu-Yorka səfəri çərçivəsində Ermənistanın Baş naziri Nikol Paşinyan BMT Baş katibi Antoniu Quterrişlə görüşüb. Tərəflər bir sıra məsələləri müzakirə ediblər.
BMT Baş katibi Ermənistanın Baş nazirinin Baş Assambleyanın 74-cü sessiyasında iştirakını alqışlayıb. Quterriş BMT-nin Ermənistanda baş verən prosesləri izlədiyini, ölkədəki demokratik inkişafı alqışladığını və erməni xalqına irəliləyişdə kömək etməyə hazır olduğunu qeyd edib.
Öz növbəsində, Paşinyan da Ermənistanda gedən prosesləri Quterrişə tərifləyib. Onun sözlərinə görə, Ermənistanın yeni hökuməti guya insan hüquqlarının qorunmasına, qanunun aliliyinin təmin olunmasına, məhkəmə sisteminin islahatına, korrupsiyaya qarşı mübarizəyə, bərabər imkanların təmin olunmasına yönəlmiş geniş islahatlar paketini həyata keçirmək niyyətindədir. Bu məsələdə Ermənistan beynəlxalq tərəfdaşların dəstəyinə böyük əhəmiyyət verir.
Bir sözlə, tərəflər bir sıra məsələlər, o cümlədən, Dağlıq Qarabağ problemi ilə bağlı fikir mübadiləsi aparıblar. Ancaq çox qəribədir ki, Paşinyanla görüşü zamanı Quterriş Ermənistanın BMT-nin Təhlükəsizlik Şurasının Dağlıq Qarabağla bağlı qəbul etdiyi 4 qətnaməni nəyə görə yerinə yetirmədiyi barədə Baş nazirə sual verməyib. Hansı ki, bunun özü BMT kimi bir quruma ən böyük hörmətsizlikdir. Yaxşı olardı ki, BMT Baş katibi bu məsələ ətrafında Paşinyanla fikir mübadiləsi aparsın. Bunun baş verməməsi bir daha onu göstərir ki, BMT-nin qeyri-ciddi bir quruma çevrilməsi danılmaz reallıqdır. Zatən, bu təşkilatın öz qərarlarına sahib çıxmaması qurumu nüfuzdan salıb.
“...belə bir təşkilatın mövcudluğu, əslində, yox kimidir”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə rakursdan yanaşdı: “Əvvəla Ermənistan Baş nazirnin BMT Baş katibi ilə görüşü bu təşkilatın adına yaraşmır. Bu, BMT üçün utancverici bir haldır. Çünki bir ölkə BMT-nin dörd qətnaməsini uzun illərdir yerinə yetirmirsə, demək, bu ölkəyə qarşı sanksiyalar tətbiq edilməlidir. Ancaq bu baş vermir. Bununla belə, BMT Baş katibi sözügedən qətnamələrin yerinə yetirilməməsini görməzdən gələrək işğalçı ölkənin rəhbəri ilə görüşür. Göründüyü kimi, artıq diplomatiyada xoş məram və zəiflik olmur. Azərbaycan sabah hərbi əməliyyatlara başlasa, Ermənistan çökəcək. Bunun da məsuliyyəti BMT-nin üzərinə düşür. Bu cür mötəbər bir qurum adi kiçik bir ölkəyə qarşı tədbir və ölçü götürmürsə, belə bir təşkilatın mövcudluğu, əslində, yox kimidir. Hesab edirəm ki, Azərbaycan bir daha BMT Baş katibinə məktub göndərməli və ondan Ermənistanın niyə qətnamələrə əməl etməməsini soruşmalıdır. Ermənistana beynəlxaq təzyiqlər olmasa, işğal faktorlarına beynəlxaq birlik göz yumsa, analoji hal digər regionlarda da baş verəcək. Ona görə də işğalçı ölkə başçılarının BMT-yə buraxılmaması lazımdır”.
Vidadi ORDAHALLI
