Məlum olduğu kimi, Azərbaycan Müdafiə Nazirliyi sentyabrın 22-də cəbhəboyu zonada yerləşən hərbi hissədə əsgər Abdulrəhmanov Ramin Şövkət oğlunun yolu azaraq düşmənlə üzbəüz mövqelər arasındakı ərazidə ermənilər tərəfindən vurulması ilə bağlı məlumat yaymışdı. Ermənistan tərəfi isə yaydığı məlumatda Azərbaycan Ordusu tərəfindən həyata keçirilən diversiyanın qarşısının alındığını bildirmişdi.
Sentyabrın 23-də Beynəlxalq Qızıl Xaç Komitəsinin (BQXK) vasitəsilə əsgərimizin nəşi təmas xəttindən çıxarılıb və dəfn olunub.
Qeyd edək ki, əsgərin nəşi neytral ərazidən götürüləndən sonra Ermənistanın müdafiə naziri David Tonoyan əvvəlki bəyanatına düzəliş etməli olub. O, rəhbərlik etdiyi qurumun Azərbaycan Ordusunun diversiyasının qarşısının alınması ilə bağlı bəyanatını şübhə altına alıb. Tonoyan jurnalistlərə verdiyi açıqlamasında neytral ərazidə şəhid olan Azərbaycan əsgərinin azmaq ehtimalını istisna etməyib.
Erməni nazir hadisəyə dəqiq qiymətin yalnız aparılan araşdırmalardan sonra veriləcəyini deyib.
Göründüyü kimi, Tonoyan bir hadisə ilə bağlı iki fərqli və kökündən ziddiyyətli olan mövqelər ortaya qoyub. Onun bu çaşqınlığı nə ilə bağlıdır?
“Bu çıxılmaz durumdan yaxa qurtarmaq üçün onlar realda nə var, onu deməyə məcbur olublar”
Ehtiyatda olan polkovnik-leytenant, hərbi ekspert Daşdəmir Əliyev “Bakı-Xəbər”ə açıqlamasında bildirdi ki, bunun özü Ermənistan ordusundakı vəziyyətin bərbad olduğunu sübut edir : “İşğalçı ölkənin müdafiə naziri D.Tonoyan ilk açıqlamasında deyirdi ki, Azərbaycan tərəfinin diversiya qrupunun sayının 10-dan çox olması və onların cəhdləri videokameralarla qeydə alınıb. Sonra isə D.Tonoyan jurnalistlərə müsahibəsində Azərbaycan tərəfinin niyə belə “təxribat” cəhdinə əl atdığını və hadisənin vaxtını dəqiq deyə bilməyəcəyini, onların azmış ola biləcəklərini qeyd etdi. Deməli, bu qənaətə gəlmək olar ki, Tonoyan əvvəlki gündən faktlara söykənərək danışmayıb. O yalnız yuxarıda qeyd olunan diqtəyə əsasən mövqe bildirib. Çünki həmin təxribat çox həssas dönəmə təsadüf edirdi. XİN rəhbərlərinin görüşü ərəfəsində belə təxribata əl atmaq birbaşa danışıqlar prosesini pozmaq anlamına gəlir. Ermənistan baş vermiş hadisəyə həm beynəlxalq qurumların, həm də Azərbaycanın sərt reaksiyasını görəndən sonra mövqeyini dayişməyə məcbur olub. Bilir ki, ondan “diversiya qrupu”na aid videogörüntülər tələb edəcəklər. Bu çıxılmaz durumdan yaxa qurtarmaq üçün onlar realda nə var, onu deməyə məcbur olublar və faktiki olaraq, Azərbaycanın haqlı olduğunu deyiblər. Hərbi nöqteyi-nəzərdən də onların dedikləri cəfəngiyyata oxşayır. Çünki işğalçı ölkə qeyd edirdi ki, guya həmin qrup saat 17 radələrində diversiya törətməyə cəhd edib. Elə vaxtın elan olunmasında məlumatın yalan olduğu üzə çıxır. Hərbçilər gözəl bilirlər ki, adətən, kəşfiyyat hərəkətləri gecə, səhərin açılmasına az qalmış vaxtda, əlverişsiz hava şəraitlərində həyata keçirilir. Buradan bir daha aydın olur ki, Ermənistanın həm siyasi, həm də hərbi rəhbərliyi müharibə mövzusunda reallıqlardan daha çox, daxili situasiyaya uyğun açıqlamalar verirlər. Tonoyanın özünün istefası ciddi şəkildə tələb edilir. Əslində, heç mən ora neytral ərazi deyilməsinin də tərəfdarı deyiləm. Çünki əsgərimiz işğal olunmuş Azərbaycan torpağında öldürülüb. Hansı səbəbdən öldürüldüyünə baxmayaraq, bunun bilavasitə məsuliyyəti ermənilərin üzərindədir. Ümid edirəm ki, ordumuz tezliklə günahsız yerə öldürülən hərbçimizin qisasını yerdə qoymayacaq”.
Məhəmmədəli QƏRİBLİ
