Son vaxtlar sosial şəbəkələrdə maraqlı ab-hava hökm sürür. Hamının radikal müxalif gəncliyin nümayəndəsi kimi tanıdıqları gənclər ayrı-ayrılıqda AXCP-ni sərt tənqid edirlər. Söhbət bir vaxtlar elə AXCP və onun lideri Əli Kərimlinin gəncliyə mübarizlik örnəyi olaraq göstərdiyi İlkin Rüstəmzadə, Qiyas İbrahimli, Emin Milli kimi adamlardan gedir.
Bildiyimiz kimi, hər üç gənc həbs həyatı yaşayıb. Həbsdə olduqları dönəmdə AXCP onları sırf siyasi motivlərə görə həbsə salınan şəxslər kimi müdafiə edib. Bir müddət əvvəl həbsdən çıxan Qiyas və İlkin hazırda sərt şəkildə AXCP-ni tənqid edirlər. Ən əsası da onların 28 sentyabr mitinqini təyin etməklə doğru addım atmadıqlarını yazırlar. Bir neçə gündür AXCP-nin troll maşını fərqli mövqe sərgiləyən və əvvəl qürur duyduqları bu gəncləri linç edir. Müxalif gəncliyin AXCP və Əli Kərimliyə qarşı bəslədikləri antipatiyanın səbəbini nə ilə izah etmək olar?
Məhərrəm Zülfüqarlı: “Dediyiniz gəncliyin nümayəndələri həbsxanaya düşəndə onların hadisələrə kənardan baxmaq üçün, baş verənləri təhlil etməyə kifayət qədər vaxtı olur”
İctimai Problemlərin Tədqiqi Assosiasıyasının rəhbəri, professor Məhərrəm Zülfüqarlı “Bakı-Xəbər”ə açıqlamasında bildirdi ki, bunun bir neçə səbəbi var: “Birinci səbəbi hakimiyyətin güclü olması ilə bağlıdır. İkincisi isə siyasi partiyaların ideologiya üzrə formalaşmaması ilə əlaqədardır. AXC vaxtilə hərəkat olub. Orada bütün siyasi oriyentasiyaların təmsilçiləri təmsil olunurdu. Partiyalaşma gedəndə də həmin adamların çoxu qaldı. Sonra yaranan partiyalara da nəzər salanda məlum olur ki, üzvlərin çoxu ora ya yerliçilik, ya da qohumluq prinsiplərinə görə toplanıb. Son vaxtlar bu hadisələr həm də ona görə çox baş verir ki, müxalifət cəbhəsində bir-birinə çoxlu qısqançlıq var. Bunların ənənəsi belə qoyulub. Hələ 90-cı illərdən həmin partiyalar öz nəzarətlərində olan qəzetlərdə ana müxalifətin kim olması istiqamətində mübarizə aparırdılar. Həmin ənənədən bunlar imtina edə bilmirlər. Rəhmətlik Şəhriyarın belə bir fikri var. Deyir ki, yer bərk olanda öküz-öküzdən inciyir. Bunlar bir-birini söyməklə önə çıxmaq istəyirlər. Dediyiniz gəncliyin nümayəndələri həbsxanaya düşəndə onların hadisələrə kənardan baxmaq üçün, baş verənləri təhlil etməyə kifayət qədər vaxtı olur. Əvvəlki illərdə həbsə düşən gənclərin də hamısı radikallardan imtina edib. Çünki əksəriyyəti görüb ki, onları bir vaxt qızışdıranlar heç onlara bir çörək alıb göndərməyiblər də. Bir də dediyiniz gənclərin çoxu müxalif olsalar da, hadisələrə ideoloji baxışları fərqlidir. Ancaq görürsünüz ki, ənənəvi müxalifət, xüsusilə də AXCP onları qəbul etmir. Yeganə çıxış yolunu onlara satqın damğası vurmaqda görürlər. Bu, doğru yanaşma deyil. “Kim bizim kimi düşünmürsə, deməli, satqındır” yanaşması bolşeviklərdə olub”.
Məhəmmədəli QƏRİBLİ
