2020-ci ildə Ermənistanda uşağın doğulmasına görə verilən birdəfəlik müavinət məbləği 6 dəfə artırılacaq. Erməni saytlarının yaydığı məlumata görə, bu barədə jurnalistlərə açıqlamasında Ermənistan Baş nazirinin müavini Tiqran Avinyan bildirib.
Hökumət rəsmisinin sözlərinə görə, 2020-ci ilin yanvar ayından etibarən ilk uşağın doğulmasına görə verilən birdəfəlik müavinət 6 dəfə artırılaraq 50 min dramdan (təxminən 103 dollar) 300 min drama (600 dollar) çatdırılacaq. İkinci uşağın doğulmasına görə verilən birdəfəlik müavinət də 150 min dramdan (306 dollar) 300 min drama (600 dollar) qədər artacaq.
Kənd yerlərində isə bu fərqli olacaq. Uşaq iki yaşına çatanadək ona hər ay 25,5 min dram (53 dollar) ödəniləcək. Həmçinin, 2020-ci ildən etibarən erməni dövləti uşağın doğulduğu ailələrə birdəfəlik yardım göstərəcək, onları ipoteka ilə təmin edəcək.
T.Avinyan bildirib ki, bütün belə tədbirlər həm də ölkədə artımın stumullaşdırılması məqsədilə edilir.
O da məlumdur ki, bu gün demoqrafik böhranla qarşılaşan ölkələrdən biri də Ermənistandır. Ermənistan əhalisi sürətlə azalır. Rəsmi statistikaya əsasən, 2016-cı ildə Ermənistanda 40.592 körpə dünyaya gəlibsə, 2018-ci ildə bu rəqəm 36.502 olub. Gənclərin, xüsusən də kişilərin nikaha girməkdə həvəsli olmadığı Ermənistanda doğum həddinin artımını gözləmək sadəlövhlük olar. Ermənistanın zəif iqtisadiyyatı gənclərdə və kişilərdə özünə inamı azaldır və onlar bu şərtlər altında ailənin minimal tələbatını ödəyə bilməyəcəklərini düşünürlər. Son 20-30 il ərzində ailələr bir neçə uşaq sahibi olmaq istəmədikləri üçün də əhali sayında azalma var. Ölkədə demoqrafik balansın pozulması səbəblərindən biri də gənclərin miqrasiyasıdır.
O baxımdan nə dərəcədə realdır ki, Ermənistanda uşağın doğulmasına görə verilən birdəfəlik müavinətin 600 dollara çatdırılması bu problemi həll edəcək?
“Nəzərə almaq lazımdır ki, hazırkı dövlət büdcəsi ölkənin sosial ehtiyaclarını ödəmək iqtidarında deyil”
Məsələyə münasibət bildirən millət vəkili Aydın Mirzəzadənin sözlərinə görə, bu kimi addımlarla Ermənistanda əhali artımını stimullaşdırmaq mümkün deyil: “Ermənistanda indiki hakimiyyət əhalinin sürətlə azalmasından çox narahatdır. Bu baxımdan əhali artımını stimullaşdırmaq üçün müxtəlif variantlardan istifadə edirlər. Sözügedən növbəti addım da gənc ailələri həvəsləndirməkdən ötrüdür. Ancaq məsələ ondadır ki, gənc ailə sonradan həmin uşağı nə ilə böyüdəcək? Uşağın səhiyyə məsələləri necə həll olunacaq? Yetkinlik yaşına çatanda iş tapa, ölkəsində normal yaşayış qura biləcəkmi? Bütün bu suallar açıq qalıb. Ona görə də gənc ailələr imkan daxilində Ermənistandan kənara köçməyə üstünlük verirlər. Düşünmürəm ki, sözügedən birdəfəlik yardım əhali artımını stimullaşdırsın. Bu kimi addımlar onları xilas edə bilməyəcək. Nəzərə almaq lazımdır ki, Ermənistanın hazırkı dövlət büdcəsi ölkənin sosial ehtiyaclarını ödəmək iqtidarında deyil”.
Vidadi ORDAHALLI
