“Qarabağ klanı”nın bir çox üzvlərini həbsə atdıran Ermənistanın baş naziri Nikol Paşinyan bu dəfə diqqəti hakimiyyətinə mane ola biləcək digər şəxslərə yönəldib. Erməni mediası yazır ki, Paşinyan üçün indi əsas təhlükə komandasının üzvləri, eləcə də ölkənin siyasəti həyatına hələ də müəyyən təsir gücü olan kilsədir.
Qeyd edək ki, əslində, kilsəyə qarşı da müəyyən addımlar atacağının ilkin anonsunu artıq Nikol Paşinyan Los-Ancelesdə keçirdiyi mətbuat konfransında bəyan edib. Burada baş nazir bildirib ki, Ermənistan xalqı hökumətin ümumerməni kilsəsinin daxili işlərinə qarışmağı tələb edərsə, hakimiyyət təcili olaraq bunu müzakirəyə çıxarıb uyğun addımlar atacaq. Onun sözlərinə görə, Ermənistan hökumətinin liberal siyasətini bəzi siyasi qüvvələr zəiflik kimi dəyərləndirir: “Bu səhv yanaşmadır. Bu hal artıq bəzi ruhani dairələrdə də müşahidə edilməkdədir. Bizim kilsənin daxili işlərinə müdaxilə etməyəcəyimiz barədə dediklərimizi “kilsədəkilər” zəiflik kimi qiymətləndirir. Onlar çox sərt əks-zərbə alıb, birbaşa və dolayı olaraq diz çökəcəklər. Təkrar xəbərdarlıq edirəm, bizim təbəssümümüzü və hörmətimizi kimsə zəiflik hesab etməsin”. Bütün bunlar yaxın tezlikdə Paşinyanın kilsəyə qarşı inzibati resursları işə salacağını deməyə əsas verir.
Paşinyan komanda üzvlərindən özü üçün təhlükəli saydığı şəxslərin də sıradan çıxmasından ötrü güc amilindən faydalanmağı düşünür. Bu xüsusda, artıq aydın məsələdir ki, onun hədəfində olacaq əsas şəxslərdən biri Milli Təhlükəsizlik Xidmətinin keçmiş direktoru Artur Vanetsyandır. Vanetsyanın son açıqlamaları Paşinyanı ona qarşı daha da aqressivləşdirib. Ermənistanın “Past” qəzeti etibarlı mənbələrinə istinadən yazıb: “Paşinyan Artur Vanetsyana qarşı cinayət işinin başlanmasını nəzərdən keçirməyi əmr edib. Eləcə də Futbol Federasiyası İcraiyyə Komitəsinin üzvlərinə qanuni üsulları tapmağı və Artur Vanetsyanın federasiya prezidenti vəzifəsindən kənarlaşdırılmasına nail olmağı tapşırıb.
O, Ermənistan milli komandasının Lixtenşteyn və Finlandiya komandalarını məğlub etmək, bu qrupda ikinci yeri tutmaq və nəticədə AVRO-2020-nin final mərhələsinə yüksəlmək üçün böyük şanslarının olmasından xüsusilə narahatdır. Çünki bu, təbii ki, Artur Vanetsyanın yüksək reytinqinin daha da artmasına səbəb olacaq. Paşinyan bu vəziyyəti aradan qaldırmaq üçün ətrafındakı müxtəlif siyasi qüvvələri, siyasətçiləri, iş adamları və ictimai sektorun nümayəndələri ilə bir sıra görüşlər keçirməyə təşəbbüs göstərib”.
Erməni politoloq Karen Köçəryan da bildirib ki, Paşinyan Vanetsyanı hər vəchlə sıradan çıxarmağa çalışacaq: “Əlbəttə, Vanetsyan və Paşinyan 1,5 ildir televiziya və ya “Facebook” üzərindən ünsiyyət qurmurlar, yəni onlar arasında hansısa razılaşmalar olub. İndi isə bəzi şeylər baş verir və Vanetsyan deyir ki, razılaşma pozulub”. Onun sözlərinə görə, Vanetsyan istefa mətninə əsasən siyasətə girir: “Bu şəraitdə cinayət işi açılması və ya Vanetsyanın həbs olunma mümkünlüyü istisna olunmur”. Xatırladaq ki, Paşinyan Los-Ancelesdə keçirdiyi mətbuat konfransında Artur Vanetsyanın istefa bəyanatını kəskin tənqid edib, onun zabit paqonlarını "zibil yeşiyinə atdığını" bildirib. Vanetsyan dərhal ona cavab verib, Paşinyanın hərbi işlərdən və zabit şərəfi deyilən anlayışdan xəbərsiz olduğunu bildirib. Və deyib ki, kimin yerinin zibillik olacağı hələ məlum deyil: “Zaman kimin və nəyin zibillikdə olduğunu göstərəcək. Nikol Paşinyan Los-Ancelesdə keçirdiyi mətbuat konfransında yenidən məlumatı az olan məsələlərdən danışıb. Nə vaxtadək ictimaiyyətə yalan danışıb “bizimlə olmayanlar milləti satanlardır” tezisini irəli sürəcək? Onunla razı olmayanlarla xələflərinin etdiyi kimi davranır. Mən yenə təkrar edirəm, məni əvvəlkilərlə bağlamağa cəhd etməyin”. Vanesyan Paşinyanı Konstitusiyanı bilməməkdə də ittiham edib. Bildirib ki, bu qanuna əsasən, müharibə şəraiti olmayanda baş nazir ali baş komandan səlahiyyətini daşımır: "İstefa barədə bəyanatımı oxusa, əminəm ki, nəyi nəzərdə tutduğumu anlayacaq. Ona görə də zamanın kimin və nəyin zibilliyə atacağını göstərəcəyinə əminəm”. Ermənistan Təhlükəsizlik Şurası administrasiyasının keçmiş işçisi Ara Qasparyan bildirib ki, baş verənlər ölkə daxilində ziddiyyətlərin daha da artacağının real təsdiqidir: “Ermənistanda baş verən bu dəyişikliklər hüquq-mühafizə orqanları ilə əlaqəlidir və hakimiyyət cəmiyyətlə sərt qarşıdurmaya hazırlaşır, çünki insanların həyatı dəyişməyib, hakimiyyətin həlləri yoxdur”. O qeyd edib ki, Ermənistanda yaranmış siyasi vəziyyətin qiymətləndirilməsini bir neçə cümlə ilə təsvir etmək çətindir: “Birincisi, bizim hakimiyyət dəyişikliyindən sonra əvvəlki siyasi rejim dövründən yığılıb qalmış çoxlu sayda problemlərin bir hissəsini cəld həll etmək imkanımız var idi. Digər hissəsi isə daha dərin problemlərdir, bu problemlər daha yaxşı sistemləşdirilmiş iş, olduqca ciddi sistem dəyişiklikləri və resursların cəlb edilməsini tələb edir. Siyasi vəziyyət çoxsaylı problemlərlə şərtləndirilib. Həmin problemlər öz həllini gözləyirdi, vətəndaşlarımız bu vəziyyətdən narazı idilər və küçəyə çıxdılar. Bu problemlər indi də həll edilmir. Hökumət hakimiyyət dəyişikliyi zamanı qazandığı yüksək reytinqin aşağı düşdüyünü başa düşür. Hakimiyyətin həll yolları yoxdur”. Onun sözlərinə görə, Paşinyan hökuməti erməni cəmiyyətinin gözləntilərini və probelmlərini həll etmir: “Cəmiyyət institusional islahatlar, siyasi reformalar, idarəetmənin səmərəliliyinin artırılmasını gözləyirdi, lakin biz görürük ki, bütün bunların hamısı reallıqdan uzaqdır. İnsanlar etiraz edəcəklər. Hökumət bu hadisələrə hazırlaşır və güc resurslarını öz əlində mərkəzləşdirməyə çalışır. Keçmişdə hüquq-mühafizə orqanlarının təyin olunmasında müəyyən filtrlər var idisə, indi onlar çıxarılır”. Bu vəziyyətdə indi gözləntilər bundan ibarətdir ik, kilsə, eləcə də Paşinyanın təzyiq etdiyi hakimiyyətin indiki və keçmiş üzvləri artıq baş nazirə qarşı “Qarabağ klanı” ilə birləşəcək. Elə bu da Ermənistan daxilində qarşıdurmanın daha da şiddətlənməsi deməkdir. Hətta bəzi ekspertlər bu durumda ölkədə vətəndaş müharibəsinin başlanmasını belə istisna etmir.
Tahir TAĞIYEV
