Əli Kərimlinin rəhbəri olduğu AXCP-nin sabiq sədr müavini Fuad Qəhrəmanlının ailəsi ətrafında baş verən hadisə neçə gündür medianın diqqət mərkəzindədir.
Partiya funksionerinin qızı Selcan xanım xarici ölkələrdən birinə təhsil almağa gedəndən bir neçə gün sonra öz ailələrində baş verən hadisələrlə bağlı geniş status yazdı. Cəmiyyətdə geniş rezonans doğuran həmin yazıdan sonra müxalif cameə və cəmiyyət, sözün əsl mənasında, silkələndi. Hətta hakimiyyətə qarşı radikal mövqedə olan bir çox partiyanın sədrləri, funksionerləri Fuad Qəhrəmanlını ciddi tənqid etməyə başladılar.
Ölkədə feminist mövqeyindən çıxış edənlər də bu məsələdə, birmənalı olaraq, gənc xanıma dəstəklərini ifadə etdilər.
Belə bir pressinqin olması təsadüfi deyildi. Çünki Fuad Qəhrəmanlı siyasi bir fiqurdur və onun cəmiyyət qarşısında üzərinə götürdüyü öhdəlikləri var. Nəticədə Fuad Qəhrəmanlı istefa verməli oldu. Ən maraqlısı isə bu məsələdə AXCP-nın sıravi elektoratının susqun mövqeyi oldu. Onlar mövzu ilə bağlı yalnız susmağa, bəziləri isə saxta profillərlə Fuad Qəhrəmanlının qızını yalançı çıxarmağa çalışdılar. AXCP-nin sıravi elektoratının bu davranışını nə ilə izah edə bilərik?
“Onun tərəfindən zombiləşdirilən cavanlar mövzuya bir qədər geniş aspektdən yanaşmalıdırlar”
AXCP adına iddialı olan digər partiyanın funksioneri Rəfail Becanov “Bakı-Xəbər”ə açıqlamasında bildirdi ki, bunu bir ailənin faciəsi kimi qiymətləndirmək lazımdır: “Bu ailənin başına gələn faciənin səbəbkarı kimi Əli Kərimli və onun ən yaxın çevrəsinin günahı az deyil. Burada Əli Kərimli xislətinin bir nümunəsi var. “Sabah hakimiyyətə gəlirik” deyə-deyə ətrafındakıları isterik bir vəziyyətə salıb. Belə vəziyyət, gərginlik ailələrə də təsirini göstərir. Bu hadisə ilə bağlı gedən müzakirələrdə AXCP üzvlərinin mövqeyi maraqlı oldu. Onların əksəriyyəti mövqe bildirmədi. Bu da partiyada olan avtoritarizmdən irəli gəlirdi. Qorxurdular ki, bir söz desələr, partiya sədri tərəfindən cəzalandırıla bilərlər. Hətta partiyanın troll ordusu Selcan xanımı linç etməyə qalxdı. Təbii ki, bu təsadüfi ola bilməzdi. Çünki trolları Əli Kərimlidən başqa kimsə idarə etmir. Bu, ictimai bir məsələ olduğuna görə AXCP-də olan ləyaqətli adamlar məsələyə münasibət bildirməli idi. Ancaq onlara belə göstəriş də verilib ki, maksimum məsələnin üstündən sükutla keçilməlidir. Bəlkə yaddan çıxa ümidilə bunu edirlər. Hesab edirəm ki, bu onların mənsub olduğu təşkilatın düşüncə tərzini göstərir. Daha çox diqqəti elan etdikləri 28 sentyabr mitinqinə kökləmək istəyirlər. Əli Kərimlinin avtoritarlığı həmin firqəni hələ çox uçurumlara aparacaq. Bu hadisə onlar üçün bir örnək olmalıdır. Xüsusilə də onun tərəfindən zombiləşdirilən cavanlar mövzuya bir qədər geniş aspektdən yanaşmalıdırlar. Heç bir perspektivi olmayan adamın yanında durmaqdansa, gedib öz şəxsi işləri ilə məşğul olsunlar”.
Məhəmmədəli QƏRİBLİ
