Ermənistan hakimiyyəti üçün baş bəlasına çevrilən Amulsar məsələsində Paşinyan qərar qəbul edə bilmədiyini bir daha etiraf edib. Ermənistan Baş naziri budəfəki etirafını ABŞ-da edib.
O, Los-Ancelesdə bildirib ki, bununla bağlı üzərinə ciddi basqılar və təzyiqlər var: “Bəziləri deyirlər ki, Amulsar dağdır, dünya dağılsa da, o dağ olaraq qalmalıdır. Başqa bir hissə isə deyir ki, Amulsar mütləq istismar olunmalıdır. Mən isə deyirəm ki, bu məsələdə sona qədər gedib, həqiqətin nə olduğunu ortaya qoymaq lazımdır. Görək ki, bu həqiqətən ekoloji fəlakət vəd edir, yoxsa yox? Mən bu suala de-fakto və de-yure doğru cavab almalıyam. Hətta mənim kabinetimin bəzi üzvləri otağıma girib deyirdilər ki, yatağı təcili bağlamaq lazımdır, yoxsa minlərlə adam məhv olacaq. Sonra məlum oldu ki, danışdıqlarının hamısı yalandır”.
Paşinyan bildirib ki, Amulsarın həlli həm ekoloji, həm də iqtisadi cəhətdən onun üçün vacib əhəmiyyət kəsb edir: “İstismarçı “Lidian” şirkəti də deyir ki, həmin yatağı lazım olan standartlara uyğun şəkildə işlədəcəklər. Məni daha çox narahat edən cəmiyyətin mövzuya olan radikal münasibətidir. Mənə elə gəlir ki, hökumət heç bir təzyiq altında qərar qəbul etməməlidir”.
Faktiki olaraq, Paşinyan təzyiq altında olduğunu etiraf edib. Bundan hansı nəticəni çıxarmaq olar?
“Demək istəyir ki, Amulsar mədəninin ABŞ şirkətləri tərəfindən işlənməsində maraqlı olmayan xarici qüvvələr var”
Politoloq Elşən Mustafayev “Bakı-Xəbər”ə açıqlamasında bildirdi ki, artıq bir ilə yaxındır Ermənistanda Amulsar qızıl mədəni ətrafında baş verən qalmaqal səngimək bilmir: “Ermənistanda Amulsar qızıl yatağının istismarına kütləvi etiraz aksiyaları başlayıb. Bir neçə gün əvvəl isə Cermuk şəhəri, Qndevaz və Keçut kəndlərinin sakinləri yürüş keçiriblər. Bundan başqa, Cermukda fəaliyyət göstərən mehmanxana və kurortların əməkdaşları, eləcə də məktəblilər tətil elan edərək, onlara dəstək nümayiş etdiriblər. Ötən ay Baş nazir Nikol Paşinyan Amulsar dağında mədənin işləməsinə dair əhali ilə görüşərək, onların fikirlərini öyrənib. O, ekologiya üçün ciddi təhlükə olarsa, mədəndə işin dayandırılacağına söz verib. Amma indi bu vədindən imtina etmək məcburiyyətindədir. Bu isə əhalinin kəskin narazılığına səbəb olub. Amulsar qızıl mədəninin işlənməsi məsələsi Ermənistanın ən böyük problemlərindən biri olaraq qalır. Artıq mədənin işlənməsinin böyük ekoloji problemlərə səbəb olacağından narahat olan kütlələr İrəvanda da etiraz aksiyası keçirirlər. Bu aksiyalar problemin kəskin olduğundan xəbər verir. Çünki söhbət mədənin yaxınlığındakı yaşayış məntəqələrində yaşayan on minlərlə yerli sakinin həyatından gedir. Onlar bu mədənin işlənməsinin qurbanları sayılırlar. Səbəb isə mədənin ciddi ekoloji ziyanlara səbəb olmasıdır. Bu bir daha göstərir ki, Paşinyan ölkəni idarə etməkdə çətinlik çəkir. Öz diletantlığını ortaya qoymuş olur. Çünki bir vaxtlar Amulsarın istismarının mümkünsüzlüyünü məhz o deyirdi. İndi ölkəyə pul gətirmək üçün əvvəlki mövqeyindən imtina edir. Amulsarla bağlı təzyiq altında olduğuna dair fikirləri Paşinyanın məhz ABŞ-da bildirməsi təsadüf deyil. Bununla o, ABŞ-a demək istəyir ki, Amulsar mədəninin ABŞ şirkətləri tərəfindən işlənməsində maraqlı olmayan xarici qüvvələr var. Prosesi də onlar idarə edirlər. Amulsar doğrudan da Paşinyanı ciddi dilemma qarşısında qoyub. Hətta onun hakimiyyətinə son qoya biləcək bir həddə çatıb”.
Məhəmmədəli QƏRİBLİ
