20/10/2019 19:14
728 x 90

KTMT baş katibi Zasın Bakı səfərindən sonra erməni mediasının qaralama kampaniyası qızışıb

img

Belarus Təhlükəsizlik Şurasının dövlət katibi Stanislav Zas Azərbaycana səfər edib. Onun ölkənin ali rəhbərliyi ilə görüşü olub. Qeyd edək ki, 2020-ci ilin yanvar ayından Zas həm də yeni vəzifəsinə başlayacaq. Həmin tarixdən quruma sədrlik etmək Belarusa keçdiyi üçün, KTMT-nin baş katibi Zas olacaq.

Maraqlıdır ki, Zasın Bakı səfərindən sonra erməni mediası bütün arsenalı ilə ona qarşı qara piar kampaniyasına start verib. Qeyd edilir ki, Zas Azərbaycanın qurumda lobbiçilyini həyata keçirəcək. Bunun əlamətləri kimi ermənilər Zasın vaxtilə Bakıda təhsil almasını, Lukaşenko ilə İlham Əliyev arasındakı münasibətlərin çox yüksək səviyyədə olmasını göstərirlər. Həmçinin, bildirirlər ki, guya Bakının KTMT-yə üzv olmasının qarşısını Ermənistan aldığı üçün, Azərbaycan Zas kartından maksimum dərəcədə öz xeyrinə istifadə edəcək. Hətta onu Azərbaycanın qurumdakı “səlahiyyətli səfiri” kimi də təqdim edirlər.

Erməni KİV-i etiraf edir ki, Azərbaycan bəzi qurumlara üzv olmadan da ora təsir rıçaqlarını qura bilir. Bu baxımdan da maraqlıdır, Zasın onlar tərəfindən hədəfə alınması nə ilə bağlıdır?

  • Daşdəmir Əliyev: “Bu üsulla KTMT-nin nüfuzunu aşağı salıb, acıqlarını çıxmaq istəyirlər”
Hərbi ekspert Daşdəmir Əliyev “Bakı-Xəbər”ə bildirdi ki, Ermənistanın KTMT xəstəliyinin kökündə özlərinin aldıqları zərbələr durur: “Bilirsiniz ki, Paşinyan hakimiyyətə gələndən sonra öz ölkəsindən həmin quruma təhkim edilmiş generalı həbs etdirdi. Həmin vaxt KTMT ölkələrindən ona ciddi təpkilər edildi. Hətta məlum oldu ki, Azərbaycan quruma üzv olmasa da, orada təmil olunan ölkələrlə münasibəti Ermənistanın onlarla qurulan münasibətindən qat-qat yuxarı səviyyədədir.  Azərbaycanın bu nüfuzu erməniləri ciddi narahat edir. Yalnız Zasla bağlı olan məsələ deyil. Onlar KTMT-dən Azərbaycana qarşı təzyiq vasitəsi kimi istifadə etməyə çalışdılar, amma alınmadı. Sonra Azərbaycanda rəsmi olmayan səviyyədə səslənən bir fikirdən narahat olub, hətta qurumun nizamnaməsinə dəyişikliklər də təklif etdilər. Halbuki, Azərbaycan  KTMT-yə üzv olmaqla bağlı rəsmi hansısa müraciəti etməyib. Ermənistanın irəli sürdüyü təklif KTMT-nin baş katibinin vəzifə səlahiyyətlərinə vaxtından əvvəl xitam verilməsi prosedurlarının tənzimlənməsindən ibarət olub. Ermənistanın təklifinə görə seçildiyi 3 il müddətinin başa çatmasınadək səlahiyyət müddətinə vaxtından əvvəl xitam verilən şəxsin təmsil etdiyi ölkənin nümayəndəsi seçilməlidir. Hazırda 2020-ci ilədək baş katib səlahiyyətinin müvəqqəti icraçısı Rusiyanın nümayəndəsi Valeri Semerikovdur. Daha sonra bu vəzifə Belarusa təhvil veriləcək. Ermənistan, faktiki olaraq, KTMT-yə rəhbərlik etmək imkanından məhrum edildi. Onun yerini rotasiya qaydasına uyğun olaraq Rusiya tutdu. Bilirlər ki, KTMT Azərbaycana hər hansı formada təzyiq göstərən deyil. Sadəcə, bu üsulla KTMT-nin nüfuzunu aşağı salıb, acıqlarını çıxmaq istəyirlər. Zasla bağlı bəzi uydurmaların həqiqətə yaxın ola biləcəyi təsəvvürünü formalaşdırmaq asan olduğundan, belə addım atırlar. Bakıda təhsil alması isə onların əlində ciddi “fakta” çevrilib. Bütün bunlar bir daha sübut edir ki, Ermənistanın həm də dövlət kimi siyasi etikası yoxdur. Özünün də üzv olduğu bir qurumu qaralamaqdan belə zövq alır”.

Məhəmmədəli QƏRİBLİ

Son xəbərlər