ABŞ Konqresinin Nümayəndələr Palatasının ermənilərə qulluq edən üç üzvü: Ceki Spir-Kançelyan, Cudi Çu və Frenk Pallone Ermənistana oktyabrın 1-də nəzərdə tutulmuş birhəftəlik səfərləri çərçivəsində, o cümlədən, işğal altındakı Dağlıq Qarabağa baş çəkməyə hazırlaşırlar.
Erməni mətbuatı xəbər verir ki, bunu ABŞ Konqresində baş tutmuş Amerika Erməni Qurultayının tədbiri çərçivəsində Pasadenanı təmsil edən Cudi Çu bildirib. O bildirib ki, Qarabağda vəziyyətin necə olmasına əmin olmaq üçün böyük maraqla oraya səfər etməyi planlaşdırır. Konqresmen Çunun təşəbbüsü ilə ABŞ Nümayəndələr Palatasının böyük əksəriyyəti tərəfindən təxminən bir ay əvvəl qəbul olunan atəşkəs rejimini “möhkəmləndirən” Roys-Enqel təklifinin həyata keçirilməsi 4 milyon dollar ayrılmasını nəzərdə tutur. Bu məbləğlə cəbhə xəttində xüsusi cihazlar quraşdırılacaq.
Cudi Çu, eyni zamanda, qondarma qurumun 6 milyon ABŞ dolları yardımı ilə təmin olunmasına cəhd göstərəcəyini bildirib.
Qeyd edək ki, bu günlərdə Fransa parlamentinin bir neçə üzvü qanunsuz olaraq işğal altında olan Qarabağa səfər edib və separatçı qurumun təmsilçiləri ilə görüşlər keçirib. İndi də bəzi ABŞ konqresmenləri bənzər yanlış addım atmağa hazırlaşırlar. Bu cür qanunsuz səfərlər dövlətlərarası münasibətlərə mənfi təsir edir. Sözügedən səfəri təşkil edənlərin erməni lobbisi ilə sıx əməkdaşlıq edən şəxslər olduğu məlumdur. İndi də sözügedən qanunsuz səfərə hazırlaşırlar. O baxımdan bunu ekspertlər necə dəyərləndirirlər və bunun qarşısını necə almaq olar?
“Bu cür qanunsuz səfərlər ABŞ-Azərbaycan münasibətlərinə xələl gətirə bilər”
Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, bəzi ABŞ konqresmenləri erməni lobbisindən bəsləndiyi üçün açıq formada beynəlxalq hüququ pozurlar: “Bütün hallarda, belə səfərlər qanunsuzdur. Bununla yanaşı, belə səfərlər ölkələrin qarşılıqlı münasibətlərinə, öhdəliklərinə xələl gətirir. Fransa parlament üzvlərindən sonra indi də ABŞ Konqresinin bəzi üzvləri belə bir qanunsuz addımın atılmasına hazırlaşırlar. Fransa parlamentarilərinin məlum qanunsuz səfərindən sonra Azərbaycan rəsmi olaraq bu ölkəyə etiraz notası göndərdi. İstənilən halda, belə səfərlər qəbuledilməzdir. Çünki bu, ölkələrin ərazi bütövlüyü prinsipinə hörmətsizlikdir. Beynəlxalq hüquq normaları ilə bağlı qəbul olunan bir neçə konvensiya var. Konqresmenlərin borcudur ki, həmin beynəlxalq sənədlərə hörmətlə yanaşsınlar. Xüsusən də ölkələrin ərazi bütövlüyünə hörmətlə yanaşılmalıdır. Birmənalı şəkildə Azərbaycan dövlətinin razılığı, icazəsi olmadan, işğal edilmiş ərazilərə səfər etmək qanunazidd bir əməldir. Bu cür qanunsuz səfərlər ABŞ-Azərbaycan münasibətlərinə xələl gətirə bilər. Ona görə də bəzi konqresmenlər bu barədə bir daha düşünməli və bu addımı atmaqdan çəkinməlidirlər”.
Vidadi ORDAHALLI
