Naxçıvan Muxtar Respublikası Ali Məclisinin Sədri yanında Kütləvi İnformasiya Vasitələrinin İnkişafına Dövlət Dəstəyi Fondu (KİVDF) yaradılıb. Ali Məclisin Sədri Vasif Talıbovun müvafiq fərmanı ilə Fondun müşahidə şurasının üzvləri təsdiq olunub. Naxçıvan Muxtar Respublikası Ali Məclisinin Sədri yanında Kütləvi İnformasiya Vasitələrinin İnkişafına Dövlət Dəstəyi Fondunun müşahidə şurasının üzvləri aşağıdakı şəxslərdir:
Hüseynli Ülvi Mötəbər oğlu - Naxçıvan Muxtar Respublikası Ali Məclisi Aparatının Mətbuat və ictimaiyyətlə əlaqələr şöbəsinin müdiri, Sultanova Mehriban Paşa qızı - “Şərq qapısı” qəzetinin baş redaktoru, Əliyev Rauf Feyzulla oğlu - “Şərq qapısı” qəzeti baş redaktorunun müavini,
Canbaxşıyev Səməd Canbağış oğlu - Dövlət Televiziya və Radio Verilişləri Komitəsinin İnformasiya təminatı və saytlarla iş redaksiyasının baş redaktoru, Qənbərov Qafar Tahar oğlu - “Nuh yurdu” qəzetinin redaktoru.
Çox maraqlıdır ki, bəzi millət vəkilləri və azsaylı jurnalist KİVDF-ni qərəzli şəkildə tənqid edəndə deyirdilər ki, qurum özünü doğrultmadığı üçün ləğv olunmalıdır. Ancaq, göründüyü kimi, KİVDF özünü fəaliyyəti ilə doğrultduğuna görə həmin praktikadan Naxçıvan MR-də də istifadə etmək qərarına gəlinib. Naxçıvanda KİVDF-nin yaradılması nəyin əlaməti sayıla bilər?
Azər Həsrət: “Naxçıvanda KİVDF qurulması çox təqdirəlayiqdir, hətta bunu bir qədər də gecikmiş sayıram”
Media məsələləri üzrə ekspert Azər Həsrət “Bakı-Xəbər”ə açıqlamasında bildirdi ki, Azərbaycan Prezidenti medianın inkişafı üçün əlindən gələn nə varsa, hamısını edir: “10 əvvəl KİVDF-nin yaradılması bizim ənənəvi medianı, sözün həqiqi mənasında, ayaqda saxladı. Ötən 10 ilə nəzər salsaq görərik ki, həmin qurum qarşısına qoyulan vəzifələrin öhdəsindən layiqincə gəlib. Bunun da nəticəsində Azərbaycan mediasının aparıcı vahidləri onun mövcudluğundan çox məmnundur. Bu illər ərzində külli miqdarda vəsaitin ayrılması boşuna getmədi. Nəticədə qəzetlərimiz özünü qoruyub saxlaya bildi. Bilirsiniz ki, onlayn medianın bazara girməsindən sonra qəzetlərin vəziyyəti bir qədər də pisləşdi. Onlar çox çətin vəziyyətə düşdülər. Yazılı mətbuatımızı birdən-birə belə çətinliklə baş-başa buraxa bilməzdik. Məhz KİVDF bu çətinliklərin öhdəsindən gəlməyi bacardı. Eyni zamanda, qurum jurnalistlərin sosial problemlərinin həlli istiqamətində də ciddi addımlara imza atıb. Bu baxımdan da mən KİVDF-nin özünü tam doğrultduğu qənaətindəyəm. Bəzi adamların prosesə tənqidi yanaşması da ola bilər. Ancaq bu da öz həddini aşmamalıdır. Onun lazımsız olduğunu demək üçün heç bir əsas yoxdur”.
Media ekspertinin qənaətincə, Naxçıvanda KİVDF qurulması çox təqdirəlayiqdir, hətta bunu bir qədər də gecikmiş sayır: “Naxçıvan Ermənistanla əhatə olunmuş ərazimizdir. Əhali üçün Azərbaycanın digər əraziləri ilə əlaqə saxlamaq çox çətindir. Bu baxımdan düşünürəm ki, Naxçıvana əlavə dəstəyin edilməsi yerinə düşür. Orada çox gözəl media nümunələrinin fəaliyyət göstərdiyini görürük, çoxlu sayda peşəkar həmkarımız var. Belə bir qurumun yaradılmasının oradakı KİV-in inkişafına, media işçilərinin sosial vəziyyətlərinin daha da yaxşılaşmasına müsbət mənada mühüm təsiri olacaq”.
Məhəmmədəli QƏRİBLİ
