İran qondarma “Dağlıq Qarabağ Respublikası” komandasının Tehranda keçirilən ermənilərin idman olimpiadasındakı iştirakını təkzib edir. Bu barədə məlumat İranın Azərbaycandakı səfirliyinin bəyanatında əks olunub.
Bəyanatda bildirilir ki, İranın Bakıdakı səfirliyi İslam Respublikasının rəsmi idman qurumlarından əldə etdiyi məlumata görə, qondarma “respublika”nın komandasının olimpiadada iştirak etməsinə heç bir icazə verilməyib. İran səfirliyi qeyd edir ki, bu olimpiadanın heç bir siyasi aspekti yoxdur və ondan siyasi motivlər üçün istifadə etməyə icazə verilməyəcək.
İran səfirliyinin bəyanatında qeyd olunur ki, İran İslam Respublikası Azərbaycan Respublikasının müstəqillik əldə etdiyi ilk günlərdən və çətin durumlarda həmişə qardaş Azərbaycan xalqı və dövlətinin yanında olub.
Bəyanata əsasən, İran Azərbaycanın ərazi bütövlüyünü dəstəklədiyini vurğulayır və bu siyasətində heç bir dəyişiklik etməyəcəyini qeyd edir: “İran və Azərbaycanın dostluğu əbədidir və qeyri-real xəbərlər, şayiələr iki dost və qardaş dövlətin əlaqələrinə xələl yetirə bilməz”.
Qeyd edək ki, Tehranda 15 sentyabrda start götürən 51-ci erməni olimpiadasında qondarma “DQR” komandasının iştirak etməsi ilə bağlı KİV-də məlumat yayılıb. Bununla Ermənistan daha bir təxribata imza atmış olub. Xüsusilə İranın indiki gərgin vaxtında onun yaxın qonşuları ilə arasını qızışdırmağa cəhd edib. İran bununla bağlı hansı addımları atmalıdır?
“Bunun ən başlıca ziyanı elə İranın özünə dəyir”
Klassik Xalq Cəbhəsi Partiyasının funksioneri Xəzər Teyyublu qəzetimizə bildirdi ki, İran bunlardan bir nəticə çıxarmalıdır: “Məlumat yayılanda İranın Azərbaycandakı səfirliyi belə bir olimpiadanın keçirildiyini təsdiqlədi və bunu ölkəsindəki milli azlıqların hüququ kimi dəyərləndirdi. Ancaq maraqlıdır ki, ilk açıqlamada səfirlik qondarma “DQR” komandası ilə bağlı nəsə demədi. Hətta İranın səfiri rəsmilərin tədbirdə iştirakını normal hal kimi dəyərləndirmişdi. Üstündən bir neçə gün keçəndən sonra səfirlik bu bəyanatı verdi. Hər halda, “DQR” komandasının orada iştirakının mümkünsüzlüyünü deməklə obyektivliyi qoruyublar. Düşünürəm ki, İran, ümumiyətlə, belə bir oyunları keçirməməli idi. Çünki onun tərkibində yalnız ermənilər yaşamır ki. Hətta etnik azlıq yox, etnik çoxluq kimi soydaşlarımızın da hisslərini nəzərə almalıdırlar. Tədbirin təşkilatçısı olan “Ararat” klubu Paşinyan İrana səfər edəndə ciddi təxribata əl atdı. Görüşün keçirildiyi zalda lazımsız plakat yapışdırdı, Paşinyan da gedib onun önündə foto çəkdirdi. Belə bir klubun təşkil etdiyi oyunlar, bu istiqamətdə apardığı təbliğatdan yaxşı nəsə gözləmək olmaz. Bunun ən başlıca ziyanı elə İranın özünə dəyir. Çünki bizim cəmiyyətdə yayılan ilk məlumata kəskin reaksiyalar verildi. Hətta iddia olundu ki, bir islam ölkəsi xüsusilə də Məhərrəm ayında analoji addımı atmamalı idi. İndi məlumat təkzib edilir. Ancaq çox adamların beynində həmin xəbər iz buraxdı. Yaxşı olardı ki, elə bu təxribata görə İran Ermənistandan rəsmi izahat tələb edəydi. Belə beynəlxalq təxribatın olması həm də İrana əsas verirdi ki, həmin olimpiadanı tam dayandırsın. İran bütün bu gedişatları nəzərə alıb, Ermənistanla bir qədər sərt rəftara üstünlük verməlidir. İran deyir ki, oyunlar siyasi mahiyyət daşımır. Amma ermənilər bir təxribatları ilə ona tam siyasi çalar verdilər”
Məhəmmədəli QƏRİBLİ
