Güc strukturlarının rəhbərləri bir-bir onu tərk edir – Paşinyan prosesə ayrı don geyindirməyə çalışır...

Ermənistanın Baş naziri Milli Təhlükəsizlik Xidmətinin direktoru və Ermənistan polisinin rəhbərlərinin işindən guya ki, razı deyilmiş. Bunu Baş Nazirliyin aparat rəhbəri Eduard Ağacanyan deyib.

Onun sözlərinə görə, Milli Təhlükəsizlik Xidmətinin direktoru Artur Vanesyan və Ermənistan polisinin rəhbəri Valeri Osipyan Ermənistanın Baş naziri tərəfindən vəzifələrindən azad edilib. Eduard Ağacanyan bildirib ki, Vanesyan və Osipyanın fəaliyyəti Baş naziri qane etməyib və istefaların da səbəbi budur: “Hər iki vəzifəli şəxsin fəaliyyəti baş naziri qane etmədi”.

Halbuki, hər iki məmur istefa qərarını özü qəbul edib və hətta hər ikisi də istefa qərarından sonra “zabir şərəfi” onlar üçün daha üstün olduğunu bəyan ediblər. Bu isə ona işarədir ki, erməni məmurlar Paşinyanın tapşırığının məhz zabit şərəfinə ləkə olacağını nəzərə alaraq, Baş nazirin tapşırığından və beləliklə də vəzifələrindən imtina edib, istefa veriblər.

Görünür, bu istefaların erməni cəmiyyətində rezonans doğuracağından ehtiyatlanan Paşinyan bu istefalara don geyindirməyə çalışır. Ancaq məsələ ondadır ki, bu istefalar artıq Ermənistanda yetərincə rezonans doğurub və hətta müxtəlif dairələrdə də müzakirələrə səbəb olub. Bu rezonansın və müzakirələrin erməni Baş naziri üçün heç də yaxşı nəticələr verəcəyi gözlənilmir. Əksinə, hadisələrin bundan sonra daha ciddi bir şəkil alacağı günün reallığıdır və məhz Paşinyanı da narahat edən budur. Bütün hallarda, Paşinyanın komandasında növbəti güc strukturu rəhbərlərinin istefası nə deməkdir?

• “Güc strukturları bu məsuliyyətin altına girmək istəmirlər”

Məsələyə münasibət bildirən VİP-in sədr müavini Ramil Hüseynovun sözlərinə görə, bu, Paşinyan komandasının parçalanmağa doğru getdiyini göstərir: “Paşinyanı dəstəkləyən “Mənim addımım” blokunda neçə müddətdir fikir ayrılıqları özünü qabarıq şəkildə göstərir. Bu günlərdə sözügedən blokda təmsil olunan İşıqlı Ermənistan Partiyasının üzvü Armen Babacanyan Rusiya Prezidentinə yönəlik kəskin tənqidi fikirlər söylədi. Daha sonra partiyadan istefa verdi. Bunlar onu göstərir ki, Paşinyan yarıtmaz siyasəti ilə ölkəni xaosa doğru sürükləyir. Vanesyan və Osipyanın bir-birinin ardınca istefası onu göstərir ki, Ermənistan hakimiyyəti özünü qorumaq, mühafizə etmək üçün məsuliyyəti güc strukturlarının üzərinə qoymaq istəyir. Güc strukturları da bu məsuliyyətin altına girmək istəmirlər. Paşinyan başda olmaqla, mövcud Ermənistan hakimiyyəti ictimai dəstəkdən məhrum olur. Narazılıqların dinamik şəkildə artımı, etirazların, nümayişlərin bir-birini əvəz etməsi, hər bir sahədə hakimiyyətdən narazılıqların olması onu göstərir ki, ictimai dəstəyə artıq Paşinyan komandasının ümidi yoxdur. Gör vəziyyət nə həddə gəlib çatıb ki, inqilab yoldaşı belə Paşinyanı tərk edir. Nəzərə almaq lazımdır ki, Osipyan Baş nazirin şəxsən inqilab yoldaşı olub”.

Vidadi ORDAHALLI