20/10/2019 18:55
728 x 90

Ermənilərin barışmadığı KTMT-nin belaruslu yeni katibinin Bakı səfərindən Ermənistana mesajlar...

Fikrət Sadıqov: “Gələn ildən KTMT-nin baş katibi olan Stanislav Zasın Bakıya gəlməsi və bir sıra görüşlər keçirməsi Ermənistana ciddi bir siqnaldır”

img

Xəbər verildiyi kimi, Belarus Respublikası Təhlükəsizlik Şurasının dövlət katibi Stanislav Zas Bakıda səfərdə olub. Stanislav Zas Prezident İlham Əliyevlə, Azərbaycan Respublikası Prezidenti Administrasiyasının rəhbəri Ramiz Mehdiyev və digər ölkə rəsmiləri ilə görüşüb.

Müstəqillik illərində Azərbaycan-Belarus əlaqələrinin təməlinin 1994-cü ildə dövlət başçıları Heydər Əliyev və Aleksandr Lukaşenko tərəfindən qoyulduğunu xatırladan R.Mehdiyev Azərbaycan Respublikasının Prezidenti İlham Əliyevlə Belarus Prezidentinin qarşılıqlı səfərlərinin və görüşlərinin ikitərəfli münasibətlərimizin inkişafında xüsusi rol oynadığını vurğulayıb.

Söhbət zamanı Azərbaycan Respublikası Prezidenti Administrasiyasının rəhbəri ilə Stanislav Zas arasında bundan əvvəl beynəlxalq təbirlərdə keçirilən görüşlər məmnunluqla xatırlanıb.

Məlumdur ki, Belarus KTMT-nin baş katibi vəzifəsinə Stanislav Zasın namizədliyini irəli sürüb. O bu təşkilata 2020-ci il yanvarın 1-dən rəhbərlik edəcək. Ermənistan uzun müddət onun KTMT sədri olmasına qarşı oldu. Erməni tərəfi bir ara bəyan edirdi ki, KTMT-nin keçmiş baş katibi general Yuri Xaçaturovun yerinə məhz Ermənistan təmsilçisi təyin olunmalıdır. Ancaq Ermənistanın bütün bu cəhdləri uğursuz oldu. Ən sonda Zasın KTMT-nin sədri olmasını rəsmi İrəvan təsdiq etməli oldu. Bütün bu deyilənlərlə yanaşı, S.Zasın KTMT sədri vəzifəsini icra etməzdən əvvəl Bakıya səfər etməsi Ermənistana hansısa bir mesaj sayıla bilərmi?

  • “Bu, özlüyündə, Azərbaycana bir jestdir”

Məsələyə münasibət bildirən keçmiş diplomat, politoloq Fikrət Sadıqovun sözlərinə görə, S.Zasın indiki dönəmdə Bakıya səfər etməsi Ermənistana ciddi bir siqnaldır: “Məsələ ondadır ki, Belarus-Ermənistan münasibətlərini çox yaxın və dost münasibətlər hesab etmirəm. Çünki Belarus Prezidenti Lukaşenkonun da bir sıra ifadələrindən belə nəticə çıxarmaq olar. Bu, özlüyündə, Azərbaycana bir jestdir. Azərbaycanın maraqları ilə hesablaşmaqdır. Belarus Azərbaycana yaxın olan bir dövlət kimi çox istərdi ki, ölkəmiz nəinki ikitərəfli münasibətlər çərçivəsində, hətta KTMT çərçivəsində də əməkdaşlıq etsin. Əlbəttə, bu, Ermənistanı çox qıcıqlandırır. Hesab edirəm ki, bundan sonra da çox qıcıqlandıracaq. Digər tərəfdən, əminəm ki, Belarus, Qazaxıstan, hətta Rusiya Azərbaycanın bu təşkilatda olmasına çox maraqlıdırlar. Ancaq bu heç də o demək deyil ki, biz KTMT-yə üzv olmağa çalışırıq və bununla bağlı qarşımıza məqsəd qoymuşuq. Biz, sadəcə olaraq, bir sıra dövlətlərlə münasibətlərimizi qururuq. O cümlədən, KTMT-də təmsil olunan ölkələrlə. Bütün bunlarla yanaşı, gələn ildən KTMT-nin baş katibi olan S.Zasın Bakıya gəlməsi və bir sıra görüşlər keçirməsi Ermənistana ciddi bir siqnaldır. Bu o deməkdir ki, Azərbaycana hər zaman xüsusi önəm verilir”.

Vidadi ORDAHALLI

Son xəbərlər