18/10/2019 06:08
728 x 90

Ermənistanda iki antikorrupsiya qurumu – Paşinyan “köçəryançı” hakimlərə qarşı təqibin yeni üsulunu tapıb...

Fikrət Sadıqov: “Paşinyanın guya bununla müstəqil məhkəmə sistemi yaratmaq istədiyi barədə səsləndirdiyi fikirlər əsassızdır”

img

Ermənistanda yaxın vaxtlarda iki antikorrupsiya qurumu yaradılacaq. Onlardan biri vəzifəli şəxslərin, o cümlədən, hakimlərin əmlakını qiymətləndirəcək. Bu barədə keçirdiyi mətbuat konfransında Ermənistanın Baş naziri Nikol Paşinyan bildirib.

Sözügedən məsələ ilə bağlı Paşinyan bunları deyib: “Yüksəsk Məhkəmə Şurası heyəti antikorrupsiya strategiyası hazılayıb ki, orada da vettinq prosesi təsvir olunur. Diqqətin daha çox məzmuna deyil, “vettinq” sözünə yöndəldiyini başa düşdüyümüzdən, bu sözdən istidafə etməməyə qərar verdik. Lakin mexanizmlər antikorrupsiya strategiyasında var. Yaxın gələcəkdə iki antikorrupsiya qurumu yaradılacaq. Bunlardan biri hakimlərin və digər vəzifəli şəxslərin əmlaklarını qiymətləndirəcək. Digər komitə isə başqa qurumların peşəkar bacarıqlarının qiymətləndirilməsi ilə məşğul olmalıdır”.

Paşinyan onu da qeyd edib ki, o, Ermənistanda məhkəmə sistemi ilə əlaqəli problemlərin təcili həll edilməsini aktual hesab edir. O iddia edib ki, guya bunları etməkdə məqsədi ölkədə müstəqil məhkəmə sistemi qurmaqdır: “Məqsədimiz sonda müstəqil məhkəmə sisteminə sahib olmaqdır ki, əvvəlki hakimiyyətdən asılı olan məhkəmə hakimiyyəti hökumətimizdən asılı olan məhkəmə sistemi ilə işləməsin”.

Paşinyanın, əslində, bütün bunlarda məqsədi əvvəlki hakimiyyət dönəmində mövcud olan hakimləri təmizləməkdir. Çünki sözügedən hakimlərin indiki dönəmdə müstəqil fəaliyyət göstərməsi Paşinyana sərf etmir. O istəyir ki, məhkəmə hakimləri müstəqil yox, onun iradəsinə tabe olsunlar. İstənilən vaxt siyasi hakimiyyətin sifarişlərinə uyğun qərarlar çıxarsınlar.

  • “Qarşıdakı dövrdə məhkəmələrin işinə daha çox müdaxilə ediləcəyi gözlənir”

Məsələyə münasibət bildirən keçmiş diplomat, politoloq Fikrət Sadıqovun sözlərinə görə, bütün bunları etməkdə Paşinyanın məqsədi odur ki, ona tabe olmayan, müstəqil fəaliyyət göstərən kadrları neytrallaşdırsın: “Xüsusən də məhkəmə hakimlərinin müstəqil fəaliyyət göstərməsi Paşinyanı çox narahat edir. Ona görə də məhkəmə hakimlərinə müxtəlif formada təzyiqlər edilir. Bununla bağlı müxtəlif mexanizmlər işə salınır. Bir ara Paşinyan tərəfdarlarını məhkəmələrə qarşı etiraz aksiyasına çağırdı. İndi də məhkəmələrin fəaliyyətinə nəzarətlə bağlı yeni qurum yaradır. İstənilən halda, Paşinyanın bu cür addımları qeyri-ciddi xarakter daşıyır. Sözügedən məsələdə məhkəmə hakimlərini Paşinyan özü üçün ciddi təhlükə hesab edir. Nəzərə almaq lazımdır ki, Konstitusiya Məhkəməsi Köçəryanın həbsinə qarşı çıxıb. Paşinyanın guya bununla müstəqil məhkəmə sistemi yaratmaq istədiyi barədə səsləndirdiyi fikirlər əsassızdır. O heç vaxt istəməz ki, ölkədə müstəqil məhkəmə sistemi olsun. Əvvəlki hakimlərin indi onun iradəsinə tebe olmaması Paşinyanı narahat edən başlıca məsələdir. Hesab edirəm ki, qarşıdakı dövrdə Paşinyan hakimiyyətinin məhkəmələrin işinə daha çox müdaxilə edəcəyi gözlənir”.

Vidadi ORDAHALLI

Son xəbərlər