10/12/2019 10:38
728 x 90

Ermənistan Hikmət Hacıyevin fikirləri üstündə tutarsız təbliğat oyunu qurur...

img

Ermənistan KİV-i guya Azərbaycanın KTMT-yə müşahidəçi qismində üzv olmaq istəyinin onların təkidindən sonra baş tutmadığına dair təbliğat aparır. Bu xüsusda qeyd edirlər ki, guya Azərbaycanın belə bir niyyəti olub, lakin Ermənistan diplomatiyasının “uğurlu” addımlarından sonra bu mümkün olmayıb.

Hətta Prezident Administrasiyasının rəsmisi Hikmət Hacıyevin səsləndirdiyi bəyanata da özünəməxsus rəy verməyə çalışırlar. Guya Azərbaycan əvvəl belə niyyətdə olduğunu bəyan edib və yalnız Moskvanın məsələyə müsbət reaksiya vermədiyini gördükdə bu fikrindən daşınıb. Qeyd edək ki, Azərbaycan heç vaxt rəsmi səviyyədə belə bir niyyətinin olduğunu bəyan etməyib. Həmin fikir millət vəkili Əli Hüseynov tərəfindən şəxsi fikir olaraq səsləndirilib və heç də Azərbaycanın rəsmi mövqeyini əks etdirməyib. Ermənistan KİV-i yazır ki, guya Hikmət Hacıyev bu imtinanı Azərbaycanın KTMT-yə üzv olan ölkələrlə olan ikitərəfli münasibətlərdə nə lazımdırsa, əldə edə bildiyi ilə əlaqələndirib.

Ermənilərin bu ucuz təbliğatı nəyə hesablana bilər?

  • Hatəm Cabbarlı: “Onlar bilirlər ki, Azərbaycanın qurumla ola biləcək hər hansı yaxınlaşma cəhdlərinə mane olmaq Ermənistanın siyasi iradəsi kənarındadır” 

Siyasət üzrə elmlər doktoru Hatəm Cabbarlı “Bakı-Xəbər”ə açıqlamasında bildirdi ki, Paşinyan hakimiyyətə gələndən sonra Ermənistanın Rusiya ilə münasibətlərində ciddi gərginliyin olduğunu müşahidə etmək mümkündür: “Bu gərginliyin əsası Paşinyanın məhz KTMT ilə bağlı atdığı addımından sonra başladı. Həmin vaxt Paşinyan KTMT-nin Ermənistandan olan dönəm sədrini həbs etdirdi. Bundan sonra Azərbaycanın da həmin quruma üzv ola biləcəyi ilə bağlı məlumatlar dolaşmağa başladı. Ölkəmizin  təhlükəsizlik doktrinasına baxdıqda məlum olur ki, Azərbaycan bu tip təşkilatlara üzv olmağı hədəfləmir. Bununla bağlı heç bizim rəsmi mövqeyimiz də olmayıb. PA rəsmisi Hikmət Hacıyevin bu məsələyə konkret münasibət bildirməsi erməni KİV-də geniş müzakirə edilir. Ermənilər Azərbaycanın təbii haqqı olan bir manevri edə biləcəyindən çox narahat idilər. Onlar bilməlidirlər ki, Azərbaycanın belə bir istəyi olarsa, bu, Erməənistan xaric, digər bütün dövlətlər tərəfindən məmnuniyyətlə qarşılanar. Azərbaycanın KTMT-yə üzv olan ölkələrlə münasibətləri olduqca yüksək səviyyədədir. Hətta  Ermənistanın həmin ölkələrlə münasibətlərindən daha yüksəkdədir. Azərbaycan quruma üzv olan ölkələrlə yaxın hərbi əməkdaşlıq da edir. Maraqlıdır ki, KTMT-nin nizamnaməsinə dəyişiklik ediləndə Ermənistan buna yox demədi. Oradakı dəyişikliklərdə nəzərdə tutulur ki, KTMT-də bəzi ölkələr müşahidəçilik statusu ala bilərlər. Ermənistan Azərbaycanın da ora üzv ola biləcəyindən ehtiyatlanırdısa, onda niyə həmin dəyişikliyin lehinə səs verdi?”

Politoloqun sözlərinə görə, KTMT-nin hazırda daxilində yeganə arzuolunmaz ölkə kimi Ermənistan xarakterizə olunur: “Azərbaycanın son rəsmi münasibəti bundan ibarətdir ki, hələlik ölkəmizin həmin quruma üzv olmaq kimi niyyəti yoxdur. Ancaq önümüzdəki dönəmdə bölgənin təhlükəsizliyinin təmin olunması tələb etdikdə, bu, nəzərdən keçirilə bilər. İndiki anda isə KTMT Azərbaycanın təhlükəsizlik maraqlarına tam cavab verən təşkilat deyil. Ermənistan guya  Azərbaycana KTMT-yə üzvlüklə bağlı mane olduğunu və ya gələcəkdə mane ola biləcəyini bəyan edir. Ancaq bu, Ermənistanın siyasi imkanlarını aşan bir iddiadır. Bu baxımdan da Ermənistan təbliğatının uydurduğu yalanlar heç nəyi dəyişmir, çünki reallıqdan tamamilə uzaqdır. Ermənistanın özünün potensialı elədir ki, o, KTMT daxilində əməkdaşlıq da qura bilmir. Ermənistanın bu məsələdə narahatlığı başadüşüləndir. Onlar bilirlər ki, Azərbaycanın qurumla ola biləcək hər hansı yaxınlaşma cəhdlərinə mane olmaq Ermənistanın siyasi iradəsi kənarındadır. Bu səbəbdən də öz daxili auditoriyasına hesablanan yalan informasiyalar yayırlar”.

Məhəmmədəli QƏRİBLİ

Son xəbərlər