Azərbaycanda bütün milli azlıqların öz ana dillərində təhsil alması üçün şərait yaradılıb. Ölkəmizdə yaşayan gürcülərin də ana dillərində təhsil alması reallaşdırılır. Azərbaycan dövləti ölkəmizdəki bütün məktəblərin təmir-bərpasına, eləcə də tikintisinə xüsusi diqqət yetirir. Bu gün Azərbaycanda gürcüdilli şagirdlər üçün də yeni məktəblər inşa edilərək onların ixtiyarına verilir.
Qax rayonunda gürcüdilli məktəb üçün növbəti yeni bina inşa edilərək şagirdlərin istifadəsinə verilib. Heç şübhəsiz ki, Azərbaycan dövləti bütün vətəndaşlarına eyni gözlə baxır, onların hər birinin qayğı və problemlərinin həll edilməsinə nail olur.
Ölkəmizdə gürcüdilli məktəblərin inşa edilməsi Azərbaycan-Gürcüstan münasibətlərinin daha da möhkəmlənməsinə xidmət edir. Yeri gəlmişkən, Qax rayonunda gürcüdilli məktəb üçün yeni binanın inşa edilməsinə Gürcüstanın təhsil, elm, mədəniyyət və idman nazirinin müavini müsbət reaksiya verib. Levan Xartişvili bunun hər iki dövlət üçün böyük əhəmiyyətə malik olduğunu deyib: “Azərbaycanın Qax rayonunda gürcüdilli məktəb üçün yeni binanın inşa olunmasına Gürcüstan hökuməti çox böyük önəm verir”. O qeyd edib ki, müasir tələblərə cavab verən istənilən məktəbin açılışı müsbət addımdır: "Qax rayonunun Əlibəyli kənd məktəbinin yeni binasının istifadəyə verilməsinə görə Azərbaycan Prezidenti İlham Əliyevə və azərbaycanlı tərəfdaşlarımıza təşəkkür edirik".
Nazir müavini Gürcüstan və Azərbaycan arasında sıx tərəfdaşlıq və dostluq münasibətlərinin olduğunu vurğulyaraq, bu əlaqələrə görə azərbaycanlı tərəfdaşlara minnətdarlığını ifadə edib.
Qeyd edək ki, Prezident İlham Əliyev 2018-ci il oktyabrın 29-da “Qax rayonunun Əlibəyli kəndində yeni ümumtəhsil məktəbi binasının tikintisi ilə bağlı tədbirlər haqqında” sərəncam imzalayıb. 216 şagird yerlik yeni ümumtəhsil məktəbi binasının tikintisi üçün Azərbaycan Respublikasının 2018-ci il dövlət büdcəsində nəzərdə tutulmuş Prezidentin ehtiyat fondundan Təhsil Nazirliyinə ilkin olaraq 1 milyon manat ayrılmışdı. Şota Rustavelinin adını daşıyan orta məktəbin yeni binası 2019-cu il sentyabrın 13-də istifadəyə verilib.
Məlum olduğu kimi, Gürcüstandakı Azərbaycandilli məktəblərin sayı ilbəil azalır. Azərbaycanlıların tarixən bu ölkədə kompakt yaşamasına baxmayaraq, indiyə qədər bir-iki məktəb təmir edilib, ya edilməyib. Gürcüstandakı Azərbaycan məktəbliləri əsasən köhnə məktəb binalarında təhsil alırlar. Bu məsələ dəfələrlə Gürcüstan hökuməti qarşısında qaldırılsa da, hakimiyyətdə təmsil olunan ermənilər və ermənipərəst qüvvələr buna mane olub. Sirr deyil ki, Gürcüstan hakimiyyətində təmsil olunan ermənilər bütün güclərini birləşdirərək Azərbaycan-Gürcüstan münasibətlərini pozmağa çalışırlar. Erməni təxribatının tüğyan etdiyi bir zamanda Azərbaycan hökuməti bu təxribatları heçə endirən jest etdi və Azərbaycandakı gürcüdilli məktəb üçün yeni bina inşa edib şagirdlərin ixtiyarına verdi. Bu da, bildiyimiz kimi, Gürcüstanın Təhsil, Elm, Mədəniyyət və İdman Nazirliyi səviyyəsində təqdir edildi. Azərbaycan dövlətinin Gürcüstanla əlaqələrin daha da möhkəmlənməsi istiqamətində atdığı hər bir addım erməni təxribatına vurulan bir zərbədir.
“Ermənilər çox çalışırlar ki, iki dövlət və iki xalq arasında ziddiyyət yaratsınlar, ancaq bu heç cür alınmır”
Tanınmış gürcü əsilli şair-tərcüməçi, əslən Qaxdan olan Giya Paçxataşvili bizimlə söhbətində Azərbaycan dövlətinin gürcülərin öz ana dillərində təhsil alması üçün yaratdığı şəraitin ermənilərin təxribatına böyük zərbə olduğunu vurğuladı. Azərbaycanda yaşayan gürcülərin daim Azərbaycan dövlətinin qayğısı ilə əhatə olunduğunu qeyd edən G.Paçxataşvilinin sözlərinə görə, gürcülər də hər zaman dövlətin bu addımlarını qiymətləndirirlər: “Azərbaycanda yaşayan gürcülər bu ölkənin tam hüquqlu vətəndaşları kimi bütün hüquqlardan istifadə edirlər. Bu gün Qax gürcülərinin yeni məktəb binası ilə təmin olunması müsbət hadisədir və bu, iki dövlət arasındakı münasibətlərin daha da istiləşməsinə xidmət edir. Bu gün Gürcüstandakı Azərbaycan məktəblərinə qarşı güclü erməni təxribatı var, erməni məmurlar buradakı məktəblərin sayının azaldılmasına çalışırlar. Bilirsiniz ki, Gürcüstan hakimiyyətində təmsil olunan ermənilər hər iki xalq və dövlət üçün böyük təhlükədir. Amma hesab edirəm ki, Azərbaycan Prezidentinin gürcüdilli məktəblə bağlı atdığı bu uğurlu addım erməni təxribatına vurulan sərt bir zərbə oldu. Çünki ermənilər çox çalışırlar ki, iki dövlət və iki xalq arasında ziddiyyət yaratsınlar, ancaq bu heç cür alınmır” - deyə G.Paçxataşvili vurğuladı.
İradə SARIYEVA
