İranın paytaxtı Tehran şəhərində 48-ci erməni olimpiadası keçirilir. Oyunlarda Dağlıq Qarabağda yaradılmış terrorçu rejimin yığması da iştirak edir. 10 günlük oyunlar çərçivəsində İran, Ermənistan və Gürcüstandan olan 800 erməni atlet 9 idman növü üzrə yarışacaq.
Rəsmi məlumatlarda qeyd edilməsə də, olimpiadada Azərbaycanın işğal olunmuş ərazilərində yaradılmış qondarma rejim də təmsil olunub. Olimpiya idman oyun növlərinin də daxil olduğu ümumerməni oyunları sentyabrın 20-dək davam edəcək.
Tehrandakı "Ararat" stadionunda ümumerməni oyunlarının təntənəli açılışında İran Prezidentinin köməkçisi, höccətülislam Əli Yunis və İranın Milli Olimpiya Komitəsinin sədri Kiyamərs Haşimi, Tehranın erməni yeparxiyasının nümayəndəsi arxiyepiskop Sebuh Sarkisyan, Tehranın qubernatoru Seyid Hüseyn Haşimi, İranın gənclər və idman nazirinin müavini Əbdülhəmid Əhmədi, habelə İranın Ermənistandakı səfiri Kazım Səccadi və Ermənistanın tanınmış atletləri iştirak ediblər.
İranın Azərbaycandakı səfiri Möhsün Pakayin İslam Respublikasında ermənilərin idman olimpiadası keçirməsi və qondarma “Dağlıq Qarabağ Respublikası”nın nümayəndələrinin bu yarışlarda iştirak etməsi barədə xəbərlərə aydınlıq gətirib. O bildirib ki, İranda yaşayan ermənilərin idman olimpiadasının keçirilməsi daxili bir tədbirdir və dini azlıqlara hörmət əlaməti olaraq keçirilir. Səfirin sözlərinə görə, yarışların təşkilat komitəsi Gürcüstan və Ermənistanı bu yarışlarda qonaq qismində iştirak etmək üçün dəvət edib və bunlardan başqa heç bir ölkə və ya region yarışlarda iştiraka dəvət edilməyib.
Səfir bildirib ki, hər hansı bir iştirakçı ölkənin idman geyimində başqa bir tərəfin gerbindən və ya simvolundan istifadə edilməsi təşkilat komitəsi ilə razılaşdırılmadan həyata keçirilib: “Aydındır ki, İran İslam Respublikası idmanın siyasi məqsədlər üçün istifadəsini məqbul saymır və ölkəmizin Qarabağ münaqişəsi barədə siyasəti dəyişməyib. İranın məsul şəxsləri də məhz İranda yaşayan dini azlıqlara hörmət əlaməti olaraq bu tədbirdə iştirak ediblər”.
İranın bu addımını necə qiymətləndirə bilərik?
Elşən Həsənov: “Olimpiadada qondarma “DQR” komandasının da iştirak etməsi bunu idman yarışı kontekstindən çıxarır”
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, İran səfirinin açıqlamasında bir qədər müəmmalı yerlər var: “Səfir diplomatik dillə deyir ki, bu, İranın daxili işinə aid olan məsələdir. Ancaq İran bu məsələdə yaxın qonşuluq münasibətləri və ən əsası, Azərbaycanın ona yönəlik davranışlarını ciddi şəkildə nəzərə almalı idi. Azərbaycan İrana qarşı olan heç bir tədbirdə və ya alyansda iştirak etmir. Hətta yaxın müttəfiqliyi olan ölkələrə belə bəyan edib ki, bizim ərazimizdən İrana qarşı hər hansı məqsədlə istifadə oluna bilməz. O cümlədən, bizi daha çox tellər bir-birinə bağlayır. Həmin ölkədə sayı 10 milyonlarla ölçülən soydaşlarımız var. Əgər İran belə bir tədbiri hansısa etnik azlıqlara hörmət əlaməti üçün keçirirsə, oradakı soydaşlarımız faktorunu da nəzərə almalıdır. Təbii ki, bu cür hərəkətlər onlarda qıcıq yaradır. Ən başlıcası isə, olimpiadada qondarma “DQR” komandasının da iştirak etməsi bunu idman yarışı kontekstindən çıxarır. Prosesə tam siyasi olan bir məna verir. Hər halda, İran kimi qonşu dövlət ermənilərin belə avantüralarını nəzərə almalıdır. Onların çalışdığı da budur ki, belə əməllərlə İran-Azərbaycan münasibətlərinə xələl gətirsinlər. İran rəsmiləri qətiyyən ermənilərin bu sayaq oyunlarına şərik olmamlıdırlar. Çünki bizi onlarla birləşdirən dəyərlər və amillər ermənilərdən qat-qat çoxdur. Səfir də qeyd edir ki, onların Qarabağla bağlı siyasətləri dəyişməyib. Biz bilirik ki, İran Azərbaycanın ərazi bütövlüyünü dəstəkləyir. Məhz buna görə də ermənilər belə təxribatlara əl atırlar. Bir qonşu ölkə kimi bizim bu məsələdə İrandan inciməyə haqqımız var”.
Məhəmmədəli QƏRİBLİ
