20/10/2019 18:55
728 x 90

Almaniyanın parlament sədrindən Ermənistana Qarabağ zərbəsi...

Məhəmməd Əsədullazadə: “Bundestaq sədrinin yanaşması rəsmi mövqedir və hesab edirəm ki, bu, Almaniyanın birbaşa Azərbaycana dəstəyinin ifadəsidir”

img

“Almaniya Dağlıq Qarabağ münaqişəsinin həllində beynəlxalq normaların tələb etdiyi şərtlərə sadiqdir və münaqişənin tezliklə sülh yolu və ölkələrin ərazi bütövlüyü çərçivəsində həll olunmasını istəyir”. Bunu Almaniya Bundestaqının (parlament) sədri Volfqanq Şoyble bildirib.

O qeyd edib ki, Dağlıq Qarabağ münaqişəsinin həlli regionda sabitliklə bağlı zəmanətin güclənməsi deməkdir.

Bundestaqın sədri Almaniyanın Azərbaycanla münasibətlərinə də toxunub: “Azərbaycan Almaniyanın strateji tərəfdaşıdır. Bizim, eyni zamanda, parlamentlərarası əlaqələrimiz də güclüdür. Biz yaxın zamanlarda qarşılıqlı səfərlərin sayını artırmaqla bu əlaqələri, birgə layihələrin reallaşmasını daha da gücləndirə bilərik”.

Qeyd edək ki, Almaniya Bundestaqı sədrinin rəhbərlik etdiyi nümayəndə heyəti gələn ilin əvvəlində Azərbaycana səfər edəcək. Səfər zamanı V.Şoyble Bakıda bir sıra rəsmi görüşlər keçirəcək, tədbirlərə qatılacaq.

Onu da qeyd edək ki, Almaniya ATƏT-in Minsk Qrupunun həmsədri olmasa da, qrupa üzv olan 11 dövlətdən biridir. Bundan başqa, Almaniya dəfələrlə müxtəlif səviyyələrdə Qarabağ münaqişəsində status-kvonun saxlanmasının qəbuledilməz olduğunu bəyan edib. Bununla belə, Almaniya iqtisadi baxımdan Avropa İttifaqının lokomotivi hesab edilir. Belə bir ölkənin parlament sədrinin Qarabağ münaqişəsinin həlli məsələsində ərazi bütövlüyünə xüsusi önəm verməsi Ermənistana diplomatik müstəvidə ciddi zərbədir.

Maraqlıdır, bəs ekspertlər Almaniya parlament sədrinin məlum yanaşmasını necə dəyərləndirirlər?

  • “Rəsmi Berlin dəfələrlə problemin həlli istiqamətində irəliləyişin əldə olunması üçün Ermənistana xəbərdarlıq edib”

Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə aspektdən yanaşdı: “Almaniya Avropada yeganə dövlətdir ki, səmimi şəkildə Azərbaycanın ərazi bütövlüyünə dəstək verir və münaqişənin həllində ölkəmizin yanındadır. Rəsmi Berlin dəfələrlə problemin həlli istiqamətində irəliləyişin əldə olunması üçün Ermənistana xəbərdarlıq edib. Hətta kansler Angela Merkel bu məsələdə Rusiyanı da qınayıb. Bundestaq sədrinin yanaşması rəsmi mövqedir və hesab edirəm ki, bu, Almaniyanın birbaşa Azərbaycana dəstəyinin ifadəsidir. Almaniya Minsk Qrupunun həmsədri kimi münaqişənin nizamlanmasında yaxından iştirak etməsə də, ədalətli mövqe ortaya qoyur. Qeyd edim ki, Azərbaycan daim Almaniyanın həmsədrlikdə yer almasını qabardıb. Çünki Almaniyanın əsas vasitəçilikdə olması mövqeyimizi gücləndirə bilər. Fransanın yerinə məhz Almaniya olarsa, bu, bizim maraqlarımıza cavab verər. Hesab edirəm ki, Minsk Qrupunun tərkibi dəyişməli, Almaniya Fransanı əvəz etməlidir. Çünki Fransanın mövqeyi daha da işğalçıya dəstək fonundadır. Öz neytrallığını və ədalətliyini qorumur. Azərbaycan bu məsələyə qayıtmalı və Almaniyanın həmsədrliyə gətirilməsi üçün yenidən təşəbbüs qaldırmalıdır. Qeyd edim ki, Almaniya həmsədrliyə gələrsə, Ermənistan buna etiraz edəcək. Çünki bilir ki, Almaniya ədalətin yanında olacaq”.

Vidadi ORDAHALLI

Son xəbərlər