Gürcüstanın TBC bankının təsisçisi, ölkənin ən varlı adamlarından sayılan Mamuka Xazaradze siyasi partiya təsis etmək niyyətini açıqlayıb. Onun sözlərinə görə, ilk olaraq ictimai hərəkat yaradılacaq: "Yaxın günlərdə təşkilatın təsis olunacağı yeri, tarixi və vaxtı elan edəcəyik. Daha sonra tezliklə siyasi partiya da qurulacaq".
Bankir əhalidən güclü dəstəyin olduğunu və buna görə də hərəkat və partiyanın yaradılması prosesinin sürətləndirildiyini deyib. Keçmiş baş nazir Giorgi Kvirikaşvilinin yeni siyasi birliyə qoşulacağı barədə yayılan xəbərlərə münasibət bildirən M.Xazardze onunla əlaqə saxlamadığını qeyd edib: "Giorgi Kvirikaşvili siyasətdən gedib və beynəlxalq təşkilatda çalışır".
Artıq Xazaradze Gürcüstanın Avropaya ən yaxın çıxışı olan və özünün reallaşdırdığı liman layihəsinin olduğu Anakliyadan hərəkatın fəaliyyətə başladığını elan edib. Erməni KİV-i onun siyasətə gəlişini Saakaşvili ilə müqayisə edir. Hətta Xazaradzeni Gürcüstanın yeni Saakaşvilisi də adlandırırlar. Qeyd edilir ki, bu şəxsin hakimiyyətə gəlişilə Gürcüstanın strateji kursu dəyişə bilər. Yəni iddia olunur ki, Gürcüstanın Türkiyə və Azərbaycandan olan asılılığı azaldılacaq. Xazaradzenin fəallaşması və hakimiyyətə gəlmə şansı, bu baş tutarsa, onun mümkün təsirləri necə ola bilər?
Politoloq Nəzakət Məmmədova “Bakı-Xəbər”ə açıqlamasında bildirib ki, Xazaradzenin gələcək siyasətdə kimin yanında olacağını bilmək üçün onun keçmişinə, ələlxüsus öz kapitalını hansı dövlətin hesabına qazanmasına baxmaq lazımdır: “Postsovet məkanındakı oliqarxlar öz pullarını adətən Rusiyanın hesabına qazanmışlar. Lakin bank sektorundan söhbət gedirsə, burada tək Rusiya ilə məsələ bitmir. Belə ki, Xazaradze Gürcüstanın ən böyük bankı olan TBC bankın rəhbəridir. 2014-cü ildə London Fond Birjası TBC bankı öz əməliyyatlarında iştirak etməyə dəvət edib. Lakin postsovet məkanında Rusiyanın icazəsi olmadan bir yarpağın belə düşə bilməməsini nəzərə alaraq, bu məsələdə Rusiya variantını da nəzərdən qaçıra bilmərik. Təbii ki, Gürcüstanda 2020-ci il seçkilərinə əl qoymaq istəyən qüvvələr Xazaradzeni ortaya çıxarıb. Qeyd etdiyimiz kimi, Rusiya ehtimalı zəifdir, amma istisna edilə bilməz. Bunu düşünməyə əsas verən Xazaradzenin nəhəng maliyyə kapitalına malik olmasıdır. Beləliklə, onu Rusiya meydana çıxarıbsa, İvanişvilinin və "Gürcü arzusu"nun öz nüfuzunu itirdiyini görərək, Saakaşvilinin cildində yeni bir siyasətçi meydana ataraq, Gürcüstandakı hakimiyyəti əldən verməmək məqsədi daşıyırlar. Əgər o, ABŞ, İsrail, İngiltərə siyasi texnoloqlarının hazırladığı kadrdırsa - bu ehtimal çox böyükdür, onlar artıq 2020-ci ildə seçkilərdə triumfa hazırlaşırlar və "Gürcü arzusu" dövrünü bitirib yenidən Saakaşvili dönəminə bənzəyən yeni çağ başlamaq istəyirlər. Lakin bu, Saakaşvili yox, Rusiyanın arzuladığı oliqarx, İngiltərənin arzuladığı bankir, İsrailin arzuladığı sələmçi, ABŞ-ın arzuladığı Qərbpərəst obrazlarını özündə ehtiva edən Xazaradzedir. "Gürcü arzusu"nun nümayəndəsi, parlamentin müdafiə komitəsinin rəhbəri Sesiaşvilinin yeni hərəkatı alqışlaması, Saakaşvilinin isə, əksinə, onu sərt tənqid etməsi göstərir ki, ya Rusiya 2020-ci ildə Saakaşvilinin meydana çıxıb qələbə qazanmasından narahat olduğu üçün Xazaradzeni ortaya ataraq prosesləri qabaqlayıb hakimiyyət dəyişikliyinə imkan vermək istəmir, ya da Qərbdə Saakaşvili dövrü bitib və onunla işləmək istəməyən güc - qərarqəbuletmə mərkəzləri Xazaradzenin timsalında Gürcüstanı Avrointeqrasiya yolu ilə aparacaq yeni lideri meydana çıxarmaq ehtiyacı duyublar”.
Məhəmmədəli QƏRİBLİ
