Bakı Ağır Cinayətlər Məhkəməsində Suriyada terror təşkilatlarının maliyyələşdirilməsində iştirak edən 29 yaşlı Sahil İbrahimov, 28 yaşlı İlqar Ağayev və 27 yaşlı Namiq Məmmədovun cinayət işi üzrə məhkəmə prosesi keçirilir.
Təqsirləndirilən şəxslər Azərbaycandan yarım milyon manatdan çox vəsait toplayaraq Suriyaya göndəriblər. Belə ki, təqsirləndirilən Sahil İbrahimovun qardaşı Samir İbrahimov Suriyada gedən döyüşlərdə iştirak edib. O, Suriyada olduğu müddətdə Azərbaycanda olan, əhli-sünnə məzhəbinin sələfi təriqəti üzrə ibadət edən şəxslərlə müntəzəm olaraq əlaqə saxlayıb. Bildirib ki, Suriyada İŞİD-in tərkibində döyüşən azərbaycanlıların ölkədə və xaricdə yaşayan yaxınlarıyla, eyni təriqətdən olan şəxslərlə əlaqə saxlasınlar, onların göndərdikləri pulları yığıb Suriyaya yollasınlar.
Pullar xarici ölkələrdən Bakıya, buradan Türkiyəyə, oradansa Suriyaya göndərilib. Pul göndərişləri əsasən banklar vasitəsilə həyata keçirilib. 2017-ci ilin sentyabrından 2018-ci ilin fevralına qədər Sahil İbrahimov bir neçə dəfəyə 210 min manat, İlqar Ağayev 135 min dollar, 2018-ci ilin mart-aprel aylarında isə birlikdə yenə 135 min dollar pul göndəriblər.
Azərbaycanda bankların fəaliyyətindən narazılıqların olduğu bəllidir. Əsasən onların depozitləri aşağı qiymətlə götürüb, çox yuxarı qiymətlə kreditlər verməsi, ölkə başçısı tərəfindən dollar kreditləri ilə bağlı müəyyən edilən kompensasiyaların vaxtında müştərilərə çatdırılmaması ilə bağlı olan narazılıqlar tez-tez medianın gündəmində olur. Bakıda baş tutan bir məhkəmə prosesində açıqlanan faktlardan məlum olur ki, sən demə, bəzi banklar terrorçuluğun maliyyələşdirilməsi prosesində yaxından iştirak ediblər. Ortaya çıxan faktlar nələri söyləməyə əsas verir?
Fikrət Yusifov: “İndi də belə bir hadisənin baş tutması onlarla bağlı olan mənfi təsəvvürlərin formalaşmasını daha da artıracaq”
Sabiq maliyyə naziri Fikrət Yusifof “Bakı-Xəbər”ə açıqlamasında bildirdi ki, belə halın baş verməsi doğrudan da təəssüfedicidir: “Bu cür məsələlərə birbaşa nəzarət etməli olan qurumlar var. Onlardan ən birincisi Maliyyə Bazarlarına Nəzarət Palatsıdır. Bir də maliyyə monitorinq xidməti deyilən bir təsisat var. Onların birbaşa vəzifəsinə aid olan məsələdir. Eyni zamanda, Mərkəzi Bank da öz nəzarət funksiyasını ciddi şəkildə həyata keçirməlidir”.
“Belə bir nəzarət hansı formada olmalıdır” sualına Fikrət Yusifov belə cavab verdi: “Onun araşdırma metodologiyası var. Bunu həmin qurumda oturanlar çox gözəl bilirlər. Yəni pul Azərbaycandan köçürülürsə, bunun hara, nə məqsədlə köçürülməsi də araşdırılmalıdır. Nəzarət etmək tam mümkündür. Götürək ki, fikri yayındırmaq üçün həmin pulları xaricə hansısa biznes kontraktı əsasında transfer ediblər. Onda da sübut etməlisən ki, həmin pula nə alıbsan? Sənin pul göndərdiyin adam bura həmin pulun müqabilində hansı malı göndərib? Əvvəlki illərlə müqayisədə indi nəzarət mexanizmi çoxdur və kifayət qədər də ciddiləşdirilib. Bütün bu nəzarətin gözündən yayınmaqla həmin vəsaitlər Azərbaycana gətirilib, oradan da Suriyaya göndərilibsə, deməli, burada böyük dəstəkdən söhbət gedir. Hansısa səlahiyyətli şəxslər həmin şəbəkəyə dəstək olublar”.
“Nə qədər məbləğin xaricə köçürülməsi şübhəli əməliyyat kimi nəzarətə götürülə bilər” sualına isə sabiq maliyyə nazirinin cavabı belə oldu: “Mən məbləğlə bağlı konkret nəsə deyə bilmərəm. Ancaq həmin proseslərə mütləq mənada nəzarət edilir. Barəsində söhbət açılan məbləğlər də az deyilsə, deməli, nəzarət edilməli idi”.
“Belə bir halın ölkəmizin imicinə nə kimi təsiri ola bilər” sualına cavabında Fikrət müəllim bildirdi ki, bunun daha çox bank sektorunun imicinə ciddi təsiri var: “Onsuz da bankların imici çox aşağıdır. 2015-ci ildəki devalvasiyadan sonra onlar tamamilə nüfuzdan düşüblər. Dollarla verilən kreditlər və ondan sonra yaşananlar banklardan narazılığı artırıb. İndi də belə bir hadisənin baş tutması onlarla bağlı olan mənfi təsəvvürlərin formalaşmasını daha da artıracaq”.
Məhəmmədəli QƏRİBLİ
