16/10/2019 14:17
728 x 90

AŞPA-nın iki yüksək missiyası Azərbaycandan xüsusi təəssüratlarla qayıdıb...

Elçin Mirzəbəyli: “Bütün bunlar AŞPA ilə Azərbaycan arasında münasibətlərin müsbət məcrada inkişaf etməsindən xəbər verir”

img

Avropa Şurası Parlament Assambleyasının (AŞPA) prezidenti Lilian Mori Paskye Bakı səfərinin yekunları ilə bağlı məlumat yayıb. AŞPA prezidenti Bakıya səfərinin yekunlarını yüksək qiymətləndirib. O, mürəkkəb və həssas məsələlər üzrə ən yüksək səviyyədə hakimiyyətin səmimi dialoqunu yüksək qiymətləndirib.

AŞPA prezidenti bildirib ki, iki günlük Bakı səfəri çərçivəsində bir sıra məsələləri, xüsusən vətəndaş cəmiyyətinin vəziyyəti və QHT-lərin işinin asanlaşdırılması, QHT və hakimiyyət arasında dialoqun möhkəmləndirilməsi yollarını müzakirə edib. O bununla bağlı bir sıra məqamlara toxunub: “Vətəndaş cəmiyyəti nümayəndələri ilə müzakirələr xüsusilə faydalı olub. Cəmiyyətdəki bütün baxışlar spektrini azad şəkildə ifadə etməyin mümkün olması üçün hakimiyyət və vətəndaş cəmiyyəti arasında daimi dialoq mexanizminin yaradılması haqqında düşünmək istərdim. Vətəndaş cəmiyyətinin fəaliyyətini tənzimləyən daha elastik qanun buna böyük töhfə verə bilərdi”.

Qeyd edək ki, Paskye Bakı səfəri çərçivəsində Prezident, parlamentin spikeri, xarici işlər naziri, parlament üzvləri ilə görüşüb.

Paskyedən bir qədər əvvəl Bakıda səfərdə olan AŞPA-nın Azərbaycan üzrə məruzəçisi Torhildur Sunna Evarsdottir də bənzər açıqlama ilə çıxış edib. O qeyd edib ki, onun səfəri səmərəli keçib və gələcək hesabat üçün yaxşı zəmin yaranıb. Bütün bunlar onu göstərir ki, Avropa qurumları ilə Azərbaycan arasında siyasi müstəvidə səmərəli əməkdaşlıq var və hansısa ciddi fikir ayrılığı, anlaşmazlıq yoxdur.

  • “Qurumun yeni rəhbərliyinin bu istiqamətdə müsbət meylləri nəzərə çatdırması əslində dialoq və qarşılıqlı anlaşma üçün yaxşı zəmin yaradır”

Politoloq Elçin Mirzəbəyli də hesab edir ki, bütün bunlar AŞPA ilə Azərbaycan arasında münasibətlərin müsbət məcrada inkişaf etməsindən xəbər verir: “Çox müsbət haldır ki, AŞPA prezidenti, qurumun Azərbaycanla bağlı məruzəçisi Bakı səfəri çərçivəsində bir sıra obyektiv fikirlər səsləndirib. Bu da AŞPA ilə Azərbaycan arasında indiki münasibətlərin kifayət qədər uğurla inkişaf edəcəyi perspektivindən xəbər verir. Bəzi istisnaları çıxmaq şərti ilə Azərbaycanla AŞPA arasında əksər hallarda müsbət dialoq mühiti olub. Eyni zamanda, əməkdaşlıq yüksək səviyyədə olub. Azərbaycan öz öhdəliklərinə sadiq qalan bir ölkə kimi həm AŞPA ilə, həm də qurumun ayrı-ayrı komitələri ilə yaxından əməkdaşlıq edir. Ancaq bəzi hallarda erməni diasporunun təsirinə məruz qalan siyasətçilər, Azərbaycanda korporativ maraqları olan dairələr neqativ proseslərə rəvac veriblər. Bu da qurumun elan etdiyi dəyərlərdən uzaq düşdüyünü nümayiş etdirirdi. AŞPA-nın yeni rəhbərliyinin bu istiqamətdə müsbət meylləri nəzərə çatdırması əslində dialoq və qarşılıqlı anlaşma üçün yaxşı zəmin yaradır. Ona görə də bütün bunları bir müsbət tendensiya hesab edirəm”.

Vidadi ORDAHALLI

Son xəbərlər