Uzun müddətdir yerlərindən tərpəniş edə bilməyən radikal müxalifət partiyaları yeni taktikaya üstünlük verirlər. Onlar hakimiyyətin etdikləri müəyyən jestləri, əhalinin sosial rifah halının yaxşılaşdırılması ilə bağlı atdığı addımları öz adları ilə bağlamağa can atırlar və bundan dividendlər qazanmağa çalışırlar. Məsələn, keçirdikləri mitinqlərdən sonraya təsadüf edən islahat paketlərini guya hakimiyyətin onlardan qorxub geri çəkilməsi kimi qələmə verirlər.
Bugünlərdə partiyalardan birinin təşəbbüsü ilə baş tutan “dəyirmi masa”nı hakimiyyətin qorxudan atdığı addım kimi xarakterizə edirlər. Hansı istiqamətdə xalqın xeyrinə bir addım atılırsa, radikal müxalifət onu hakimiyyətin qorxaqlığı kimi qələmə verməyə çalışır. Əslində, belə gedişatlar radikal müxalifət tərəfindən əvvələr də edilib, ancaq ortada heç bir nəticə olmayıb. Özünü cəmiyyətə əsas müxalifət kimi sırımağa çalışanlar hələ 1993-cü ildə Heydər Əliyev hakimiyyətə qayıdandan sonra da eyni çıxışları edirdilər. Onda da deyirdilər ki, hakimiyyət zəifləyir. İddia edirdilər ki, bu gün, ya da sabah bunların sonudur. Amma nə oldu? Heydər Əliyev düz iki dönəm – 10 il prezidentlik etdi. Eyni təbliğatı İlham Əliyevlə də bağlı aparırdılar.
Hələ ona da ümid bağlayırdılar ki, ölkədəki sosial problemlər etiraz kütləsinin artması üçün yaxşı fürsət ola bilər. Amma nə oldu? İlham Əliyev sosial problemləri hər keçən il daha sürətlə həll etdi. Ölkənin beynəlxalq əlaqələrini genişləndirdi. Bununla bərabər dövlətin daha nizamlı idarə edilməsi üçün çox ciddi islahatlar keçirdi. Əslində, radikal müxalifət bu uğursuz taktikalarından normal nəticə çıxarmaq əvəzinə, onu yenə təkrar edirsə, burada hansı məqsədlər güdülə bilər?
Elşən Həsənov: “Açığını deyim ki, hazırkı məqamda mən hakimiyyətin müxalifətdən qorxub hansısa addımlar atması ilə bağlı heç bir səbəb görmürəm”
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, bütün bunlar radikallar kimi təsnifatlandırılan müxalif qüvvələrin düzgün mübarizə yolu seçməməyindən irəli gəlir: “Bilirsiniz, partiya öz elektoratına hesabat vermək üçün nəsə ortaya qoymalıdır. Bunlar onu edə bilmirlər. Seçkidə uduzurlar, deyirlər ki, səsimiz əlimizdən alınıb. Onda isə məntiqlə küçələr adamla dolu olmalıdır ki, səslərini tələb etsinlər, ancaq bu da olmur. Ölkə başçısı əfv fərmanı imazlayır, bunlar çıxıb deyirlər ki, bizim qorxumuzdan bu addımı atdı. Hansısa sosial islahat aparılır, ona da eyni reaksiyanı verirlər. Bilirsiniz, belə müxaliflik etmək olmur. Müxalifət hakimiyyətin yaxşı işlərini təqdir etməlidir ki, gələcəkdə daha ciddi addımlar atılsın. Təbii ki, tənqidlər də öz yerində. Ancaq biz radikal dairələrin hər şeyi bir rəngdə gördüyünün şahidi oluruq. İqtidarın bir çox cəhətlərini biz də ciddi tənqid edirik, amma arada yaxşı işlərini də vurğulayırıq. Yəni ola bilməz ki, uzun illər ərzində hakimiyyət hansısa bir yaxşı addıma imza atmasın. Belə olsaydı, onda xalq çıxıb bunlara kütləvi etiraz edərdi. Bu, yoxdursa, deməli, hakimiyyətin xalqa uyğun yaxşı işləri çoxdur. Ucuz şoular vasitəsilə dividendlər qazanmağın vaxtı gedib. İndi yalanın üstü tez açılır. Buna görə də müxalifət də obyektiv olmalıdır. Açığını deyim ki, hazırkı məqamda mən hakimiyyətin müxalifətdən qorxub hansısa addımlar atması ilə bağlı heç bir səbəb görmürəm”.
Məhəmmədəli QƏRİBLİ
