Xaricə sığınan daha bir “mühacir” söyüş kampaniyasına qoşulduğunu bəyan edir. Təəccüblü gələn odur ki, həmin adam ilk baxışdan söyüş söyən küçə uşaqlarından fərqlənməlidir. Çünki adına hüquqşünas deyilir, uzun müddət ölkənin ictimai-siyasi proseslərində yaxından iştirak edib. Görünür, bu epitetlər onun adının önünə zorla yapışdırılıbmış. Adam sərgilədiyi mövqeyi ilə sübut edir ki, Orduxandan, Mirzəlidən, Qalibdən heç nəyi ilə fərqlənmir. Söhbət keçmiş Media Hüquqları İnstitutunun (MHİ) rəhbəri Rəşid Hacılıdan gedir.
Onun rəhbəri olduğu təşkilatın adını ona görə keçmiş kimi qeyd edirik ki, hazırda fəaliyyət göstərmir. Çünki artıq yeməyə heç nə qalmadığı üçün, Rəşid Hacılının özü xaricə qaçıb və qrant mənimsəmək üçün qurduğu təşkilatı da su satılan köşk kimi bağlayıb. Məhz medianın adı ilə milyonlarla qrantı həzmdən keçirən Rəşid Hacılı adlı məxluq indi də xaricdən cəsarət tapıb Azərbaycan jurnalistlərini toplu halında təhqir edib. Həmin təhqirin detallarına varmaq istəmirik. Hər halda, bununla Hacılı öz səviyyəsi(zliyi)ni ortya qoyub. Media adamı olduğunu elan edən bu şəxsin hər hansı bir redaksiyada çalışan vaxtına rast gələn olmayıb. Ancaq onun adı müxalif siyasi blokların yaradılması, siyasi məhbus alverində daim çəkilib.
2013-cü ildə rəsmən qondarma Milli Şuranın üzvlüyünü qəbul edib, siyasətə qoşulub. “Milli Şura” təmsilçisi qismində müsahibələri var. Öz əqidədaşları ilə tez-tez aralarında qalmaqal yaranan bu adamın hətta Bakıda olanda hakimiyyətdə müəyyən adamlara agentlik etdiyini də bildiriblər. Rəşid Hacılı hakimiyyətdəki bəzi şəxslərlə yaxın əlaqələrinin olduğunu gizlətməyib, müsahibələrində bəzi adamlarla yaxın qohum olduğunu deməklə yaxasını kənara çəkə bilib.
2015-ci ildə Rəşid Hacılının rəhbərlik etdiyi Media Hüquqları İnstitutunun bank hesabına həbs qoyuldu. Səbəb media hüquq müdafiəçiliyi adı altında qrantlar alınması və həmin qrantların təyinatı üzrə xərclənməməsi, hesabatlılığın düzgün qurulmaması idi.
Radikal müxalifətin təsiri altında olan bu şəxs bir QHT rəhbəri kimi daim öz nizamnamə məqsədlərindən kənara çıxaraq, siyasi fəaliyyətlə məşğul olmağa cəhd göstərib və yaxud ayrı-ayrı siyasi partiyaların mövqelərindən çıxış edib. Rəşid Hacılı mühacirətdə olmasına baxmayaraq, Azərbaycan xalqının, dövlətin maraqlarına da ciddi zərər vurmaqla məşğuldur. Müxtəlif instansiyalarda öz fikirlərini, daha doğrusu, dezinformasiyalarını yaymaqla R.Hacılı ölkəmizin nüfuzuna xələl gətirmək niyyəti güdür. Hadisələri təhrif edərək, müxtəlif don geyindirən bu QHT rəhbərinin fəaliyyəti imicə təsir edə biləcək qanunsuzluqla yanaşı, həm də vətəndaşlıq mövqeyinə uyğun gəlmir. Media Hüquqları İnstitutunun və onun rəhbəri R.Hacılının da xaricdəki ağalara qulluq etdiyini, Azərbaycanın nüfuzuna xələl gətirməkdə maraqlı olan xaricdəki qüvvələrin tapşırıqlarını yerinə yetirdiyini təkzib etmək mümkün deyil. Bəlli olur ki, R.Hacılı insan hüquqları sahəsinə o qədər də uzaq olmayan keçmişdə, 2006-cı ildə rəhbərlik etdiyi Media Hüquqları İnstitutu 2006-2013-cü illər ərzində Amerika fondları NED və İREX-dən, Soros Fondundan, Böyük Britaniya səfirliyindən, Avropa Şurasından və ATƏT-dən üst-üstə 1 milyon 600 min manatdan çox qrant alıb. Alınan qrantları da qurumun rəhbəri olaraq R.Hacılı rahatlıqla mənimsəyib.
QHT rəhbəri ayrılan vəsaitlərin mənimsənilməsini müxtəlif yollarla həyata keçirib. Nəticədə hesabatı elə aparıb ki, vəsaitləri ayıranların özləri də məəttəl qalıblar. Bəzən hətta əməkdaşlara bir məbləğə imza etdirib, ayrı məbləği almaq, yəni ikili maaşlar vermək kimi maxinasiyalara yol verib. Özünü hüquq institutunun rəhbəri, hüquq müdafiəçisi kimi göstərən R.Hacılının fəaliyyətində sadalanan bu qanunsuzluqlar yalnız bir neçə epizoddur. İndi görün kim-kimə lağ edir? Media adı ilə ən yağlı tikələri cinayət yolu ilə mənimsəyən bu adamın niyə narahat olduğunu bilirik. Çünki artıq görür ki, Azərbaycan mediasının ciddi nümunələri dövlətin qayğısı altındadır. Onların kursuna xaricdən gətirilən hansısa qrantlarla təsir etmək mümkün deyil. Media mühitinin sağlamalaşması ilə Rəşid Hacılının çörək ağacına zərbə dəyib. Bax, buna görə belə narahatdır, hətta tez-tez isterikaya düşüb səviyyəsinə uyğun təhqirlərə yol verməyi özünə rəva bilir.
Məhəmmədəli QƏRİBLİ
