ABŞ kəşfiyyat və antiterror məqsədləri üçün Azərbaycana 10 milyon yardım ayırır

ABŞ-ın Virciniya ştatında yerləşən və texniki xidmətlər göstərən “VSE Corp” şirkəti Azərbaycanın antiterror, antikəşfiyyat avandanlıqları ilə təmin edilməsi və yerində, ixtisaslı təlimlərin həyata keçirilməsi ilə bağlı 10,082,812 dollarlıq məbləğində müqaviləyə imza atıb.

ABŞ Müdafiə Nazirliyinin yaydığı məlumata görə, müqavilənin məqsədi Xəzər dənizində Azərbaycanın təhlükəsizliyinə dəstək verməkdir və bu, "Xarici Hərbi Alış-Satış" proqramının "Tərəfdaşların imkanlarını genişləndirməklə" alt layihəsi əsasında həyata keçirilir.

Qərara əsasən, proqramın 88 faizi ABŞ-da, 12 faizi isə Azərbaycanda həyata keçiriləcək.

Avadanlıqların nədən ibarət olduğu açıqlanmır. Məlumata görə, müqavilə Azərbaycan hökuməti üçün ABŞ-ın xarici hərbi satışlar proqramı çərçivəsində bağlanıb.

Ən nəhayət, onu da qeyd edək ki, "securityasistance" saytının bu ilin iyulunda nəşr etdiyi məlumatlara görə, ABŞ 2018-2019-cu illər ərzində Azərbaycana 101 milyon dollardan artıq hərbi yardım (avadanlıqlar, təlimlər və texniki xidmət) edib.

Dünyada elm və texnika inkişaf etdikcə, qanunsuz qruplaşmaların - terrorçuların da fəaliyyətində müasir texnologiyalardan istifadə halları artır. Bunun qarşısını almaq üçünsə dövlətlər bu qanunsuz cinayətkar qruplaşmalarla mübarizəyə milyonlarla dollar həcmində vəsaitlər xərcləyirlər. ABŞ terrordan zərərçəkmiş ölkə olaraq 2001-ci ilin sentyabr hadisələrindən sonra əməkdaşlıq etdiyi ölkələrə bu sahədə yardımlar göstərir. Azərbaycan da bu ölkələrdən biridir.

Maraqlıdır, bəs ekspertlər sözügedən məsələ ilə bağlı ABŞ-ın Azərbaycana yardım etməsini necə dəyərləndirirlər?

• Məhəmməd Əsədullazadə: “Sərhədlərimizin təhlükəsizliyi, kəşfiyyat və terrorizmə qarşı mübarizədə ABŞ ölkəmizlə sıx əməkdaşlıq edir”

Sözügesən məsələni “Bakı-Xəbər”ə şərh edən politoloq Məhəmməd Əsədullazadənin sözlərinə görə, bu ondan irəli gəlir ki, Vaşinqtonun Cənubi Qafqazda xüsusi önəm verdiyi əsas ölkə Azərbaycandır: “ABŞ-Azərbaycan əlaqələri ikitərəfli əməkdaşlıq formatında uğurla inkişaf edir. Vaşinqtonun Cənubi Qafqazda xüsusi önəm verdiyi əsas ölkə məhz Azərbaycandır. İki ölkə beynəlxalq terrorizm və təhlükəsizlik sahəsində yüksək əməkdaşlıq edir. Bir müddət bundan əvvəl Vaşinqton sərhədlərimizin yüksək səviyyədə qorunması üçün 100 milyon dollar vəsait ayırdı. İndi də 10 milyon ayırması onu göstərir ki, Ağ Evin Cənubi Qafqazda əsas strateji ortağı Azərbaycan ola bilər. ABŞ tərəfindən irəli sürülən bu hərbi yardımlar göstərir ki, Azərbaycan regionda önəmli ölkədir. Sərhədlərimizin təhlükəsizliyi, kəşfiyyat və terrorizmə qarşı mübarizədə ABŞ Azərbaycanla sıx əməkdaşlıq edir. Fikir versək görərik ki, regionda Azərbaycan Ermənistan və Gürcüstandan da irəlidədir. Vaşinqton məhz Azərbaycanla strateji əlaqələri inkişaf etdirməklə regionda mövqeyini gücləndirir. Bu hərbi yardımlar, həmçinin, ABŞ-ın “907-ci Düzəliş”inin aradan götürülməsinə gətirib çıxarar. Artıq dünyada yeni nizam formalaşır və regionumuz da burada aparıcı yerdədir. Bu kontekstdə ABŞ Azərbaycana yardım etməklə birgə fəaliyyəti genişləndirəcək”.

Vidadi ORDAHALLI