19/09/2019 17:24
728 x 90

Əlikram kimi separatçı düşmənin anti-Azərbaycan bəyanatını yayımlayan radikal müxalifətçinin TV-si...

img

Xaricə mühacir adı ilə sığınan bəzi şəxslərin ölkəmizə qarşı əsl informasiya terroru apardığı ilə bağlı məlumat vermişdik. Onların ortaya qoyduğu fəaliyyət sübut edir ki, bu adamlar hətta erməni ilə də əlbir olmağa hazırdırlar.

Qurban Məmmədov öz kanalından Azərbaycana qarşı sərgilədiyi mövqeyinə görə heç də ermənidən geri qalmayan separatçı Əlikram Hümbətovun talış xalqına növbəti sərsəm müraciətini yayıb. Kanalın şərh bölümündə də separatçı "lideri" müdafiə edən şərh yazıb. Ona olan dəstəyini və sevgisini də gizlətməyib.

Qeyd edək ki, bu hadisə ölkə daxilində böyük rezonansa səbəb olub. Hətta Q.Məmmədovun “tribunasından” tez-tez istifadə edən partiya rəhbərlərinə öz silahdaşları tərəfindən müraciət edilib ki, bir daha həmin efirdə görünməsinlər.

KXCP üzvü Oqtay Gülalıyev öz partiyasının sədrinə sosial şəbəkələr üzərindən müraciət edib: “Məsələnin dəhşətli və acınacaqlı tərəfi odur ki, özünü Elçibəyçi, Bütöv Azərbaycançı hesab edən Mirəlioğlu kimi bəziləri Əlikram kimi avantürist, separatçı bir şəxsə efir məkanı verən, ona ideoloji, siyasi dəstək nümayiş etdirən kanalın əsas söz sahiblərindəndir. O kanal ki, onun rəhbəri Q.Məmmədov Mirəlioğlunu "bir payız axşamı" inqilabının lideri, prezidentliyə namizəd elan edib (!?). Deyir dostunu mənə de, sənin kim olduğunu deyim. Deyəsən pərdə yavaş-yavaş götürülür. Kimin harada, kiminlə olduğu üzə çıxır... Ə.Hümbətov Elçibəy hakimiyyətinə, Azərbaycan dövlətçiliyinə qarşı silah qaldıran, ölkəmizin ərazi bütövlüyünün parçalanmasına, suverenliyimizin şübhə altına alınmasına birbaşa cəhd edən, özünü qondarma "Talış Muğan Respublikası"nın prezidenti elan edən, Ermənistana səfər edib ermənilərdən üzr istəyən, bir sözlə, xalqımızın, dövlətimizin maraqlarını satan separatçıdır. Görün, Mirmahmud Mirəlioğlu və onun kimilər uğrunda "mübarizə apardıqları" dəyərlərdən nə qədər uzaqlaşıblar ki, Əlikram kimi separatçının fikirlərini yayan, ona tribuna verən kanalı paylaşırlar. Mirəlioğlu həmin kanalın sahibi Q.Məmmədovun "inqilab lideri", prezidentliyə namizədidir. Buyursun, ya həmin kanalda iştirakdan imtina etsin (necə ki, biz sapqın mövqeyinə görə bir çox media qurumunda iştirakdan imtina etmişik- red.), ya da Ə.Hümbətovlarla eyni dəyərləri paylaşdığını etiraf edib susun...”.

Bu hadisəyə sərt reaksiya verənlərdən biri də AXCP-nin funksioneri Natiq Ədilov olub. O özünün “Facebook”  səhifəsində Q. Məmmədovun hərəkətini kəskin pisləyib: “Londonda mənzillənən fitnəkar Q. Məmmədov öz “YouTube” kanalından özünü qondarma “Talış Respublikası”nın “prezidenti” sayan Ə.Hümbətovun müraciətini yayıb.

Talış xalqına ünvanlanan müraciətdə "prezident" deyir ki, Azərbaycanda yaşayan bütün millətlər, sosial qruplar dövlət idarəçiliyində bacarıqsızlığını göstərdiyindən talışlar, talış xalqı öndə olmaqla ətrafına güc (?) toplamaqla, bütövlükdə, dövlət idarəçiliyini üzərinə götürsün!

Ə.Hümbətovla bağlı geniş izahata ehtiyac yoxdur, o dəfələrlə açıq şəkildə Azərbaycana düşmən mövqeyini ifadə etmişdir, hazırkı respublikanın sərhədlərini və formasını süni təsisat adlandırmış, onun suverenliyini şübhə altına qoymuşdur. Ermənilərdən üzrxahlığı, onları dost görməsi də köhnə söhbətdir”.

Göründüyü kimi, Q.Məmmədovun ermənilərdən heç nəyi ilə fərqlənməyən, separatçılığı heç kimdə şübhə doğurmayan Ə.Hümbətov kimi bir adama  tribuna verib, onun qızışdırıcı, konstitusion quruluşumuza zidd olan bəyanatını yayması hətta radikal müxalif dairələr tərəfindən kəskin tənqidlə qarşılanıb. Q.Məmmədovun bu əməlini media ekspertləri necə dəyərləndirirlər?

Media eksperti Azər Həsrət “Bakı-Xəbər”ə bildirdi ki, Ə.Hümbətovun kim olduğu bizə məlumdur: “Onun vətən xaini olması məhkəmə hökmü ilə öz əksini tapıb və həmin cəza onunla bağlı icra edilib. Sadəcə, Azərbaycan dövlətinin humanistliyi nəticəsində o, azadlığa buraxılıb, ölkə vətəndaşlığından məhrum olundu ki, gedib ömrünün qalan hissəsini xaricdə, sakit şəkildə, adam balası kimi yaşasın. Təəssüflər olsun ki, o, adam balası kimi yaşaya bilmədiyini ortaya qoyur. Azərbaycanın əleyhinə təbliğat aparmaqda işğalçı ermənilərlə əlbirlik də nümayiş etdirdi. Təbii ki, belə vətən xaini ilə işbirliyində olmaq vətənə xəyanətdən başqa nəsə deyil. Q.Məmmdovun onun müraciətini hər hansı formada tirajlaması elə vətənə xəyanət kimi bir addımdır. Mətbuat və ifadə azadlığı kimi başa düşülən məsələnin də bir həddi var. Bu ifadə azadlığı sənin dövlətinə xəyanət məqsədilə köklənibsə, ondan mütləq imtina etməlisən. Amma təəssüflər olsun ki, Q.Məmmədov bunu bacarmır, o, xainin müraciətini efirdən yayır. Bunu edən şəxsə nə ad verə bilərik? Satqınlıqdan başqa nəsə ad vermək olmur. Görünür ki, Q.Məmmədov özünün sırasını seçib, kimin yanında olduğunu nümayiş etdirib. Bundan sonra o nə danışsa, nə çağırış etsə də, ona vətən xaini ilə əlbir olan adam kimi baxacaqlar. Belə bir adama  Azərbaycanın daxili işlərinə öz kirli burnunu soxmasına izn verilməməlidir. Azərbaycan dövləti də vətən xaininə qahmar çıxan Q.Məmmədovla bağlı hüquqi ölçü götürülməsi üçün addımlar atmalıdır”.

Məhəmmədəli QƏRİBLİ

Son xəbərlər