12/11/2019 14:25
728 x 90

Öz partiyasından Əli Kərimlinin idarəçiliyinə qarşı ifrat sərt çıxışlar çoxalır

img

Əli Kərimlinin rəhbərlik etdiyi AXCP-nin fəal üzvlərindən olan Namiq Sadıxlı üzvü olduğu partiyadan çıxma səbəblərini açıqlayıb. N.Sadıqlı Facebook sosial şəbəkəsində AXCP-yə qarşı bir çox sərt ittihamlar səsləndirib.

N.Sadıqlı yazır: "Dostlar, çox düşündükdən sonra Əli Kərimlinin özəl, şəxsi partiyasından istefa addımını atdım. Bir neçə səbəbi yazacam ki, Cəbhədə qalan, hörmətimi saxlayan və dəyər verdiyim kifayət qədər cəbhəçi dostlarım məndən inciməsinlər. Əksinə, bu addımı əvvəldən atmışdım, bəlkə düzələr deyə gözləyirdim. Səbəbləri, ən azı, 12 bənd olaraq göstərirəm”.

Partiya üzvü daha sonra AXCP-dən çıxma səbəbini 12 bənd olaraq sıralayıb:

"1. Siyasi rəqiblərinə qarşı öz əlaltıları vasitəsilə iyrənc söyüşlü kampaniya apardığını qəbul edə bilmədiyim üçün.

2. Azad, fərqli düşüncəli, onu tərifləməyən, tənqid edənlərə hücum etdiyi üçün.

3. Özündə güc tapıb son həbs edilən, hakimiyyəti sərt tənqid edən siyasi məhbus Elvin İsayevə nəinki dəstək, əksinə, ona dəstək verən üzvlərə trol hücumu etdirdiyi üçün.

4. Özünü "demokrat lider” adlandırıb, əksinə, diktatorluğa daha çox meyl göstərdiyi üçün.

5. Neçə ildir 50-dən çox pariya sədrindən heç birinin adını çəkərək birliyə çağırmadığı üçün.

6. Neçə ildir hakimiyyəti dəyişmək deyil, yalnız ana müxalifət kürsüsünü qoruyub saxladığı və təkəbbürlükdən əl çəkmədiyi üçün.

7. Hər üç aydan bir 2 saatlıq mitinq keçirməklə işini bitmiş hesab etmək, partiyadaşlarını günahsız yerə həbsxanalara doldurmaqla özünə müəyyən dividend qazanmağı xoşladığı üçün.

8. Şəxsinə yazdığım məktubları oxuyaraq, cavab verməməklə hörmətsizlik etdiyini gördüyüm üçün.

9. Yeni nəfəs, yeni siyasi simalar ortaya çıxan kimi onlara qarşı "hakimiyyətə işləyirsən” damğası vurmaq, cəmiyyətdə gözdən salmaq üçün sosial şəbəkələr üzərindən min cür qarayaxmalar hazırladığı üçün.

10. Dildə demokratiyadan danışan bu şəxs "mənim yanımda deyilsənsə, bizdən deyilsən” deməklə yalnız tərifləri qəbul edib, tənqid edənləri agent adlandırdığı üçün.

11.”Elçi TV YouTube kanalı” vasitəsilə Əli Kərimlilə yanaşı, digər siyasi xadimlərin videoçıxışlarını yayınladığımı həzm edə bilmədiyi üçün.

12. Daha nə yazım, dostlar, çox gözlədim ki, özünü lider kimi cəmiyyətə məcburi sırımaq istəyən bu partiya sədri bəlkə düzələr, bəlkə hakimiyyətə gəlmək üçün siyasi mübarizə adamlarıyla isti münasibətlər qurub birləşməyə başlayar, əksinə, yanıldığımı tam olaraq hiss elədiyim üçün istefa verdim”.

Göründüyü kimi, partiyanın fəallarından olan bir şəxs indiyə kimi alterantiv düşərgənin Əli Kərimli barəsində dediklərini təsdiq edir. Uzun müddət onların öz içində olan adam da deyir ki, Əli Kərimlinin partiyasında demokratiyadan əsər-əlamət yoxdur. Partiya üzvünün istefasına səbəb olan məqamlarla bağlı kənar müşahidəçilər nə deyə bilər?

  • Rəfail Becanov: “Siz Əli Kərimlinin təşkilatının “vitrininə” fikir verin, görün orada bir nəfər də olsun əsl AXCP ilə dərindən bağlılığı olan adam varmı?”

AXCP adına iddia edən digər siyasi təsisatın funksioneri Rəfail Becanov “Bakı-Xəbər”ə açıqlamasında bildirdi ki, istefa verən gəncin sadaladığı səbəbləri biz çoxdan bilirik: “Əli Kərimli bu prosesə çoxdan başlayıb. Hələ mən gəncin yazdığı səbəblər sırasına bir neçəsini də əlavə edə bilərəm. Əli Kərimli bu avtoritar idarəetməyə 1995-ci ildən start verib. AXCP-də əlinə səlahiyyət keçən kimi belə siyasət yürütməyə başladı. Bunun da nəticəsində AXCP-də parçalanmaların əsası qoyuldu. Hazırda Namiq Sadıqlı və digərlərinin Əli Kərimli və onun idarəçiliyi ilə bağlı yazdıqları siyasi cameədə olanlar üçün yenilik deyil. Əli Kərimli nəinki tənqidə, hətta alternativ fikrə belə dözümsüzlük nümayiş etdirir. Həyatlarını bu prosesə verən adamlar təbii ki, ömürlərini orada başa vurmaq istəmirlər. Ayılırlar, görürlər ki, belə siyasətlə uzağa getmək olmaz. Yaranmış vəziyyət hər cür təmiantı olan Əli Kərimlini qane edə bilər, başqalarını yox. Həmin gənclər də öz bacarıqlarını dövlət quruculuğuna sərf etmək istəyirlər. Ancaq onlardan aralanmaq, düz yola qayıtmaq istəyənə birmənalı olaraq satqın damğası vururlar.  Axı siyasi təşkilata üzv olanda kiminsə qarşısına belə öhdəlik qoyulmur ki, orada ömürlük qalmalıdır. “Hamı pisdir, biz yaxşıyıq”, “bütün seçkiləri boykot edək”, “bu dövləti bizdən başqa kimsə düzəldə bilməz” kimi şüarlarla uzağa getmək olmaz. Demokratiyanı necə imitasiya edirlərsə, adamlardan da o qaydada imitasiya edirlər. Artıq bizim dediklərimizi öz daxillərində olanlar da etiraf edirlər. Müqavimət göstərmək lazımdır, adam yerini bilsin, gənclərin beynini pozmasın. Bu avtoritar idarəetmə sona qədər gedə bilməz. Əminəm ki, yaxın zamanlarda Əli Kərimlinin ətrafından daha çox qopmalar olacaq. Siz Əli Kərimlinin təşkilatının “vitrininə” fikir verin, görün orada bir nəfər də olsun əsl AXCP ilə dərindən bağlılığı olan adam varmı? Belə adamlar başqa partiyalarda olsa da, orada yoxdur. Bu şəraiti Əli Kərimlinin özü yaradıb”.

Məhəmmədəli QƏRİBLİ

Son xəbərlər