10/12/2019 19:50
728 x 90

Gürcüstanın qondarma “DQR”dəki saxta seçkiyə reaksiyası çevik oldu…

img

Separatçı “DQR” rejiminin Azərbaycanın işğal olunmuş ərazilərində keçirdiyi saxta seçkilər heç vaxt beynəlxalq ictimaiyyət tərəfindən tanınmayıb. Ancaq məsələnin başqa maraqlı tərəfi var. Həmin “seçkiləri” tanımamaqla bağlı ilk reaksiyanın hansı ölkələr tərəfindən verilməsi vacib məqamdır. Hər halda, “uman yerdən küsərlər “ deyiblər.

Biz belə ilk reaksiyanı separatçılıqdan əziyyət çəkən ölkələrdən gözləyirik. Belə ölkələrdən biri də qonşuluğumuzda olan Gürcüstandır. Həmin ölkə həm separatizmdən əziyyət çəkir, həm də bizimlə yaxın qonşudur. Yəni üzərinə ikiqat məsuliyyət düşür. Ancaq təəssüf ki, biz Gürcüstandan indiyə qədər bu məsələ ilə bağlı operativlik görmürdük. Bu yaxınlarda Gürcüstan ərazisində separatçı kimi tanınan Abxaziyada qondarma seçkilər keçirildi. Onun nəticələrini tanımamaqla bağlı ilk bəyanatı Azərbaycan verdi. Qəzetimizdə məxsusi olaraq bu mövzuya toxunduq ki, analoji operativliyi Gürcüstandan da görmək istəyirik. Hər halda, Gürcüstanın son reaksiyasından məmnun qalmaq olar.

Gürcüstan Dağlıq Qarabağda qondarma “yerli özünüidarəetmə orqanlarına seçkiləri” tanımadığını hamıdan əvvəl bəyan edib. Bu barədə Gürcüstan Xarici İşlər Nazirliyinin bəyanatında deyilir. Sənəddə qeyd olunur ki, Azərbaycanın suverenliyi və beynəlxalq səviyyədə tanınmış sərhədlər çərçivəsində ərazi bütövlüyünə dəstəyini bir daha ifadə etməklə, Gürcüstan Xarici İşlər Nazirliyi 2019-cu il sentyabrın 8-də Dağlıq Qarabağda keçirilmiş qondarma “yerli özünüidarəetmə orqanlarına seçkiləri” və onun nəticələrini tanımır.

Bəyanata əsasən, Gürcüstan Xarici İşlər Nazirliyi münaqişənin beynəlxalq hüququn norma və prinsiplərinə uyğun olaraq, sülh yolu nizamlanmasını dəstəkləyir.

Gürcüstanın separatçıların keçirdiyi qondarma seçki ilə bağlı mövqeyini necə dəyərləndirmək olar?

  • Nəzakət Məmmədova: “Gürcüstan tərəfi yaxşı başa düşür ki, separatizmə qarşı mövqe ortaya qoymaq, ilk növbədə, onun özünə lazımdır”

Politoloq Nəzakət Məmmədova “Bakı-Xəbər”ə bildirdi ki, bir müddət əvvəl bizimlə söhbətində bu məsələyə toxunub: “Gürcüstanın belə reaksiyası normaldır və əslində, belə də olmalıdır. Hər bir dövlət beynəlxalq hüquqa, başqa dövlətlərin ərazi bütövlüyünə hörmət etməlidir, ələlxüsus, onun öz ərazisində separatizm ocaqları varsa. Gürcüstan XİN-in bu addımı təqdirəlayiqdir. Gürcüstan Prezidenti xanım Zurabişvili də Ermənistanda olarkən Qarabağ separatçılarının Abxaziya və Cənubi Osetiyaya səfərlərindən narazılığını bildirmişdi.

Gürcüstan tərəfi yaxşı başa düşür ki, separatizmə qarşı mövqe ortaya qoymaq, ilk növbədə, onun özünə lazımdır. Gürcüstan Prezidenti Azərbaycana səfəri zamanı hər iki ölkənin torpaqlarının işğal olunduğunu vurğuladı və İrəvanda olarkən də erməni jurnalistlərinin ciddi-cəhdinə baxmayaraq, bu mövqeyindən geri çəkilmədi.

Xanım Prezidentin bu mövqeyi Cənubi Qafqazdakı münaqişələrə obyektiv yanaşma hesab oluna bilərdi. O bildirmişdi ki, Dağlıq Qarabağdan separatçılar Abxaziyaya və Cənubi Osetiyaya gələrək buradakı separatçılarla yaxın əlaqələr qururlar. Doğrudur, Zurabişvilinin bu mövqeyi ədalətli olsa da, lakin Gücüstanla sərhəddə insident, erməni terrorçuya abidə qoyulması iki ölkə arasında münasibətləri gərginləşdirmişdi. Görünür, Gürcüstan Azərbaycanla münasibətləri tam qaydasına salmaq, beynəlxalq hüquqa riayət etdiyini göstərmək, habelə öz ərazi bütövlüyü məsələsinin ədalətli həllinə presedent yaratmaq naminə bu bəyanatı verib. İstənilən halda, belə operativ reaksiyanı biz təqdir edirik. Ümidvar olmaq istəyirik ki, bu mövqe daim qorunub saxlanacaq”.

Məhəmmədəli QƏRİBLİ

Son xəbərlər