Rusiya və Ermənistan arasında münasibətlərin indi heç də hamar olmadığı və Moskvanın İrəvana getdikcə daha çox təzyiq göstərdiyi heç kimə sirr deyil. Belə bir vaxtda Ermənistanın baş naziri Nikol Paşinyana yaxın dairələrin Rusiyaya qarşı tənqid və hədələri artırması vəziyyətin getdikcə gərginləşdiyini deməyə əsas verir. Erməni ekspert Haqik Hambaryan isə bildirir ki, Paşinyanın "Sasna Tsrer" və "İşıqlı Ermənistan" partiyalarının təmsilçiləri vasitəsilə Rusiya əleyhinə fikirlər səsləndirməsi sonda Ermənistanın özünə vurulmuş ciddi zərbəyə çevriləcək.
Xatırladaq ki, "Sasna Tsrer" rəhbəri Jirayr Sefilyan Rusiyanı sərt tənqid edib və Ermənistanın bu ölkədən qurtulmasının vaciblyini bəyan edib. Haqik Hambaryan belə mövqeynin Rusiyada sərt qarşılandığını və İrəvanın buna görə cavab verməli olacağını qeyd edib. Politoloqun sözlərinə görə, Ermənistandakı hakimiyyət dəyişikliyindən sonra Ermənistan və Rusiya arasındakı əlaqələr bir o qədər də hamar deyil: “Bunu hətta inqilabçı eyforiyadan xilas olmamış bir çoxları da başa düşüb. Mən inqilabdan sonra erməni-rus əlaqələrində baş vermiş hadisələri açıqlamayacam. Son dövrlər baş vermiş problemlərə toxunacam. Bu problemlərdən ən vacibi Ermənistanın keçmiş preziedenti Robert Köçəryanın həbs olunması məsələsidir. Bu məsələ lap əvvəldən erməni-rus əlaqələrini gərginləşdirdi. Bundan başqa, Ermənistan Məhkəmə Aktlarının Məcburi İcrası Komitəsinin sabiq rəisi Miqran Poqosyanın erməni hüquq-mühafizə orqanlarına təhvil verilməməsinə cavab olaraq İrəvanın Moskvaya məntiqsiz cavabları da bu problemlər sırasındadır”. Hambaryan bildirib ki, Paşinyanın cəhdləri, onun “rus qorxuları”nı Sefilyan və digər antirus xadimlərin dodaqları ilə səsləndirməsi təhlükəli oyunun başlanğıcıdır və bundan təkcə Paşinyan yox, eləcə də Ermənistan əziyyət çəkəcək.
Yuxarıda qeyd olunduğu kimi, "İşıqlı Ermənistan" Partiyası vasitəsilə də Paşinyan Rusiyaya qarşı mövqeyini ortaya qoyur. "İşıqlı Ermənistan" Partiyasının parlament fraksiyasının üzvü Arman Babacanyan belə bir vaxtda açıqlama verib ki, Ermənistanın başına gələn bütün bəlalarda günahkar Rusiya prezidenti Vladimir Putindir. Özü də bu açıqlama Putinin gələn ayın əvvəlində Ermənistana gözlənilən səfəri fonunda verilir. Babacanyan isə bildirir: “Moskvanın nəyə görə “1 mart” məsələsində bu qədər maraqlı olmasını anlamaq yaxşı olardı. Həqiqətən də bu, Vladimir Putinin Robert Köçəryanı dəstəklədiyini göstərir? Başqa sözlə desək, problem Putinlə bir çox məsələlərdə, o cümlədən ortaq cinayətlərdə bağlılığı olan ikinci prezidentin şəxsiyyətindədir, yoxsa Moskva məhz "1 mart" məsələsində maraqlıdır? Bu suala birmənalı cavab vermək çətindir. Digər tərəfdən, bir qədər əvvəl məlum oldu ki, 1 mart işində Rusiyanın iğtişaşların yatırılmasında müəyyən iştirakı olduğunu sübut edən sənədlər peyda olub". "Shame.am" portalı yazır ki, bu gedişlə Arman Babacanyan ABŞ-ın Ermənistandakı səfiri ilə məsləhətləşmələr aparacaq, səfir isə Nikol Paşinyana Baş Prokurorluğun Vladimir Putinə qarşı cinayət işi açması və onu məsuliyyətə cəlb etməsi üçün göstəriş verməsini tapşıracaq: “Bunları qətiyyən istisna etmək olmaz. Çünki Ermənistanda dəlilik epidemiyası təhlükəsi var. Bu gün artıq bütün simptomlar mövcuddur. Konstitusiya Məhkəməsinin qərarı necə gəldi şərh olunur: nazir Köçəryanın azad edilməsinə qərar vermədiyini bildirir, digərləri isə məhkəmənin legitim olmadığını iddia edir. Vladimir Putinə Ermənistanda müttəhim statusu verilməsi xoşagəlməz olardı. Yeni Ermənistan artıq hər şeyin baş verməsinin mümkün olduğu ABŞ-Soros koloniyasıdır”.
Moskvada yaşayan erməni politoloq Andranik Miqranyan isə bu xüsusda bildirib ki, həqiqətən İrəvan Moskva ilə kəskin ziddiyyətlərə gedir və Kreml bunları cavabsız qoymayacaq. Ekspert xatırladır ki, sentyabrın 3-də Ermənistan Miqrasiya Xidməti tərəfindən rus müxalifətçi Vitali Şişkinin qaçqın kimi tanındığı və sığınacaq verildiyinin üzə çıxmasından sonra Kreml müəyyən cavab tədbirləri görəcək. Şişkinə sığınacaq verilməsinin Ermənistan Dövlət Aktlarının Məcburi İcrası Komitəsinin sabiq rəisi, korrupsiya ittihamı ilə axtarışa verilən Miqran Poqosyanın Ermənistana təhvil verilməməsi ilə bağlı Rusiya hakimiyyətinin addımına cavab olması barədə məsələni şərh edərkən Miqranyan qeyd edib ki, bu qədər siyasi maraq olmasına baxmayaraq, Rusiyada heç Poqosyanı tanımırlar: “Ancaq indi söhbət Poqosyandan deyil, daha çox tanınan nüfuzlu bir şəxsdən gedir və bunları bərabər tutmaq olmaz”. Miqranyanın sözlərinə görə, Ermənistan Rusiyaya açıq formada etiraz bildirmək üçün qətiyyətli mövqeyə və resurslara sahib deyil: “Poqosyanın qaytarılıb-qaytarılmaması siyasi məsələ deyil. Bu məsələnin onun təhvil verilməsinə dair sənədlərin savadsız hazırlanmasından başlayaraq, Rusiya üçün siyasi əhəmiyyət daşımadığına qədər bərabər tutulması əsassızdır. Ancaq Şişkinin məsələsi Rusiya üçün tamamilə siyasi məsələdir və bu məsələ ilə bağlı Ermənistanda hansı səviyyədə qərar verildiyi sirr deyil. Paşinyan bununla Rusiyanın qəzəbini Ermənistanın üzərinə çəkir”. O qeyd edib ki, Şişkinə siyasi sığınacaq verilməsi qərarı hər kimin səviyyəsində verilibsə, bu, Rusiya hakimiyyətinə və məhz prezident Putinə qarşı sərt reaksiyadır: “ Ermənistan Şişkinə siyasi sığınacaq verirsə, demək açıq-aşkar ictimai şəkildə Rusiya hakimiyyətinin üzünə tüpürür. Belə bir addım atmaq üçün axmaq, yaxud Ermənistanın düşməni olmalısan”. Onun sözlərinə görə, Şişkin Ermənistanın onunla bir çox sahələrdə, hərbi, iqtisadi, sosial-iqtisadi məsələlərlə bağlı olduğu Rusiya hakimiyyəti ilə qarşıdurmaya getməyə layiq şəxs deyil:“Ermənistanda bəzi insanlar ağlını itirib. Onlar hesab edir ki, dünya onların addımları ilə razılaşmalı, onların arxasınca getməli və çevrələrində fırlanmalıdır. Çox təəssüf ki, erməni xalqı və erməni dövlətçiliyi bunlar kimilərinin əlinə keçib. Ermənistan hakimiyyəti dərk etmir ki, bu cür şıltaqlıqları heç super güclər də özlərinə rəva bilməz. Bu insanlar bilmir ki, Yupiterin edə biləcəyini öküz edə bilməz. Bu, siyasət elminin və diplomatiyanın ən sadə əlifbasıdır. Mən Ermənistanda hakimiyyətə kəmsavadların gəldiyini bilirdim. İndi isə bunların heç bir şey öyrənməyə meylli olmadığına da əminəm”.
Bütün bunlar qarşıdakı dövr ərzində Rusiya-Ermənistan münasibətlərində kifayət qədər gərginliklərin olacağını deməyə əsas verir.
Tahir TAĞIYEV
