“Biz sammitə hazırlaşırıq. Əminəm ki, erməni-rus əlaqələri bu sammitdən yalnız fayda götürəcək. Bizim yanaşmamız və məqsədimiz budur”. Bunu Ermənistan xarici işlər naziri Zohrab Mnatsakanyan erməni mətbuatına açıqlamasında bildirib.
Ermənistan XİN-də təşkil olunmuş mətbuat konfransında jurnalistlər Mnatsakanyana sual veriblər ki, Putin həqiqətən də Köçəryana baş çəkmək istəsə, bu, Ermənistan hökuməti tərəfindən diplomatik şəkildə necə qəbul ediləcək və hər hansı dərəcədə erməni-rus əlaqələrinə təsir edə bilərmi?
Mnatsakanyan isə bu suala cavab verməkdən faktiki olaraq imtina edib və bunu belə əsaslandırıb: “Sualınızın “əgər” konteksti onu şərh etməyə məcbur etmir. Biz sammitə hazırlaşırıq. Əminəm ki, erməni-rus əlaqələri bu sammitdən yalnız fayda götürəcək”.
Jurnalistlərin “Köçəryan amili hər hansı dərəcədə erməni-rus əlaqələrinə mane olmur” sualına da Mnatsakanyan eyni cavabı verib: “Bir daha təkrar edirəm, dövlətlərarası əlaqələrdə Ermənistan və Rusiya arasında bizim çox aydın formalaşdırılmış gündəmimiz var”.
Qeyd edək ki, Köçəryan amilinin Paşinyan-Putin və Ermənistan-Rusiya dövlətlərarası münasibətlərinə təsiri olması ilə bağlı erməni mətbuatında çoxlu məlumat yayılıb. Hətta belə bir məlumat da var ki, Putin Paşinyanın qarşısında iki ölkə arasında münasibətlərin bərpa olunması üçün Köçəryanın azadlığa buraxılması tələbini qoyub. Lakin Ermənistan XİN bu şayiələri şərh etməyib.
Görünən odur ki, Ermənistan rəsmiləri Köçəryan məsələsində çaşqın vəziyyətdədirlər. Adətən belə səfərlər zamanı dövlət başçısının protokolu məlum olur. Yəni prezident hansı görüşlərə qatılacaq, kimlərlə görüşəcək və s. Belə məlum olur ki, Putinin Köçəryanla görüşmək məsələsi hələ tam aydın deyil. Ona görə də sanki Ermənistan rəsmiləri çətin seçim qarşısındadırlar. Bunun reallaşa biləcəyindən ehtiyat edirlər.
Aydın Mirzəzadə: “Rusiya bu ölkə ilə münasibətlərində keçmiş dövrün prinsiplərini qoruyub saxlamağa çalışır”
Məsələyə münasibət bildirən millət vəkili Aydın Mirzəzadənin sözlərinə görə, Ermənistan hakimiyyəti ikili oyun oynadığı üçün, belə situasiyalarla üz-üzə qalmaqdan çəkinir: “Yəni Ermənistan apardığı “iki stolda oturmaq” siyasətinin acı nəticələrini dadır. Mnatsakanyanın məlum suala cavab verməkdən yayınmasını bununla da əlaqələndirmək olar. Ermənistan hakimiyyəti ikili oyun oynamaqla müxtəlif güc mərkəzlərindən faydalanmaq istəyir. Bu o deməkdir ki, heç bir tərəflə səmimi dost olmaq istəmədiyini hər zaman ortaya qoyur. Rusiya da bütün bunların fərqindədir. Kimin nə deməsindən asılı olmayaraq, Ermənistanın keçmiş prezidenti Robert Köçəryan cinayətkardır. O, Azərbaycan xalqına qarşı törətdiyi əməllərə görə həbsdə olmalı və ən ağır cəza almalıdır. Bu gün Rusiya Ermənistanla münasibətlərində keçmiş dövrün prinsiplərini qoruyub saxlamağa çalışır. O baxımdan hesab etmirəm ki, bu gün Köçəryan Rusiya üçün çox qiymətli və əvəzedilməz şəxsdir. Sadəcə olaraq Rusiya Ermənistana onunla sıx dostluğun saxlanmasının vacibliyini müxtəlif yollarla çatdırmağa çalışır. Ermənistan hakimiyyətinin hazırkı rəhbərliyi isə həmin suallara cavab vermək iqtidarında deyil. Rusiyanın guya Köçəryana stavka etdiyi ilə bağlı fikirlərə gəldikdə isə, bunu gələcək göstərəcək. İndidən bu barədə hansısa mülahizələr irəli sürmək doğru olmaz”.
Vidadi ORDAHALLI
